Hechos 6 - Jiñi Tsiji' bʌ Wen T'añ cha'añ Estudio

Tsa' yajcʌnti wuctiquil Diáconojob

¹ Ti jiñi bʌ q'uiñ che' bʌ woli i wen p'ojlelob jiñi xñopt'añob, jiñi griegojob tsa' cajiyob ti wulwul t'añ ti' contra jiñi hebreojob, come jiñi me'ba' x'ixicob i cha'añob ma'añic tsa' wen aq'uentiyob chuqui añ to yomob i cha'añ ti jujump'ejl q'uiñ.

² Jiñi cha'añ jiñi lajchʌntiquil tsi' tempayob pejtelel jiñi xñopt'añob, tsi' su'beyob: —Mach weñic mi tsa' j cʌyʌ c su'b lojon i t'añ Dios cha'añ mic tech c puc lojon waj.

³ Jiñi cha'añ hermañujob, yajcanla wuctiquil wiñicob ti la' tojlel, uts'ato' bʌ i pusic'al, but'ulo' bʌ ti Ch'ujul bʌ Espíritu, yic'ot wen bʌ i ña'tʌbal, cha'añ mi la' wa'chocoñob cha'añ jiñi e'tel.

⁴ Joñon lojon mi caj c chʌn pejcan lojon Dios yic'ot mi caj c chʌn cha'len lojon subt'añ.

⁵ Ti' pejtelelob uts'atʌch tsi' yu'biyob jiñi t'añ, tsi' yajcayob Esteban, ñopol bʌ i cha'añ i t'añ Dios ti jump'ejl i pusic'al, but'ul bʌ ti Ch'ujul bʌ Espíritu, che' ja'el tsi' yajcayob Felipe yic'ot Prócoro yic'ot Nicanor yic'ot Timón yic'ot Parmenas yic'ot Nicolás jiñi tsa' bʌ ochi i ñop lac Yum ti Antioquía.

⁶ Tsi' pʌyʌyob tilel ba'añ jiñi apóstolob, tsi' yʌc'ʌyob i c'ʌb ti' jol jujuntiquil yic'ot tsi' pejcʌbeyob Dios.

⁷ Tsa' pujqui i t'añ lac Yum, wen ca'bʌl tsa' p'ojli xñopt'añob ti Jerusalén, ca'bʌl motomajob ja'el tsi' jac'beyob i t'añ Dios.

Tsi' chucuyob Esteban

⁸ Esteban, but'ul ti' yutslel i pusic'al yic'ot ti p'ʌtʌlel Dios, tsi' pʌsʌ ñuc tac bʌ i yejtal i p'ʌtʌlel yic'ot ñuc tac bʌ i ye'tel ti' tojlel wiñicob x'ixicob.

⁹ Jiñi cha'añ tsa' tili wiñicob año' bʌ i ye'tel ti sinagoga mu' bʌ i pejcʌntelob ti librejo' bʌ, yic'ot cirenejob, yic'ot alejandríajob yic'ot año' bʌ ti Cilicia, yic'ot ti Asia, tsa' caji i yʌ'leñob Esteban.

¹⁰ Pero ma'añic tsa' mejli i contrajibeñob i ña'tʌbal, come toj tsi' cha'le t'añ che' bajche' tsi' yʌq'ue jiñi Ch'ujul bʌ Espíritu.

¹¹ Che' jiñi tsi' mucul tojoyob wiñicob cha'añ mi' su'bob cha'añ tsi' yu'biyob tsi' cha'le p'ajoñel Esteban ti' contra Moisés yic'ot ti' contra Dios.

¹² Che' jiñi tsi' techbeyob i mich'ajel wiñicob x'ixicob yic'ot xñoxob año' bʌ i ye'tel yic'ot xts'ijbayajob. Tsa' tiliyob, tsi' chucuyob Esteban, tsi' pʌyʌyob majlel ti' tojlel jiñi año' ñuc bʌ i ye'tel.

¹³ Tsi' wa'chocoyob xjop't'añob tsa' bʌ i yʌlʌyob: —Ili wiñic mi' cha'len p'ajoñel ti pejtelel ora, mi' p'aj jiñi ch'ujul bʌ Templo yic'ot i mandar Moisés.

¹⁴ Come tsa'ix cu'bi lojon che' bʌ tsi' yʌlʌ jiñi Esteban: “Jiñi Jesús ch'oyol bʌ ti Nazaret mi caj i jisan jiñi Templo yic'ot mi caj i q'uextan i cʌntesʌbal Moisés tsa' bʌ lac ñopo ti lac tat”.

¹⁵ Che' jiñi, jiñi año' bʌ i ye'tel ya' bʌ buchulob tsi' q'uelbeyob i wut Esteban lajal bajche' i wut ángel.