Hechos 9 - Jiñi Tsiji' bʌ Wen T'añ cha'añ Estudio

Saulo tsi' ñopo lac Yum

¹ Saulo, woli to ti a'leya ti' contra pejtelel xcʌnt'añob i cha'añ lac Yum, yom i tsʌnsañob, tsa' tili ba'añ ñuc bʌ motomaj,

² tsi' c'ajtibeyob juñ cha'añ mi' pʌs ti sinagoga tac ya' ti Damasco. Jiñi juñ tsi' yʌq'ue i ye'tel cha'añ mi añ wiñicob x'ixicob woli bʌ i tsajcʌbeñob i bijlel Cristo, cʌchbil mi' pʌyob majlel ti Jerusalén.

³ Pero che' woli i majlel ti bij, che' yomix c'otel ti Damasco, ti orajach tsa' tili wen sʌsʌc bʌ c'ajc ch'oyol bʌ ti panchan tsi' pʌsʌ i sʌclel ti' joytʌlel Saulo;

⁴ che' jiñi tsa' yajli ti lum, tsi' yu'bi t'añ tsa' bʌ i su'be: —Saulo, Saulo, ¿chucoch ma' tic'lañon? —Che'en.

⁵ Saulo tsi' yʌlʌ: —¿Majquiyet c Yum? —Che'en. Tsi' su'be: —Joñon Jesús woli bʌ a tic'lan. Wen wocol ma' wu'bin che' ma' lʌp t'uchtan jay bʌ i ñi' te'.

⁶ Saulo, tsiltsilña ti bʌq'uen, tsi' su'be: —C Yum, ¿chuqui awom mic mel? —Che'en. Lac Yum tsi' su'be: —Ch'ojyen, ochen ti tejclum, ya'i mi caj a su'bentel chuqui yom ma' mel.

⁷ Jiñi wiñicob woli bʌ i cha'leñob xʌmbal yic'ot Saulo ñʌch'ʌl tsa' cʌleyob cha'añ bʌq'uen, come isujm tsi' yu'biyob t'añ, pero ma'añic tsi' q'ueleyob majqui woli ti t'añ.

⁸ Che' jiñi Saulo tsa' ch'ojyi ti lum, tsi' caña i wut, pero ma'añic majqui tsi' q'uele; jiñi cha'añ i pi'ʌlob tsi' chucuyob majlel ti' c'ʌb, tsi' pʌyʌyob majlel ti Damasco.

⁹ Uxp'ejl q'uiñ tsa' cʌle ti xpots', ma'añic chuqui tsi' c'uxu, mi añic chuqui tsi' japʌ.

¹⁰ Ya'añ juntiquil xcʌnt'añ ti Damasco i c'aba' Ananías. Tsi' pʌsbe i bʌ lac Yum ti' ñajal. Lac Yum tsi' pejca: —Ananías, —che'en. Che' jiñi tsi' jac'ʌ: —Umba'añon c Yum.

¹¹ Lac Yum tsi' su'be: —Ch'ojyen, cucu ti calle i c'aba' Toj bʌ, sajcan juntiquil wiñic ya' ti yotot Judas i c'aba' Saulo ch'oyol bʌ ti Tarso, come woli' i pejcan Dios.

¹² Tsa'ix i q'uele ti' ñajal Saulo, juntiquil wiñic i c'aba' Ananías. Tsi' q'uele tsi' yʌc'ʌ i c'ʌb ti' jol cha'añ mi' cha' c'otel i wut, che'en.

¹³ Jiñi cha'añ Ananías tsi' jac'ʌ: —C Yum, ca'bʌl tsa' cu'bi t'añ cha'añ jiñi wiñic wen jontol tsi' mele ti' contra a cha'año' bʌ ya' ti Jerusalén;

¹⁴ yic'ot añ i ye'tel ilayi aq'uebil bʌ i cha'añ jiñi ñuc bʌ motomajob cha'añ mi' cʌch pejtelel mu' bʌ i pejcañob a c'aba', che'en Ananías.

¹⁵ Lac Yum tsi' cha' su'be: —Cucu, come yajcʌbilix c cha'añ jiñi wiñic cha'añ mi' su'b majlel j c'aba' ti' tojlel gentilob yic'ot reyob yic'ot israelob.

¹⁶ Come mi caj c pʌsben bajche' c'amel mi caj i yu'bin wocol cha'añ tij c'aba', che'en.

¹⁷ Che' jiñi tsa' majli Ananías, tsa' ochi ti otot ba'añ Saulo, tsi' yʌc'ʌ i c'ʌb ti' jol, tsi' yʌlʌ: —Hermano Saulo, jiñi lac Yum Jesús tsa' bʌ tsictiyi ti bij che' bʌ tsa' tiliyet ti Damasco, tsi' chocoyon tilel cha'añ mi' cha' c'otel a wut, cha'añ ma' bujt'el ti Ch'ujul bʌ Espíritu, —che'en.

¹⁸ Ti orajach che' bajche' i sujl chʌy tsa' c'ajli loq'uel ti' wut, che' jiñi tsa'ix cha' c'oti i wut. Tsa' ch'ojyi Saulo, tsi' ch'ʌmʌ ja'.

¹⁹ Che' ujtemix pejtelel iliyi, tsi' cha'le we'el, tsi' cha' taja i p'ʌtʌlel, tsa' to cʌle cha'p'ejl uxp'ejl q'uiñ Saulo yic'ot jiñi xñopt'añob año' bʌ ti Damasco.

Saulo tsi' cha'le subt'añ ti Damasco

²⁰ Ti jiñi jach bʌ ora tsa' caji ti su'b t'añ cha'añ Cristo ti sinagoga tac. Tsi' yʌlʌ: I Yalobilʌch Dios jiñi Cristo, che'en.

²¹ Che' jiñi tsa' toj sajtiyob i pusic'al pejtelel tsa' bʌ i yu'biyob. Tsi' yʌlʌyob: —¿Mach ba jiñic jiñi tsa' bʌ i tic'la jiñi mu' bʌ i pejcʌbeñob i c'aba' Cristo ya' ti Jerusalén? Jiñi cha'añ tsa' tili ilayi cha'añ cʌchbil mi' pʌyob majlel ti' tojlel ñuc bʌ motomajob.

²² Pero Saulo ñumen ca'bʌl tsa' p'ojli i p'ʌtʌlel, ma'añic chuqui tsa' mejli i yʌlob jiñi judíojob chumulo' bʌ ti Damasco, come Saulo tsi' wen tsictesʌbeyob Cristojʌch jiñi Jesús.

Saulo tsa' puts'i ti' tojlel judíojob

²³ Che' bʌ tsa' ñumi ca'bʌl q'uiñ, jiñi judíojob tsi' comol ña'tayob bajche' mi caj i tsʌnsañob Saulo;

²⁴ pero Saulo tsa'ix i yu'bi cha'añ woli' i chijtañob. Ti q'uiñil ti ac'ʌlel woli' pijtañob ya' ti ti' tac tejclum cha'añ mi' tsʌnsañob.

²⁵ Jiñi cha'añ jiñi xñopt'añob tsi' pʌyʌyob majlel ti ac'ʌlel, tsi' ju'sayob ti colem chiquib ti' pat jiñi chañ bʌ ts'ajc.

Saulo ya' ti Jerusalén

²⁶ Che' bʌ tsa' c'oti Saulo ya' ti Jerusalén, tsi' ñopo i tempañob i bʌ yic'ot jiñi xñopt'añob, pero tsi' wen bʌc'ñayob, ma'añic tsi' ñopoyob mi xcʌnt'añix.

²⁷ Jiñi cha'añ Bernabé, tsi' pʌyʌ majlel ba'añ jiñi apóstolob, tsi' su'beyob bajche' Saulo tsi' q'uele lac Yum ya' ti bij, yic'ot che' bajche' tsi' pejca lac Yum, yic'ot ja'el che' ya'añ ti Damasco ch'ejl i pusic'al tsi' cha'le subt'añ ti' c'aba' Jesús, che'en.

²⁸ Jiñi cha'añ Saulo tsi' su'bu i t'añ lac Yum ya' ti Jerusalén, temel tsa' ajñi yic'ot jiñi xcʌnt'añob.

²⁹ Ch'ejl i pusic'al tsi' su'bu jiñi wen t'añ; pero jiñi judíojob yujilo' bʌ t'añ ti griego tsa' caji i contrajiñob ti t'añ, che' ja'el tsi' ña'tayob i tsʌnsan Saulo.

³⁰ Che' bʌ yujilobix jiñi hermañujob, tsi' pʌyʌyob majlel Saulo c'ʌlʌl ti Cesarea, ti wi'il tsi' chocoyob majlel ti Tarso.

³¹ Jiñi cha'añ jiñi xñopt'añob año' bʌ ti pejtelel Judea ti Galilea yic'ot ti Samaria tsa' ñʌjch'i ti tic'lʌntelob, tsa' p'ʌt-ayob, tsi' chʌn bʌc'ñayob lac Yum. Ca'bʌl tsa' p'ojliyob come añob i p'ʌt-esʌntel ti Ch'ujul bʌ Espíritu.

Pedro tsi' lajmesa Eneas

³² Che' bʌ tsa' ñumi majlel Pedro ti pejtelel tejclum tac, tsa' c'oti i jula'tan i cha'año' bʌ lac Yum ya' bʌ chumulob ti Lida.

³³ Ya' tsi' taja juntiquil wiñic, i c'aba' Eneas, añix waxʌcp'ejl ja'b añ ti c'am-ʌjel, ma'añic tsa' wis mejli ti ch'ojyel ti' wʌyib, come mach weñic i yoc i c'ʌb.

³⁴ Pedro tsi' su'be: —Eneas, Jesucristo woli' lajmesañet. Ch'ojyen, teche a wʌyib. Ti orajach tsa' ch'ojyi.

³⁵ Che' bʌ tsi' q'ueleyob jiñi ñuc bʌ i yejtal i p'ʌtʌlel lac Yum jiñi ya' bʌ chumulob ti Lida yic'ot ti Sarón tsi' sutq'uiyob i bʌ cha'añ mi' ñopob lac Yum.

Pedro tsi' teche ch'ojyel Dorcas

³⁶ Ya' ti Jope añ juntiquil xñopt'añ i c'aba' Tabita, (ti' t'añ griego jiñʌch Dorcas), jiñi x'ixic bʌxatax ti wen bʌ i ye'tel lac Yum, tsi' wen colta jiñi p'ump'uño' bʌ ti' chu'bʌañ.

³⁷ Ti jiñi jach bʌ semana tsa' c'am-a, tsa' chʌmi. Che' bʌ tsa'ix ujti i pocob, tsi' yʌc'ʌyob ti' junlajm i mal otot.

³⁸ Come Lida lʌc'ʌl añ ti Jope; che' bʌ tsi' yu'biyob jiñi xñopt'añob cha'añ Pedro ya'añ ti Jope, ti orajach tsi' chocoyob majlel cha'tiquil wiñicob ba'añ, tsi' su'beyob ti wocol t'añ: Mach ma' chʌn jalijel ilayi, la' ti ora ba'añon lojon.

³⁹ Jiñi cha'añ Pedro tsa' ch'ojyi, tsa' majli ti Jope yic'otob, che' bʌ tsa' c'oti, tsi' pʌyʌyob ochel ba'añ i bʌc'tal Tabita. Ca'bʌl me'ba' x'ixicob tsa' tiliyob ti' joytʌlel Pedro, woliyob ti uq'uel, tsi' pʌsbeyob ca'bʌl tsuts bujcʌl yic'ot pʌl bʌ bujcʌl tsa' bʌ i mele Dorcas che' cuxul to.

⁴⁰ Jiñi cha'añ Pedro tsi' su'beyob loq'uel ti pejtelelob, tsa' ñocle, tsi' pejca Dios, ti wi'il tsi' sutq'ui i bʌ cha'añ mi' q'uelben i bʌc'tal Tabita, tsi' su'be: Tabita, ch'ojyen. Tsa' cajñi i wut Tabita. Che' bʌ tsi' q'uele Pedro, tsa' buchle.

⁴¹ Pedro tsi' yʌq'ue i c'ʌb tsi' teche ch'ojyel, che' jiñi tsi' pʌyʌyob ochel i cha'año' bʌ lac Yum yic'ot jiñi me'ba' x'ixicob, cha'añ mi' pʌsbeñob cha' cuxulix Dorcas.

⁴² Pejtelel jiñi año' bʌ ti Jope tsi' yu'biyob chuqui ñuc tac tsa' ujti, ca'bʌl tsi' ñopoyob lac Yum.

⁴³ Ya' to tsa' jal-a Pedro ti Jope ya' ti yotot Simón, jiñi xts'aj pʌchi. Mach wen tsiquilic chuqui ti ja'bil tsi' yila pañimil yic'ot chuqui ti ja'bil tsa' chʌmi Pablo. Pero ti Hechos yic'ot ti' carta tac jiñi Pablo mi' pʌsbeñonla bajche' yilal i cuxtʌlel: 10 d.C. Tsi' yila pañimil ti Tarso ya' ti Cilicia (;q'uele) 33 d.C. Tsi' q'uele tsa' chʌmi Esteban (). Tsi' ts'a'le xñopt'añob ti Judea (; ). 35 d.C. Tsi' ñopo Jesús che' woli i majlel ti Damasco (; ; ;q'uele; ; ). 35-38 d.C. Tsa' ajñi ti Arabia yic'ot ti Damasco (; ; ). 38 d.C. Tsa' ajñi cha'p'ejl semana yic'ot Pedro yic'ot Santiago ti Jerusalén, (; ). 38-43 d.C. Tsa' ajñi ti Siria yic'ot ti Cilicia (; ) yic'ot jump'ejl ja'b ti Antioquía (). 43 ó 44 d.C. Tsi' ch'ʌmʌ majlel ofrenda cha'añ i coltʌntel jiñi woli bʌ i yu'biñob wi'ñal ti Jerusalén (; ). 46-48 d.C. Che' tsa' ñaxan ñumi ti subt'añ Pablo (). 48 ó 49 d.C. Tsi' tempayob i bʌ ti Jerusalén (; ). ? Tsi' yʌ'leyob i bʌ yic'ot Pedro ti Antioquía (; ). 50-52 d.C. I cha'yajlel tsa' ñumi ti subt'añ (). 1 Tesalonicenses (ti Corinto; Hch 18.1-18). 2 Tesalonicenses (ti Corinto). 53 d.C. Gálatas. 53-57 d.C. I yuxyajlel tsa' ñumi ti subt'añ (). 55 d.C. 1 Corintios (ti Éfeso). 2 Corintios (ti Macedonia). 57 d.C. Romanos (ti Cencrea o ti Corinto). Tsa' ñujp'i ti Jerusalén (). 57-59 d.C. Che' ñup'bil ti Cesarea (). 59 d.C. Tsa' majli ti Roma (). 59-61 d.C. Che' ya'añ ti Roma tsa' ajñi cha'p'ejl ja'b ti mʌjquibʌl (). Efesios. Colosenses. Filipenses. Filemón. 62 d.C. Tsa' loc'sʌnti ti mʌjquibʌl. 62-66 d.C. Tsa' ñumi ti subt'añ. 1 Timoteo. Tito. 66-67 d.C. Tsa' mʌjqui ti Roma. 2 Timoteo. 67 d.C. Tsa' chʌmi ti Roma. Eusebio, jiñʌch tsa' bʌ i ts'ijbu che' bajche' añ i cuxtʌlel xñopt'añob che' ti siglo 4 che' tilemix Cristo. Tsi' ts'ijbu cha'añ Pablo tsa' chʌmi che' woli i mel i ye'tel jiñi emperador Nerón ti Roma (54-68 che' tilemix Cristo). Tertuliano, tsa' bʌ i tsajcʌbe i cʌntesa apóstolob che' ti ja'bil 300 che' tilemix Cristo, tsi' yʌlʌ cha'añ Pablo tsi' tsepbeyob i bic' ya' ti ti' jiñi colem ja' i c'aba' Tíber, am bʌ i ñajtlel che' bajche' 5 km. ti Roma, yic'ot mi' yʌl cha'añ tsa' mujqui ba' mi' mujquel xchʌmelob i c'aba' Vía Ostia, lʌc'ʌl añ ti Roma.