Hechos 7 - Jiñi Tsiji' bʌ Wen T'añ cha'añ Estudio

I subt'añ Esteban

¹ Jiñi ñuc bʌ motomaj tsi' c'ajtibe Esteban: —¿Isujm ba jiñi? —Che'en.

² Esteban tsi' yʌlʌ: —C pi'ʌlob, yic'ot tatʌlob, ñʌch'tanla: Jiñi Dios am bʌ i ñuclel tsa' tsictiyi ti' wut lac tat Abraham che' ya' to añ ti Mesopotamia, che' maxto añic tsa' majli ti chumtʌl ti Harán,

³ Dios tsi' su'be: “Loq'uen ti a lumal ba'añ a pi'ʌlob, cucu ti chumtʌl ti jiñi lum mu' bʌ caj c pʌsbeñet”, che'en.

⁴ Che' jiñi, Abraham tsa' loq'ui ti' lumal caldeojob tsa' majli ti chumtʌl ti Harán. Che' bʌ tsa' chʌmi i tat, Dios tsi' pʌyʌ c'axel ti ili lum wʌ' ba' chumuletla wʌle.

⁵ Anquese Abraham tsa' chumle ilayi, pero Dios ma'añic tsi' yʌq'ue mi ts'ita'ic i yumʌntel ti ili lum, pero tsi' yʌq'ue i t'añ cha'añ mi caj i yʌq'ueñ i lum jiñi i p'olbal anquese maxto añic i yalobil.

⁶ Dios tsi' su'be Abraham: “Mi caj i majlelob ti chumtʌl ti yam bʌ lum jiñi a p'olbal ba' mach i cha'añobic, ba' mi caj i yʌjq'uelob ti majtañ e'tel yic'ot jumbajc' (400) ja'b mi caj i wen tic'lʌntelob”.

⁷ Dios tsi' yʌlʌ: “Pero joñon mi caj cʌq'ueñob i toj i mul jiñi tejclum mu' bʌ caj i c'ʌñetla ti majtañ e'tel, ti wi'il mi caj i loq'uelob tilel a p'olbal, che' jiñi mi caj i ch'ujutesañoñob ti ili lum”, che'en.

⁸ Dios tsi' yʌq'ue Abraham jiñi xuc'ul bʌ t'añ cha'añ tsep pʌchʌlel, jiñi cha'añ che' waxʌcp'ejl jaxto i q'uiñilel Isaac tsi' tsepbe i pʌchʌlel; lajal tsi' mele Isaac, tsi' tsepbe i pʌchʌlel i yalobil i c'aba' Jacob, yic'ot Jacob ti' tojlel jiñi lajchʌntiquil i yalobilob, i ñojte'elob Israel.

⁹ Jiñi la' ñojte'el ñijcʌbilob cha'añ i tsʌytsʌyñʌyel i pusic'al, tsi' choñoyob José cha'añ mi' pʌjyel majlel ti Egipto. Pero Dios ya'añ yic'ot José.

¹⁰ Jiñi cha'añ Dios tsi' colta ti pejtelel i wocol, tsi' yʌq'ue i yutslel yic'ot i ña'tʌbal ti' tojlel jiñi rey faraón ya' ti Egipto, jiñi cha'añ tsi' yʌq'ue i ye'tel ti yumʌl ti' tojlel egiptojob yic'ot ti yotot faraón ja'el.

¹¹ Tsa' caji wi'ñal yic'ot ca'bʌl wocol ti' lumal egiptojob yic'ot ti Canaán. Jiñi lac ñojte'elob ma'añix chuqui tsi' c'uxuyob.

¹² Che' bʌ tsi' yu'bi Jacob añ ca'bʌl trigo ya' ti Egipto, tsi' choco majlel lac ñojte'elob, cojax to tsa' majliyob.

¹³ Che' bʌ tsa' majliyob ti' cha'yajlel, José tsi' yʌc'ʌ i bʌ ti cʌjñel ti' tojlel i yʌscuñob. Che' ja'el José tsi' yʌc'ʌ ti wen cʌjñel i yerañob ti' tojlel faraón.

¹⁴ José tsi' choco majlel i yerañob cha'añ mi' pʌyob tilel i tat i c'aba' Jacob, yic'ot pejtelel i pi'ʌlob, añob jo'lujuntiquil i chʌnc'al.

¹⁵ Che'ʌch tsa' ju'bi majlel Jacob ya' ti Egipto, ya' tsa' chʌmi yic'ot lac ñojte'elob.

¹⁶ Tsa' q'uejchiyob majlel c'ʌlʌl ti Siquem ya'i tsa' mujquiyob ti' pejtelelob ti yotlel ch'ujlelʌl mʌmbil bʌ i cha'añ Abraham ti' tojlel i yalobilob Hamor ya' ti Siquem.

¹⁷ Che' bʌ lʌc'ʌlix i yorajlel mi' ts'ʌctiyel jiñi xuc'ul bʌ i t'añ Dios tsa' bʌ i su'be Abraham, tsa' wen p'ojli jiñi israelob ya' ti Egipto,

¹⁸ jinto tsa' wa'choconti yam bʌ rey ti Egipto mach bʌ i cʌñʌyic José.

¹⁹ Wen jontol ili rey, yic'ot tsi' wen tic'la lac ñojte'elob, tsi' xic'beyob cha'añ mi' cʌyob jiñi alʌl to bʌ alʌlob ti' bajñelil cha'añ mi yʌc'ob ti chʌmel cha'añ mi' jilel i p'olbal Israel.

²⁰ Ti jim bʌ ora, tsi' yila pañimil Moisés, wen uts'atax tsi' q'uele Dios, tsa' tsu'sʌnti uxp'ejl uw ti' tojlel i tat i ña'.

²¹ Che' bʌ tsa' ajq'ui Moisés ya' ti ja' ba' bʌbʌq'uen mi' chʌmel, tsa' tili i yalobil faraón, tsi' loto, tsi' cosa che' bajche' i yalobil.

²² Tsa' wen cʌntesʌnti Moisés ti pejtelel i ña'tʌbal egiptojob, wen ch'ejl ti t'añ yic'ot ti' e'tel.

²³ Che' cha'c'alix i ja'bilel, Moisés tsi' ña'ta ti' pusic'al yom majlel i jula'tan i pi'ʌlob, jiñobʌch i yalobilob Israel.

²⁴ Che' bʌ tsi' q'uele woli' tic'lʌntel juntiquil Israel, Moisés tsi' yotsa i bʌ i coltañ jiñi woli bʌ i tic'lʌntel, tsi' q'uextʌbe i jontolil jiñi Egipto, tsi' tsʌnsa.

²⁵ Come Moisés tsi' lon ña'ta woli' i ch'ʌmbeñob isujm i pi'ʌlob, cha'añ jiñʌch jiñi yajcʌbil bʌ i cha'añ Dios cha'añ mi' coltañob, pero ma'añic tsi' ch'ʌmbeyob isujm.

²⁶ Ti yijc'ʌlal Moisés tsi' q'uele cha'tiquil israelob woliyob ti leto, tsi' ña'ta i lajmesan jiñi leto, tsi' yʌlʌ: “Wiñicob, la' pi'ʌl la' bʌ, ¿chucoch woliyetla ti leto?” Che'en.

²⁷ Pero jiñi woli bʌ i tic'lan i pi'ʌl tsi' tʌjcʌx choco majlel Moisés, tsi' su'be: “¿Majqui tsi' yʌq'ueyet a we'tel ti yumʌl cha'añ ma' melon lojon?

²⁸ ¿Awom ba a tsʌnsañon che' bajche' tsa' tsʌnsa jiñi Egipto ac'bi?” Che'en.

²⁹ Che' bʌ tsi' yu'bi jiñi t'añ, tsa' puts'i majlel Moisés ti ora, tsa' majli ti chumtʌl ti yam bʌ lum i c'aba' Madián, ya'i tsi' yila pañimil cha'tiquil ch'itoñ bʌ i yalobilob.

³⁰ Che' ñumeñix cha'c'al ja'b, tsa' tsictiyi juntiquil ángel ti jochol bʌ lum lʌc'ʌl bʌ ya' ti wits i c'aba' Sinaí, tsa' tsictiyi ti c'ajc woli bʌ ti lejmel ti alʌ te'.

³¹ Che' bʌ tsi' q'uele Moisés, tsa' toj sajti i pusic'al cha'añ jiñi tsa' bʌ i q'uele, pero che' bʌ tsi' lʌc'tesa i bʌ cha'añ mi' q'uel jiñi alʌ te', tsa' tili i t'añ lac Yum ti' tojlel:

³² “Joñon i Dioson a ñojte'el, i Dioson Abraham, i Dioson Isaac, yic'ot i Dioson Jacob”. Che' jiñi Moisés, tsiltsilña jax ti bʌq'uen, mach yomix i chʌn q'uel.

³³ Lac Yum tsi' su'be: “Loc'san a warach ti a woc come ch'ujul jiñi lum ba' wa'alet.

³⁴ Isujm, tsa'ix j q'uele i tic'lʌntel c cha'año' bʌ ya' ti Egipto, tsa'ix cu'bibeyob i yuq'uel, tsa'ix ju'biyon tilel cha'añ mic loc'sañob ti' p'ʌtʌlel egiptojob. Jiñi cha'añ la', mi caj c choquet majlel ti Egipto”, che'en.

³⁵ Jiñi israelob tsi' ts'a'leyob Moisés, tsi' su'beyob: “¿Majqui tsi' yʌq'ueyet a we'tel ti yumʌl yic'ot ti xmeloñel tic tojlel lojon?” Pero Dios tsi' yʌq'ue i ye'tel yic'ot tsi' choco majlel Moisés cha'añ mi' coltañob. Jiñi ángel tsa' bʌ tsictiyi ti' tojlel ti alʌ te' tsi' yʌq'ue i ye'tel ti yumʌl yic'ot ti xcoltaya.

³⁶ Moisés tsi' pʌyʌyob loq'uel i yalobilob Israel che' bʌ tsa' ujti i pʌs bʌbʌq'uen tac bʌ i yejtal i p'ʌtʌlel ya' ti Egipto yic'ot ya' ti Chʌchʌc bʌ Mar yic'ot ti jochol bʌ lum cha'c'al ja'b.

³⁷ Jiñʌch Moisés tsa' bʌ i su'be i yalobilob Israel: “Dios mi caj i wa'chocon juntiquil x'alt'añ che' bajche' joñon loq'uem bʌ ti la' pi'ʌlob, jiñi mi caj la' wu'biben i t'añ”, che'en.

³⁸ Jiñʌch Moisés tsa' bʌ ajñi ba' tempʌbilob ya' ti jochol bʌ lum yic'ot jiñi ángel tsa' bʌ i pejca ya' ti wits i c'aba' Sinaí yic'ot lac ñojte'elob, tsa' aq'uenti jiñi t'añ cha'añ bʌ laj cuxtʌlel cha'añ mi' cha' aq'ueñonla.

³⁹ Pero lac ñojte'elob, ma'añic tsi' jac'ʌyob, tsa' jach i ts'a'leyob, tsi' chʌn ña'tayob i cha' sujtel ti Egipto,

⁴⁰ che' bʌ tsi' su'beyob Aarón: “Mele lac dios tac cha'añ ñaxan mi' majlel ti lac tojlel, come Moisés jiñi tsa' bʌ i loc'sayonla ti' lumal Egipto mach la cujilic chuqui tsa' tumbenti”.

⁴¹ Che' jiñi tsi' meleyob i yejtal alʌ tat wacax, tsi' yʌq'ueyob tsʌnsʌbil bʌ i majtañ, tsi' yu'biyob ca'bʌl i tijicñʌyel i pusic'al cha'añ jiñi i dios tsa' bʌ i meleyob ti' c'ʌb.

⁴² Jiñi cha'añ tsi' ña'ta Dios i cʌyob cha'añ mi' ch'ujutesañob jiñi q'uiñ yic'ot uw yic'ot ec' am bʌ ti panchan; come ts'ijbubil ti' juñ x'alt'añob mu' bʌ i yʌl: “Jatetla israelob, ¿tsa' ba la' tsʌnsʌbeyon la' wʌlac' ti jiñi cha'c'al ja'b che' ya'añetla ti jochol bʌ lum? ¿Tsa' ba la' pulbeyon c majtañ cha'añ mi la' ch'ujutesañon?

⁴³ Tsa'ix la' q'uechbe jiñi pisil bʌ i yotlel Moloc, yic'ot jiñi ec' i yejtal bʌ a dios Refán, tsa' la' mele cha'añ mi la' ch'ujutesan. Jiñi cha'añ joñon mi caj j c'axtesañetla ti junwejlel Babilonia”. Che'en.

⁴⁴ Ya' ti jochol bʌ lum, jiñi lac ñojte'elob añ i cha'añob jiñi Tabernáculo ba' lotol jiñi Mandar, che' bajche' tsi' yʌc'ʌ mandar Dios che' bʌ tsi' su'be Moisés cha'añ mi' melben otot che' bajche' tsa' pʌsbenti.

⁴⁵ Che' bʌ tsa' ujti i ch'ʌmob jiñi pisil bʌ otot, tsi' q'uecheyob ochel ya' ti' lum gentilob tsa' bʌ i chiliyob lac ñojte'el yic'ot Josué, come Dios tsi' choco loq'uel jiñi gentilob ti' tojel i wutob lac ñojte'el c'ʌlʌl ti' yorajlel David.

⁴⁶ Dios tsi' pʌsbe David i yutslel i pusic'al, jiñi cha'añ tsi' c'ajtibe cha'añ yom mi' melben i yotot Dios tsa' bʌ i ñopo Jacob.

⁴⁷ Pero jiñʌch Salomón tsa' bʌ i mele jiñi otot.

⁴⁸ Jiñi C'ax Ñuc Bʌ ma'añic mi' chumtʌl ti templo melbil bʌ ti c'ʌbʌl, che' bajche' tsi' yʌlʌ jiñi x'alt'añ.

⁴⁹ “Jiñi panchan jiñʌch c buchlib, jiñi pañimil i yajñibʌch coc. ¿Chuqui ti otot la' wom la' melbeñon? Che'en lac Yum. ¿Chuqui jiñi cajñib ba' mij c'aj co?

⁵⁰ ¿Mach ba i melbalic j c'ʌb pejtelel ili tac?” Che'en.

⁵¹ Che' bʌ tsa' ujti ti subt'añ Esteban tsi' su'be jiñi año' bʌ i ye'tel: Tsʌtsatax la' pusic'al, mach sʌc-esʌbilic la' pusic'al, mʌcʌl la' chiquin, ma'añic mi la' jac'ben jiñi Ch'ujul bʌ Espíritu, lajaletla che' bajche' tsi' meleyob la' ñojte'el.

⁵² Ma'añic mi juntiquilic x'alt'añ mach bʌ añic tsa' tic'lʌnti ti' tojlel la' ñojte'el. Tsi' tsʌnsayob jiñi tsa' bʌ i wʌn su'buyob tal jiñi Toj bʌ. Wʌle jatetla tsa'ix la' wʌc'ʌ jiñi Toj bʌ ti' c'ʌb i contra, tsa'ix la' tsʌnsa.

⁵³ Jiñi ángelob tsi' yʌq'ueyetla i mandar Dios, pero jatetla ma'añic tsa' la' jac'ʌ.

⁵⁴ Che' bʌ tsi' yu'biyob ili t'añ tsa' wen mich'ayob, quech'ecñayob i bʌquel i yej tsi' meleyob, cha'añ mich'ob ti' contra Esteban.

⁵⁵ Pero Esteban but'ul ti Ch'ujul bʌ Espíritu, tsi' letsa i wut ti panchan, tsi' q'uele i ñuclel Dios, tsi' q'uele Jesús ya' wa'al ti' ñoj Dios.

⁵⁶ Tsi' yʌlʌ: “Awilan, woli j q'uel calal jiñi panchan. Woli j q'uel Jesús i Yalobil Wiñic, ya' wa'al ti' ñoj Dios”, che'en.

⁵⁷ Jiñi año' bʌ i ye'tel tsi' cha'leyob c'am bʌ t'añ, tsi' mʌcʌyob i chiquin, ti junlajal tsa' majliyob ti ajñel cha'añ mi' chucob Esteban.

⁵⁸ Tsi' tujc'ayob loq'uel ti ti' colem tejclum, tsa' caji i julob ti xajlel. Jiñi xjop't'añob ti' contra Esteban tsi' jochoyob i bujc tsi' yʌc'ʌyob ti yoc juntiquil wiñic i c'aba' Saulo.

⁵⁹ Che' bʌ woli i julob ti xajlel, Esteban tsi' pejca Dios che' bajche' iliyi: C Yum Jesús, ch'ʌmbeñon c ch'ujlel, che'en.

⁶⁰ Ti wi'il tsa' ñocle, c'am tsi' cha'le t'añ: C Yum, mach a wʌq'ueñob ti' wenta ili i mul. Che' bʌ tsa' ujti i yʌl jiñi t'añ, tsa' chʌmi.