Juan 4 - Jiñi Tsiji' bʌ Wen T'añ cha'añ Estudio

Jesús yic'ot jiñi x'ixic ch'oyol bʌ ti Samaria

¹ Che' bʌ tsi' yu'bi lac Yum chuqui tsi' yʌlʌyob jiñi fariseojob: Jesús ñumen woli' yotsan wiñicob ti xcʌnt'añob i cha'añ yic'ot ñumen woli i yʌc' ch'ʌmja' che' bajche' Juan.

² (Anquese ma'añic tsi' yʌc'ʌ ch'ʌmja' Jesús, cojach jiñi xcʌnt'añob i cha'añ tsi' yʌc'ʌyob ch'ʌmja').

³ Jiñi cha'añ Jesús tsi' cʌyʌ Judea. Tsa' cha' majli ti Galilea.

⁴ Ya' tsa' ñumi majlel ti Samaria.

⁵ Tsa' c'oti ti jump'ejl tejclum am bʌ ti Samaria, i c'aba' Sicar, lʌc'ʌl ti' lum Jacob tsa' bʌ i yʌq'ue i yalobil, i c'aba' José.

⁶ Ya'añ pozo tsa' bʌ i mele Jacob. Lujbix Jesús ti xʌmbal, jiñi cha'añ tsa' buchle ti ti' pozo. Ti jiñi bʌ ora yomix i taj xinq'uiñil.

⁷ Tsa' tili juntiquil x'ixic ch'oyol bʌ ti Samaria cha'añ mi' luch ja'. Jesús tsi' su'be: —Aq'ueñon ja' cha'añ mic jap, —che'en.

⁸ Come jiñi xcʌnt'añob i cha'añ tsa' majliyob ti tejclum cha'añ mi' mʌñob i bʌlob i ñʌc'.

⁹ Jiñi x'ixic ch'oyol bʌ ti Samaria tsi' su'be Jesús: —Jatet judíojet. ¿Chucoch ma' c'ajtibeñon ja' che' awujil samaritanajon? Come judíojob yic'ot samaritanojob, ts'a' mi q'uelob i bʌ, —che'en.

¹⁰ Jesús tsi' jac'be: —Tsa'ic a cʌñʌ a majtañ ch'oyol bʌ ti Dios, tsa'ic a cʌñʌ jiñi woli' bʌ i c'ajtibeñet ja', tic'ʌl che' jiñi tsa'ix a c'ajtibeyon ja' cha'añ mi cʌq'ueñet cuxul bʌ ja', —che'en.

¹¹ Jiñi x'ixic tsi' su'be: —C Yum ma'añic a lucho' ja', tam i ch'eñal ja'. ¿Baqui ma' taj jiñi cuxul bʌ ja'? —Che'en.

¹² ¿Ñumen ñuquet ba bajche' lac tat Jacob tsa' bʌ i yʌq'ueyonla ili pozo? Wʌ' tsi' japʌ ja' Jacob yic'ot i yalobilob yic'ot pejtelel i yʌlac', che'en jiñi x'ixic.

¹³ Jesús tsi' jac'be: —Majqui jach mi' jap jiñi ja' mi caj i cha' tiquin i ti',

¹⁴ pero majqui jach mi' jap ja' mu' bʌ cʌq'uen, ma'añix mi caj i chʌn tiquin i ti', come jiñi ja' mu' bʌ cʌq'uen mi' caj ti ajñel ti' pusic'al che' bajche' bulux ja' cha'añ mi' yʌq'ueñ i cuxtʌlel mach bʌ añic mi' jilel.

¹⁵ Jiñi x'ixic tsi' su'be: —C Yum, aq'ueñon jiñi ja' cha'añ ma'añic mi' chʌn tiquin c ti', cha'añ ma'añix mic chʌn tilel ti luch ja' ilayi, —che'en.

¹⁶ Jesús tsi' su'be: —Cucu, pʌyʌ tilel a ñoxi'al, —che'en.

¹⁷ Jiñi x'ixic tsi' jac'be: —Ma'añic c ñoxi'al. Jesús tsi' su'be: —Melel chuqui ma' wʌl, ma'añic a ñoxi'al,

¹⁸ come tsa'ix ajñiyob a wic'ot jo'tiquil a ñoxi'al. Jiñi wiñic am bʌ a wic'ot wʌle mach a ñoxi'alic. Isujm bajche' tsa' wʌlʌ, che'en.

¹⁹ Jiñi x'ixic tsi' su'be: —C Yum, mic ña'tan x'alt'añet.

²⁰ C tat lojon tsi' ch'ujutesayob Dios ila ti wits. Pero jatetla mi la' wʌl ya' yom mi lac ch'ujutesan Dios ti Jerusalén, che'en.

²¹ Jesús tsi' su'be: —X'ixic, ñopo cha'añ tal i yorajlel che' mach wʌ'ic ti wits mi ya'ic ti Jerusalén mi caj la' ch'ujutesan lac Tat.

²² Jatetla mach la' wujilic chuqui mi la' ch'ujutesan. Joñon lojon cujil chuqui mic ch'ujutesan lojon, come ch'oyol i coltʌntel wiñicob x'ixicob ti judíojob.

²³ Tal i yorajlel, i yorajlelix wʌle, che' mi caj i ch'ujutesañob lac Tat ti' Espíritu yic'ot ti isujm; come lac Tat ja'el mi' sajcan jiñi mu' bʌ i ch'ujutesañob che' bajche' jiñi.

²⁴ Dios Espíritujʌch. Jiñi mu' bʌ i ch'ujutesañob Dios, wersa mi' ch'ujutesañob ti espíritu yic'ot ti isujm.

²⁵ Jiñi x'ixic tsi' su'be: —Cujil tal jiñi Mesías, mu' bʌ i pejcʌntel ti Cristo; che' wʌ'ix añ mi caj i tsictesʌbeñonla pejtelel chuqui tac añ, —che'en.

²⁶ Jesús tsi' su'be: —Joñoñʌch jiñi woli bʌ c cha'len t'añ a wic'ot, —che'en.

²⁷ Che' jiñi tsa' tiliyob xcʌnt'añob i cha'añ, tsa' toj sajtiyob i pusic'al cha'añ woli ti t'añ yic'ot juntiquil x'ixic; pero ma'añic mi juntiquilic majqui tsi' c'ajtibe: ¿Chuqui wola' c'ajtiben? ¿Chuqui woli a wʌl a wic'ot jiñi x'ixic?

²⁸ Jiñi cha'añ jiñi x'ixic tsi' cʌyʌ i yuc'um, tsa' majli ti tejclum, tsi' su'be wiñicob x'ixicob:

²⁹ —La' cu la. Q'uelela juntiquil wiñic tsa' bʌ i su'beyon pejtelel chuqui tac tsa' c mele ti pejtelel q'uiñ. ¿Mach ba jiñic jiñi Cristo, jiñi yajcʌbil bʌ mi la' wʌl? Che'en.

³⁰ Che' jiñi tsa' cajiyob ti loq'uel majlel ti tejclum, tsa' tiliyob ba'añ Jesús.

³¹ Che' woli' tilelob, jiñi xcʌnt'añob tsi' su'beyob Jesús ti wocol t'añ: —Maestro, c'uxux a waj.

³² Jesús tsi' su'beyob: —Añ junchajp c waj yom bʌ mi c'ux mach bʌ la wujilic, —che'en.

³³ Jiñi cha'añ jiñi xcʌnt'añob tsi' su'beyob i bʌ: —¿Am ba majqui tsi' ch'ʌmbe tilel chuqui mi' c'ux?

³⁴ Jesús tsi' su'beyob: —Jiñi c waj jiñʌch che' mic mel chuqui yom c Tat tsa' bʌ i chocoyon tilel, yic'ot che' ts'ʌcʌl mic melben i ye'tel.

³⁵ ¿Mach ba añic mi la' wʌl: “Añ to yom chʌmp'ejl uw cha'añ mi' c'otel i yorajlel c'ajbal?” Awilan, mic su'beñetla: Letsan la' wut, q'uelela jiñi cholel, come tiquiñix, c'ajolix yom.

³⁶ Jiñi mu' bʌ i cha'len c'ajbal mi' taj i tojol yic'ot mi' tempan i chobejtʌbal cha'añ i cuxtʌlel mach bʌ añic mi' jilel. Cha'añ junlajal tijicña mi' yu'bin jiñi mu' bʌ i cha'len pac' yic'ot jiñi mu' bʌ i cha'len c'ajbal.

³⁷ Isujm bajche' mi' yʌlob wiñicob: “Juntiquil mi' cha'len pac', yam bʌ mu' bʌ i c'ajben i wut”.

³⁸ Tsa'ix c chocoyetla majlel cha'añ mi la' c'aj ba' ma'añic tsa' la' cha'le e'tel, yaño' bʌ tsi' cha'leyob e'tel, jatetla wolix la' c'ajben i wut i ye'tel.

³⁹ Ca'bʌl samaritanojob ya' ti Sicar tsi' ñopoyob Jesús cha'añ i su'bal jiñi x'ixic che' bʌ tsi' yʌlʌ: “Jiñi Wiñic tsi' su'beyon pejtelel chuqui tac tsa' c mele ti pejtelel q'uiñ”, che'en.

⁴⁰ Che' tilemobix samaritanojob ba'añ Jesús, tsi' c'ajtibeyob ti wocol t'añ cha'añ mi' jalijel yic'otob. Ya' tsa' cʌle Jesús cha'p'ejl q'uiñ.

⁴¹ Añ to ca'bʌlob tsa' bʌ i ñopoyob Jesús cha'añ ti' t'añ.

⁴² Tsi' su'beyob jiñi x'ixic: Wʌle mic ñop lojon, mach cha'añic jach tsa' su'beyon lojon, pero cha'añ tsa' cu'bi lojon i t'añ ja'el. Cujil lojon ti isujm jiñʌch jiñi Cristo, jiñi Yajcʌbil bʌ, i yaj Coltaya wiñicob x'ixicob año' bʌ ti pañimil.

Jesús tsi' c'oq'uesʌbe i yalobil jiñi am bʌ i ye'tel

⁴³ Che' ñumeñix cha'p'ejl q'uiñ, tsa' loq'ui Jesús ya'i, tsa' majli ti Galilea.

⁴⁴ Come Jesús tsi' yʌlʌ ma'añic mi' c'uxbintel x'alt'añ ti' lumal.

⁴⁵ Che' bʌ tsa' tili Jesús ti Galilea, jiñi galileojob tsi' pʌyʌyob ochel, come tsi' q'ueleyob pejtelel i melbal Jesús ti Jerusalén che' woli' q'uiñijel, come tsajñiyob ja'el ti jiñi q'uiñijel.

⁴⁶ Tsa' cha' tili Jesús ti Caná ti Galilea, ya' ba' tsi' pʌntesa ja' ti vino. Ya' ti Capernaúm añ juntiquil wiñic am bʌ i ye'tel ti' tojlel rey, c'am i yalobil jiñi wiñic.

⁴⁷ Che' bʌ tsi' yu'bi loq'uem Jesús ti Judea woli' tilel ti Galilea, tsa' majli ba'añ Jesús, tsi' c'ajtibe ti wocol t'añ cha'añ mi' tilel i c'oq'uesan i yalobil, come yomix chʌmel.

⁴⁸ Jiñi cha'añ Jesús tsi' su'be: —Mi ma'añic mi la' q'uel i yejtal c p'ʌtʌlel, ma'añic mi caj la' ñop, —che'en.

⁴⁹ Jiñi am bʌ i ye'tel cha'añ rey tsi' su'be: —C Yum, conla ti ora ame chʌmic calobil, —che'en.

⁵⁰ Jesús tsi' su'be: —Sujteñix, cha' c'oq'uix a walobil. Jiñi wiñic tsi' ñopbe i t'añ Jesús, tsa' sujti majlel.

⁵¹ Che' woli ti sujtel, tsa' tili i tajob i wiñicob ti bij, tsi' su'beyob: —C'oq'uix a walobil.

⁵² Jiñi am bʌ i ye'tel tsi' c'ajtibeyob baqui ora tsa' caji ti c'oc'an. Tsi' su'beyob: —Ac'bi che' ts'ita' ñumen ti xinq'uiñil, tsa' lajmi jiñi c'ajc.

⁵³ Tsa' caji i ña'tan i tat cha'añ tsa' c'oc'a i yalobil ti jiñi jach bʌ ora che' bʌ tsi' su'be Jesús: “Cuxul a walobil”. Tsi' ñopo Jesús jiñi wiñic yic'ot pejtelel año' bʌ ti' yotot.

⁵⁴ Jiñʌch i cha'yajlel i yejtal i p'ʌtʌlel Jesús tsa' bʌ i pʌsʌ ti Galilea che' loq'uemix ti Judea.