Juan 21 - Jiñi Tsiji' bʌ Wen T'añ cha'añ Estudio

Jesús tsi' pʌsʌ i bʌ ti' wut wuctiquil xcʌnt'añob

¹ Ti wi'il Jesús tsi' cha' pʌsʌ i bʌ ti' wut xcʌnt'añob i cha'añ ti ti' mar am bʌ ti Tiberias; tsi' pʌsʌ i bʌ bajche' iliyi:

² Temel ya'añob Simón Pedro yic'ot Tomás, jiñi mu' bʌ i pejcʌntel ti xloj, yic'ot Natanael, jiñi ch'oyol bʌ ti Caná ya' ti Galilea, yic'ot i yalobilob Zebedeo yic'ot yam bʌ cha'tiquil xcʌnt'añob i cha'añ.

³ Simón tsi' su'beyob: —Samiyon ti chuc chʌy, —che'en. I pi'ʌlob tsi' su'beyob: —Mic majlel lojon quic'otet ja'el, —che'ob. Che' jiñi, tsa' majliyob, tsa' ochiyob ti barco, pero ti jiñi ac'ʌlel ma'añic chuqui tsi' chucuyob.

⁴ Che' wolix i sʌc'an majlel, tsa' wa'le Jesús ti ti' ja', jiñi xcʌnt'añob mach yujilobic mi jiñʌch Jesús.

⁵ Jesús tsi' su'beyob: —Calobilob, ¿am ba chuqui mi laj c'ux? Tsi' jac'beyob: —Ma'añic.

⁶ Jesús tsi' su'beyob: —Chocola ochel la' chimo' chʌy ti la' ñoj ti' ts'ejtʌlel barco ya'i mi caj la' taj. Che' jiñi tsi' chocoyob ochel, ti wi'il ma'añix tsa' mejli i cha' chucob loq'uel, cha'añ ti' caj wen ca'bʌl jiñi chʌy.

⁷ Jiñi xcʌnt'añ c'uxbibil bʌ i cha'añ Jesús, tsi' su'be Pedro: —¡Jiñʌch lac Yum! Che' bʌ tsi' yu'bi Simón Pedro cha'añ jiñʌch lac Yum, tsi' lʌpʌ i bujc, come jochol i cha'añ, tsi' choco ochel i bʌ ti mar.

⁸ Yam bʌ xcʌnt'añob tsa' tiliyob ti barco, come mach ñajtic añob ti ti' mar, tic'ʌl añ jach uxc'al ti jajl, woli' tujc'añob tilel jiñi chimo' chʌy but'ul bʌ ti chʌy.

⁹ Che' bʌ tsa' c'otiyob ti ti' mar, tsi' q'ueleyob xic'bilix c'ajc, ya' c'ʌcʌl chʌy yic'ot waj.

¹⁰ Jesús tsi' su'beyob: —Ch'ʌmʌla tilel lamital jiñi chʌy tsa' bʌ ujti la' chuc, —che'en.

¹¹ Tsa' ochi ti barco Simón Pedro, tsi' tujc'a loq'uel chimo' chʌy ti ti' mar, but'ul jiñi chimo' chʌy ti colem chʌy tac, añ che' bajche' uxlujuncojt i waxʌcc'al (153); anquese wen oñ, ma'añic tsa' ts'ojqui jiñi chimo' chʌy.

¹² Jesús tsi' su'beyob: —La' la, c'uxula waj. Ma'añic mi' juntiquilic xcʌnt'añ tsa' bʌ i c'ajtibe: “Ixcu jatet ¿majquiyet?” Come yujilob jiñʌch lac Yum.

¹³ Tsa' tili Jesús, tsi' ch'ʌmʌ waj tsi' yʌq'ueyob, che' ja'el tsi' yʌq'ueyob jiñi chʌy.

¹⁴ Jiñʌch i yuxyajlel tsi' pʌsʌ i bʌ Jesús ti' tojlel xcʌnt'añob i cha'añ che' ba' ora ch'ojyemix loq'uel ba'añ chʌmeño' bʌ.

Buc'san c tʌñʌme'

¹⁵ Che' bʌ tsa' ujtiyob ti c'ux waj, Jesús tsi' su'be Simón Pedro: —Simón, i yalobilet bʌ Jonás, ¿ñumen c'ux ba ma' wu'biñon bajche' jiñi? —Che'en. Pedro tsi' su'be: —Ñumen cu, c Yum, awujil mij c'uxbiñet. Jesús tsi' su'be: —Aq'uen i buc'bal calʌ tʌñʌme'.

¹⁶ Jesús tsi' cha' c'ajtibe Simón ti' cha'yajlel: —Simón, i yalobilet bʌ Jonás, ¿c'ux ba ma' wu'biñon? Pedro tsi' jac'be: —C'ux cu, c Yum; awujil mij c'uxbiñet. Tsi' cha' su'be: —Cʌntan c tʌñʌme'.

¹⁷ Jesús tsi' cha' c'ajtibe ti' yuxyajlel: —Simón, i yalobilet bʌ Jonás, ¿mu' ba a c'uxbiñon? Pedro tsa' caji i mel i pusic'al come tsi' c'ajtibe ti yuxyajlel: “¿Mu' ba a c'uxbiñon?” Tsi' jac'be: —C Yum, jatet laj awujil; awujil mij c'uxbiñet. Jesús tsi' su'be: —Aq'uen i buc'bal c tʌñʌme'.

¹⁸ Isujm, isujm mic su'beñet: Che' bʌ ch'itoñet to, tsa' lʌpʌ a bujc, tsa' majliyet baqui jach awom, pero che' ñoxetix mi caj a sʌts' a c'ʌb, yam bʌ mi caj i lʌpbeñet a bujc, mi caj i pʌyet majlel ba' mach awomic majlel, che'en.

¹⁹ Jesús tsi' su'be jiñi t'añ cha'añ mi' ch'ʌmben isujm bajche' mi caj i pʌs i ñuclel Dios che' ba ora mi' chʌmel. Che' tsa'ix i su'be jiñi t'añ, Jesús tsi' cha' su'be: —Tsajcañon, —che'en.

Jiñi c'uxbibil bʌ xcʌnt'añ

²⁰ Tsi' sutq'ui i bʌ Pedro, tsi' q'uele woli i tsajcan tilel jiñi xcʌnt'añ c'uxbibil bʌ i cha'añ Jesús tsa' bʌ buchle ti' t'ejl Jesús che' bʌ tsi' c'uxuyob waj ti' jiñi ac'ʌlel, jiñʌch tsa' bʌ i su'be: “C Yum, ¿majqui mi caj i yʌq'uet ti' c'ʌb a contra?” che'en.

²¹ Che' bʌ tsi' q'uele jiñi xcʌnt'añ, Pedro tsi' c'ajtibe Jesús: —C Yum, ¿ixcu jiñi wiñic chuqui mi caj i yujtel ti' tojlel? —Che'en.

²² Jesús tsi' su'be: —Mi com mi' cʌytʌl ili wiñic c'ʌlʌl mic cha' tilel, mach a wentajic, jatet tsajcañon, —che'en.

²³ Ili t'añ tsa' pujqui majlel ti' tojlel hermañujob, cha'añ jiñi xcʌnt'añ ma'añic mi' cajel ti chʌmel. Pero Jesús ma'añic tsi' su'be jiñi xcʌnt'añ cha'añ ma'añic mi' cajel ti chʌmel, tsa' jach i yʌlʌ: “Mi com mi' cʌytʌl c'ʌlʌl mic cha' tilel, mach a wentajic”, che'en.

I YUJTIBAL I T'AÑ ( 21.24-25 )

²⁴ Jiñʌch jiñi xcʌnt'añ woli bʌ i tsictesan pejtelel ili t'añ tac, yic'ot tsi' ts'ijba ti pejtelel; la cujil isujm i t'añ mu' bʌ i su'b.

²⁵ Añ to ca'bʌl chuqui tac tsi' mele Jesús. Che' muq'uic i laj ts'ijbuntel ti' pejtelel i melbal, mi cʌl mach ochic wʌ' ti pañimil pejtelel jiñi juñ tac mu' bʌ i ts'ijbuntel. [Amén.]