Juan 2 - Jiñi Tsiji' bʌ Wen T'añ cha'añ Estudio

Jiñi ñujpuñijel ya' ti Caná

¹ Ti yuxp'ejlel q'uiñ tsi' meleyob q'uiñijel cha'añ ñujpuñijel ya' ti Caná ti Galilea; ya'añ i ña' Jesús.

² Tsa' pʌjyi Jesús ja'el temel yic'ot xcʌnt'añob i cha'añ ba' woli' melob q'uiñijel.

³ Che' bʌ tsa' jili jiñi vino, i ña' Jesús tsi' su'be i yalobil: —Ma'añix i cha'añob vino, —che'en.

⁴ Jesús tsi' su'be: X'ixic, —¿Chuqui i ye'tel ma' tilel ba'añon? Maxto i yorajlelic que'tel. —Che'en.

⁵ I ña' tsi' su'be xñusa vinojob: —Laj melela chuqui mi' su'beñetla, —che'en.

⁶ Ya'añ wʌcp'ejl colem bʌ i yajñib ja' melbil bʌ ti xajlel, come i tilelʌch judíojob mi' c'ʌñob ti pocoñel. Mi' yochel i bʌl cha'p'ejl uxp'ejl uc'um ti jujump'ejl.

⁷ Jesús tsi' su'beyob: —Laj but'ula ti ja' jiñi wʌcp'ejl i yajñib ja'. Tsi' but'uyob jinto che' laj pampaña tsa' cʌle.

⁸ Jiñi cha'añ tsi' su'beyob: —Luchula ts'ita', ch'ʌmbenla majlel jiñi am bʌ ti' wenta jiñi q'uiñijel cha'añ mi' ts'ita' jap.

⁹ Jiñi am bʌ ti' wenta jiñi q'uiñijel tsi' mits'ti'a jiñi ja' tsa' bʌ pʌntʌyi ti vino, che' mach yujilic baqui tilem; cojach jiñi xñusa vinojob yujilob, come jiñobʌch tsi' luchuyob jiñi ja'. Jiñi am bʌ ti' wenta jiñi q'uiñijel tsi' pʌyʌ tilel jiñi wiñic woli bʌ ti ñujpuñijel.

¹⁰ Tsi' su'be: —Pejtelel wiñicob mi' yʌc'ob wen bʌ vino ti ñaxan, ti wi'il che' ñajobix xq'uiñijelob, mi' yʌc'ob jiñi mach bʌ wen sumuquix. Pero jatet mach che'ic tsa' mele, tsa' loto jiñi wen bʌ; woli to a wʌc' ti wi'il, —che'en.

¹¹ Jesús tsi' mele jiñi ñaxan bʌ i yejtal i p'ʌtʌlel ya' ti Caná ti Galilea, tsi' pʌsʌ i ñuclel; jiñi xcʌnt'añob i cha'añ tsi' ñopoyob Jesús.

¹² Ti wi'il tsa' ju'bi majlel Jesús ti Capernaúm temel yic'ot i ña' yic'ot i yijts'iñob yic'ot xcʌnt'añob i cha'añ. Ya' tsa' jijliyob cha'p'ejl uxp'ejl q'uiñ.

Jesús tsi' sʌc-esa jiñi templo

¹³ Lʌc'ʌlix i q'uiñilel Pascua mu' bʌ i melob judíojob; Jesús tsa' letsi majlel ti Jerusalén,

¹⁴ ya'i tsi' tajayob xq'uex taq'uiñob yic'ot xchoñoñelob buchulob ya' ti Templo. Woli' choñob i tat wacax tac yic'ot tʌñʌme' tac yic'ot x'ujcuts tac.

¹⁵ Che' bʌ tsa' ujti i pʌculan lazo cha'añ asiyal, Jesús tsi' chocoyob loq'uel ti Templo ti pejtelelob yic'ot tʌñʌme' tac yic'ot jiñi tat wacax tac. Tsi' wejch'ubeyob i taq'uiñ xq'uex taq'uiñob. Tsi' ch'a' chocbeyob i mesa tac.

¹⁶ Jesús tsi' su'be jiñi woli bʌ i choñob x'ujcuts: —Ch'ʌmʌla loq'uel pejtelel iliyi; mach mi la' sutq'uin ti choñoñibʌl i yotot c Tat, —che'en.

¹⁷ Jiñi xcʌnt'añob i cha'añ tsi' ña'tayob jiñi ts'ijbubil bʌ mu' bʌ i yʌl: “Mi caj c jisʌntel cha'añ c bʌxlel ti a wotot”.

¹⁸ Jiñi judíojob tsi' c'ajtibeyob: —¿Chuqui i yejtal a p'ʌtʌlel mu' bʌ caj a pʌsbeñon lojon cha'añ jiñi e'tel woli bʌ a mel?

¹⁹ Jesús tsi' jac'beyob, tsi' yʌlʌ: —Jemela jiñi templo, ti yuxp'ejlel q'uiñ mic cha' wa'chocon. —che'en.

²⁰ Jiñi judíojob tsi' yʌlʌyob: —Ti wʌcp'ejl i yuxc'al (46) ja'b tsa' mejli jiñi Templo, ixcu jatet ¿mu' ba caj i mejlel a cha' wa'chocon ti uxp'ejl q'uiñ?

²¹ Jesús tsi' laji i bʌc'tal che' bajche' Templo.

²² Jiñi cha'añ che' bʌ tsa' tejchi ch'ojyel Jesús ba'añ chʌmeño' bʌ, jiñi xcʌnt'añob i cha'añ tsi' ña'tayob jiñi t'añ tsa' bʌ i yʌlʌ Jesús. Tsi' ñopoyob i Ts'ijbujel Dios yic'ot i t'añ Jesús tsa' bʌ i yʌlʌ.

Yujil Jesús chuqui añ ti' pusic'al wiñicob x'ixicob

²³ Che' ya'añ Jesús ti Jerusalén ti' q'uiñilel Pascua, ca'bʌl wiñicob x'ixicob tsi' ñopbeyob i c'aba' che' bʌ tsi' q'ueleyob i yejtal i p'ʌtʌlel tsa' bʌ i pʌsʌ.

²⁴ Jesús ma'añic tsi' ñopo chuqui tsi' yʌlʌyob wiñicob x'ixicob, come tsi' laj cʌmbeyob i pusic'al.

²⁵ Mach wersajic mi' su'bentel Jesús chuqui añ ti' pusic'al wiñicob x'ixicob, come yujilʌch.