Hechos 8 - Jiñi Tsiji' bʌ Wen T'añ cha'añ Estudio

¹ Saulo uts'at tsi' q'uele che' bʌ woli i tsʌnsañob Esteban. Ti jim bʌ ora tsa' tejchi ca'bʌl i tic'lʌntel jiñi xñopt'añob tsa' bʌ i tempayob i bʌ ti Jerusalén. Ti' pejtelelob tsa' pam pujquiyob majlel ti Judea yic'ot ti Samaria, cojach jiñi apóstolob ma'añic tsa' pujquiyob.

Saulo tsi' tic'la xñopt'añob

² Jiñi wiñicob mu' bʌ i wen c'uxbiñob Dios tsi' q'uecheyob majlel i bʌc'tal Esteban cha'añ mi' mucob, tsi' wen uc'tayob.

³ Saulo, tsi' chʌn tic'la jiñi xñopt'añob; tsa' ochi ti jujump'ejl otot, tsi' jexpa loq'uel wiñicob x'ixicob cha'añ mi' yotsañob ti mʌjquibʌl.

2. TSA' SUJBI JIÑI WEN T'AÑ TI SAMARIA YIC'OT TI JUDEA ( 8.4—9.43 ) Tsa' sujbi jiñi wen t'añ ti Samaria

⁴ Pero jiñi tsa' bʌ loq'uiyob ti Jerusalén, tsi' chʌn su'buyob majlel jiñi wen t'añ, baqui jach tsa' majliyob.

⁵ Jiñi cha'añ Felipe tsa' ju'bi majlel ti tejclum i c'aba' Samaria, ya'i tsi' su'bu i t'añ Cristo.

⁶ Bajc'ʌl wiñicob x'ixicob ti jump'ejlob jach i pusic'al tsi' tempayob i bʌ cha'añ mi' ñʌch'tʌbeñob i t'añ Felipe, che' bʌ tsi' yu'bibeyob i t'añ yic'ot che' bʌ tsi' q'ueleyob i yejtal i p'ʌtʌlel Dios tsa' bʌ i pʌsʌ,

⁷ ca'bʌl wiñicob x'ixicob tsa' loq'uiyob i xi'bʌjlel. Jiñi xi'bajob c'am tsi' cha'leyob t'añ che' bʌ tsa' loq'uiyob, yic'ot ca'bʌl tsa' lajmesʌntiyob jiñi mach bʌ weñobic i yoc i c'ʌb;

⁸ ti' pejtelel jiñi año' bʌ ya' ti tejclum wen tijicñayob jax.

⁹ Pero añ juntiquil wiñic i c'aba' Simón tsa' bʌ i cha'le wujt ti yam bʌ ora, ca'bʌl tsi' lotiyob wiñicob x'ixicob ya' ti tejclum i c'aba' Samaria, tsi' su'bu i bʌ ti ñuc.

¹⁰ Ti pejtelelob tsi' wen u'bibeyob i t'añ, jiñi ch'och'oco' bʌ yic'ot jiñi ñuco' bʌ, tsi' yʌlʌyob: Jiñʌch jiñi ñuc bʌ i p'ʌtʌlel Dios.

¹¹ Tsi' wen jac'beyob come c'ʌlʌl ti wajali tsi' lotiyob cha'añ leco tac bʌ i melbal.

¹² Pero che' bʌ tsi' ñopbeyob i t'añ Felipe cha'añ woli i su'b jiñi wen t'añ cha'añ i yumʌntel Dios ti' c'aba' Jesucristo, ca'bʌl wiñicob x'ixicob tsi' ch'ʌmʌyob ja'.

¹³ Che' ja'el Simón tsi' ñopo Dios, che' bʌ tsa'ix i ch'ʌmʌ ja', tsa' cʌle yic'ot Felipe, che' bʌ tsi' q'uele i yejtal i p'ʌtʌlel yic'ot jiñi ñuc tac bʌ i melbal tsa' bʌ i mele Felipe, tsa' toj sajti i pusic'al.

¹⁴ Che' bʌ ya'añob ti Jerusalén jiñi apóstolob, tsi' yu'biyob cha'añ wolix i ñopob i t'añ Dios ya' ti Samaria, che' jiñi tsi' chocoyob majlel Pedro yic'ot Juan.

¹⁵ Che' bʌ tsa' c'otiyob ti Samaria, tsi' c'ajtibeyob Dios ti oración cha'añ mi' yʌq'ueñtelob Ch'ujul bʌ Espíritu jiñi wiñicob x'ixicob,

¹⁶ come maxto añic tsa' aq'uentiyob Ch'ujul bʌ Espíritu jiñi año' bʌ ti Samaria, cojax to tsi' ch'ʌmʌyob ja' ti' c'aba' Jesús.

¹⁷ Pedro yic'ot Juan tsi' yʌc'ʌyob i c'ʌb ti' jol jujuntiquil, che' jiñi tsa' aq'uentiyob jiñi Ch'ujul bʌ Espíritu.

¹⁸ Che' bʌ tsi' q'uele Simón woli i yʌq'ueñtelob jiñi Ch'ujul bʌ Espíritu che' bʌ tsi' yʌc'ʌyob i c'ʌb jiñi apóstolob, che' jiñi, Simón tsi' pʌsbeyob taq'uiñ,

¹⁹ tsi' su'beyob: —Aq'ueñon ja'el a p'ʌtʌlel cha'añ mi cʌq'ueñob Ch'ujul bʌ Espíritu majqui jach com che' mi cʌc' j c'ʌb ti' jol, —che'en.

²⁰ Che' jiñi Pedro tsi' su'be: —La' jilic a taq'uiñ a wic'ot, come wola' lon ña'tan ti a pusic'al mi mejlel a mʌn ti taq'uiñ a majtañ ch'oyol bʌ ti Dios.

²¹ Mach ochemetic quic'ot lojon ti jiñi e'tel, mach a cha'añic, come mach tojic a pusic'al ti' wut Dios.

²² Cʌyʌ a jontolil, c'ajtiben Dios cha'añ mi' ñusʌbeñet jiñi tsa' bʌ a ña'ta ti a pusic'al.

²³ Come mij q'uel but'ulet ti ch'aj bʌ i tsʌytsʌyñʌyel a pusic'al yic'ot chucbilet ti jontolil, che'en Pedro.

²⁴ Simón tsi' jac'ʌ: —C'ajtiben lac Yum cha'añ mi' ñusʌbeñon cha'añ ma'añic mic majlel ti tojmulil che' bajche' tsa' wʌlʌ, —che'en.

²⁵ Pedro yic'ot Juan, che' bʌ tsi' su'buyob i t'añ lac Yum yic'ot chuqui tac tsi' q'ueleyob ti' tojlel lac Yum, tsa' sujtiyob ti Jerusalén, che' ja'el tsi' su'buyob i t'añ lac Yum ti ca'bʌl tejclum tac ya' ti' lum Samaritanojob.

Felipe yic'ot am bʌ i ye'tel ti Etiopía

²⁶ I yÁngel lac Yum tsi' pejca Felipe, tsi' su'be: Ch'ojyen, cucu ti sur ba'añ colem bʌ i tiquiñal pañimil ti' bijlel Gaza mu' bʌ i ju'bel tilel ti Jerusalén, che'en.

²⁷ Che' jiñi tsa' ch'ojyi Felipe, tsa' majli. Awilan, ya' ti bij tsi' taja juntiquil eunuco ch'oyol bʌ ti Etiopía, añ i ye'tel ti tesorero cha'añ jiñi x'ixic bʌ yumʌl ti Etiopía i c'aba' Candace, jiñi tsi' cʌntʌbe pejtelel i chu'bʌañ. Jiñi wiñic tsajñi i ch'ujutesan Dios ti Jerusalén,

²⁸ wolix i cha' sujtel, buchul ti carreta mu' bʌ i tujc'ʌntel majlel, woli' pejcan majlel i juñ jiñi x'alt'añ Isaías.

²⁹ Jiñi Espíritu tsi' su'be Felipe: Cucu ba'añ jiñi carreta, yom ma' majlel yic'ot, che'en.

³⁰ Felipe tsi' lʌc'tesa i bʌ ba'añ jiñi carreta, tsi' yu'bi woli' pejcʌben i juñ jiñi x'alt'añ Isaías, che' jiñi Felipe, tsi' su'be: —¿Mu' ba a ch'ʌmben isujm jiñi juñ woli bʌ a pejcan? —Che'en.

³¹ Jiñi wiñic tsi' yʌlʌ: —¿Bajche' mi mejlel c ch'ʌmben isujm mi ma'añic majqui mi' cʌntesañon? Tsi' c'ajtibe ti wocol t'añ cha'añ mi' letsel Felipe ti buchtʌl yic'ot.

³² Ya' ba' woli' q'uel i Ts'ijbujel Dios mi yʌl: “Tsa' pʌjyi majlel cha'añ mi' chʌmel che' bajche' tʌñʌme', che' bajche' alʌ tat tʌñʌme' ñʌch'ʌl bʌ ti' tojlel jiñi mu' bʌ i tsepben i tsutsel, ma'añic tsi' cha'le t'añ.

³³ Pec' tsi' mele i bʌ, jiñi cha'añ jiñi año' bʌ i ye'tel ma'añic tsi' cha'leyob meloñel ti toj. ¿Majqui mi mejlel i tsicben i yalobilob jiñi wiñic? Come tsa' tsʌnsʌnti ila ti pañimil”. Che'en.

³⁴ Jiñi eunuco tsi' c'ajtibe Felipe: —Awocolic su'beñon, ¿majqui woli i taj ti t'añ jiñi x'alt'añ? ¿Jim ba woli i wʌlʌc taj i bʌ ti t'añ o jim ba yam bʌ wiñic? —Che'en.

³⁵ Jiñi cha'añ Felipe tsa' caji ti t'añ, tsa' caji i su'ben jiñi wen t'añ cha'añ Jesús ts'ijbubil bʌ i cha'añ Isaías.

³⁶ Che' woli' majlelob ti bij, tsa' c'otiyob ba'añ ja'. Jiñi eunuco tsi' yʌlʌ: —Q'uele, wʌ'an ja', ¿am ba chuqui mi' mʌctañon cha'añ mic ch'ʌm ja'? —Che'en.

³⁷ [Felipe tsi' su'be: —Mi wola' ñop ti pejtelel a pusic'al cha'añ Jesús jiñʌch i Yalobil Dios, mi mejlel a ch'ʌm ja', —che'en. Jiñi eunuco tsi' jac'ʌ: —Mic ñop i Yalobilʌch Dios jiñi Jesucristo.]

³⁸ Jiñi eunuco tsi' yʌc'ʌ mandar cha'añ mi' cʌy i xʌmbal jiñi carreta; tsa' ju'bi Felipe yic'ot jiñi eunuco ti ja', che' jiñi tsi' yʌq'ue ch'ʌmja'.

³⁹ Che' bʌ tsa' loq'uiyob ti ja', i yEspíritu lac Yum tsi' jʌm pʌyʌ majlel Felipe. Jiñi eunuco ma'añix tsi' chʌn q'uele, tijicña i pusic'al tsa' majli ti bij.

⁴⁰ Ti wi'il tsa' tajle Felipe ti Azoto; che' bʌ tsa' ñumi majlel tsi' su'bu jiñi wen t'añ ti pejtelel tejclum tac c'ʌlʌl ti Cesarea.