Juan 14 - Jiñi Tsiji' bʌ Wen T'añ cha'añ Estudio

Jesús i bijlel Panchan ba'añ i Tat

¹ Mach mi la' mel la' pusic'al; mi la' ñop Dios, ñopoyonla ja'el.

² Ti' yotot c Tat añ ca'bʌl chumlibʌl; che' machic jax añ chumlibʌl, tic'ʌl tsa' c su'beyetla; mux c majlel c chajpʌbeñetla la' wajñib.

³ Mi tsa'ix majli c chajpan la' wajñib, cha' talon c pʌyetla majlel, cha'añ ya' ba'añon, ya'añetla ja'el.

⁴ La' wujil baqui mic majlel. Cʌñʌl la' cha'añ i bijlel, che'en.

⁵ Tomás tsi' su'be: —C Yum, mach cujilic lojon baqui ma' majlel. ¿Bajche' mi mejlel j cʌn lojon i bijlel? —Che'en.

⁶ Jesús tsi' su'be: —Joñon i bijlelon, isujmlelon, i cuxtʌlelon, ma'añic majqui mi' c'otel ba'añ c Tat, jiñi jach am bʌ tic wenta.

⁷ Che' muq'uic la' cʌñon, mi' mejlel la' cʌn c Tat ja'el, wʌle cʌñʌlix la' cha'añ come tsa'ix la' q'uele, che'en.

⁸ Felipe tsi' su'be: —C Yum, pʌsbeñon lojon a Tat, jasʌl mi tsa' pʌsʌ, —che'en.

⁹ Jesús tsi' su'be: —Ca'bʌlix ora wʌ'añon la' wic'ot. ¿Mach ba añic tsa' cʌñʌyon, Felipe? Jiñi tsa' bʌ i q'ueleyon, tsa'ix i q'uele c Tat. ¿Chucoch ma' wʌl, che' jiñi: “Pʌsbeñon lojon a Tat”?

¹⁰ ¿Mach ba añic ma' ñop añon tic Tat, jiñi c Tat añ ti joñon? Jiñi t'añ mu' bʌ c su'beñetla, ma'añic mic su'b tic bajñelil; jiñʌch c Tat mu' bʌ i yajñel ti joñon, woli bʌ i mel jiñi e'tel quic'ot.

¹¹ Ñopoyon, añon tic Tat, c Tat añ ti joñon. Mi ma'añic mi la' ñop c t'añ, ñopoyon cha'añ que'tel.

¹² Isujm, isujm mic su'beñetla, jiñi mu' bʌ i ñopon, mi caj i mel jiñi e'tel mu' bʌ c mel ja'el, ñumen ñuc mi caj i mel che' bajche' tsa' c mele, come joñon mic majlel ba'añ c Tat.

¹³ Pejtelel chuqui tac mi la' c'ajtiben c Tat tij c'aba', mi caj c mel cha'añ mi' tsictiyel i ñuclel c Tat ti Yalobil.

¹⁴ Mi añ chuqui mi la' c'ajtin tij c'aba', joñon mi caj c mel.

Jiñi Ch'ujul bʌ Espíritu

¹⁵ Mi c'ux mi la' wu'biñon, mi caj la' jac'beñon c mandar.

¹⁶ Joñon mi caj j c'ajtiben c Tat, mi caj i yʌq'ueñetla yam bʌ la' waj Pi'leya, cha'añ mi' yajñel la' wic'ot ti pejtelel ora.

¹⁷ Jiñʌch jiñi Espíritu mu' bʌ i pʌs isujmlel Dios, jiñi i cha'año' bʌ pañimil mach mejlic i yʌq'ueñtelob, come ma'añic mi' q'uelob, ma'añic mi' cʌñob ja'el; pero jatetla mi la' cʌn, come mi' yajñel la' wic'ot, mi caj i yajñel ti la' pusic'al.

¹⁸ Ma'añic mi caj j cʌyetla ti me'ba'; cha' talon ba'añetla.

¹⁹ Ila ti jumuc', ma'añic mi caj i chʌn q'ueloñob jiñi año' bʌ ti pañimil; pero jatetla mi caj la' q'uelon, come cuxulon. Che' ja'el jatetla cuxul mi caj la' wajñel.

²⁰ Ti jim bʌ q'uiñ mi caj la' ña'tan añon tic Tat, jatetla añetla ti joñon, joñon añon ti jatetla.

²¹ Jiñi mu' bʌ i cʌn c mandar yic'ot mu' bʌ i jac', jiñʌch mu' bʌ i c'uxbiñon. Jiñi mu' bʌ i c'uxbiñon, mi caj i c'uxbintel tic Tat, joñon ja'el mi caj j c'uxbin, mi caj cʌq'ueñetla la' wen cʌñon.

²² Jiñi Judas, (mach jiñic Judas Iscariote), tsi' c'ajtibe: —C Yum, ¿bajche' mi caj a wʌq'ueñon lojon c wen cʌñet, che' ma'añic ma' wʌq'ueñob i cʌñet jiñi i cha'año' bʌ pañimil? —Che'en Judas.

²³ Jesús tsi' jac'ʌ, tsi' su'be: —Jiñi mu' bʌ i c'uxbiñon mi caj i jac'beñon c t'añ; mi caj i c'uxbintel tic Tat, mi caj c tilel lojon ba'añ, che' ja'el mi caj c cha'len lojon chumtʌl yic'ot.

²⁴ Jiñi mach bʌ añic mi' c'uxbiñon, ma'añic mi' jac'beñon c t'añ; jiñi t'añ tsa' bʌ la' wu'bi mach c cha'añic, i t'añʌch c Tat tsa' bʌ i chocoyon tilel.

²⁵ Tsa' c su'beyetla jiñi t'añ che' wʌ' to añon la' wic'ot.

²⁶ Jiñi la' waj Pi'leya, jiñʌch Ch'ujul bʌ Espíritu, mu' bʌ caj i chocbeñetla tilel c Tat ti j c'aba', jiñi mi caj i cʌntesañetla pejtelel chuqui tac añ, mi caj i yʌq'ueñetla la' cha' ña'tan pejtelel chuqui tsa' c su'beyetla.

²⁷ Mi cʌq'ueñetla i ñʌch'tʌlel la' pusic'al, tilem bʌ ti joñon, mach lajalic bajche' mi la' taj ti pañimil. Mach mi la' mel la' pusic'al. Mach la' cha'len bʌq'uen.

²⁸ Tsa'ix la' wu'bi chuqui tsa' c su'beyetla: “Mic majlel, pero mic cha' tilel ba'añetla”. Che' muq'uic la' c'uxbiñon, tijicña la' pusic'al cha'añ tsa' c su'beyetla mic majlel ba'añ c Tat, come ñumen ñuc c Tat bajche' joñon.

²⁹ Wʌle tsa'ix c su'beyetla che' maxto añic tsa' ujti, cha'añ mi la' ñopon ba' ora mi' yujtel.

³⁰ Mach ca'bʌlix mic caj chʌn c pejcañetla, come tal i yum pañimil, pero ma'añic i p'ʌtʌlel tic tojlel.

³¹ Pero cha'añ mi' cʌn pejtelel pañimil c'ux mi cu'bin c Tat, mic jac' che' bajche' tsi' yʌq'ueyon i mandar. Che'ʌch mic mel. ¡Ch'ojyeñixla, coñixla ti' loq'uel ilayi!