Hechos 4 - Jiñi Tsiji' bʌ Wen T'añ cha'añ Estudio

Pedro yic'ot Juan ti' tojlel año' bʌ i ye'tel

¹ Che' woli to i pejcañob wiñicob x'ixicob Pedro yic'ot Juan, tsa' c'otiyob jiñi motomajob yic'ot saduceojob, yic'ot i yaj capitán jiñi xcʌntayajob ti Templo.

² Tsa' wen mich'ayob come Pedro yic'ot Juan woli' cʌntesan wiñicob x'ixicob, cha'añ mi cha' ch'ojyel jiñi chʌmeño' bʌ che' bajche' Jesús tsa' cha' ch'ojyi.

³ Jiñi cha'añ tsi' chucuyob Pedro yic'ot Juan. Tsi' yotsayob ti mʌjquibʌl c'ʌlʌl jinto ti yijc'ʌlal come wolix i yic'an.

⁴ Pero ca'bʌl jiñi tsa' bʌ i yu'biyob jiñi wen t'añ tsi' ñopoyob, añob che' bajche' jo'p'ejl mil wiñicob.

⁵ Ti yijc'ʌlal tsi' tempayob i bʌ ti Jerusalén jiñi yumʌlob i cha'añ judíojob, yic'ot jiñi xñoxob año' bʌ i ye'tel yic'ot jiñi xts'ijbayajob,

⁶ ya'añ ja'el Anás jiñi ñuc bʌ motomaj yic'ot Caifás, Juan yic'ot Alejandro yic'ot yam bʌ i pi'ʌlob jiñi ñuc bʌ motomajob.

⁷ Che' bʌ tsa'ix i yʌc'ʌyob Pedro yic'ot Juan ti ojlil, tsi' c'ajtibeyob: —¿Majqui tsi' su'beyetla cha'añ mi la' cʌntesan ili wiñicob? ¿Majqui tsi' yʌq'ueyetla la' p'ʌtʌlel cha'añ mi la mel jiñi ñuc tac bʌ i yejtal la' p'ʌtʌlel?

⁸ Che' jiñi Pedro, but'ul ti Ch'ujul bʌ Espíritu, tsi' jac'beyob: —Jatetla yumʌlet bʌ la, yic'ot xñoxob ti Israel,

⁹ jatetla woli la' c'ajtibeñon lojon cha'añ jiñi wen bʌ e'tel tsa' bʌ c mele lojon ti' tojlel ili wiñic, jatetla la' wom la' wu'bin che' bajche' tsa' c'oq'uesʌnti.

¹⁰ Ña'tanla ti la' pejtelel, la' i ñopob ja'el pejtelel wiñicob x'ixicob ti Israel, cha'añ ti' c'aba' Jesucristo, jiñi ch'oyol bʌ ti Nazaret, jiñi tsa' bʌ la' ch'iji ti cruz, pero Dios tsi' teche ch'ojyel ba'añ chʌmeño' bʌ. Cha'añ ti' p'ʌtʌlel Jesucristo tsa'ix p'ʌt-a i yoc jiñi wiñic am bʌ ti la' tojlel.

¹¹ Ili Jesús jiñʌch jiñi Xajlel tsa' bʌ la' choco, jatetla xmel ototet bʌ la, pero tsa' sujti ti ñuc come tsa' otsʌnti ti' xujc otot.

¹² Ma'añic laj coltʌntel ti yam bʌ, come ma'añic yam bʌ ti' ye'bal panchan aq'uebilo' bʌ wiñicob mu' bʌ mejlel i coltañonla.

¹³ Che' bʌ tsi' q'uelbeyob i ch'ejlel i pusic'al Pedro yic'ot Juan, tsa' toj sajtiyob i pusic'al wiñicob x'ixicob come yujilob cha'añ mach cʌntesʌbilobic ti juñ, che' jiñi tsi' ña'tayob cha'añ tsa'ʌch ajñiyob yic'ot Jesús ja'el.

¹⁴ Che' bʌ tsi' q'ueleyob jiñi wiñic tsa' bʌ c'oq'uesʌnti, ya' wa'al yic'otob, ma'añic chuqui tsa' mejli i yʌlob ti' contra.

¹⁵ Jiñi cha'añ, jiñi año' bʌ ye'tel tsi' su'beyob loq'uel Pedro yic'ot Juan ti jiñi tempa bʌ, tsa' caji i pejcañob i bʌ,

¹⁶ tsi' yʌlʌyob: —¿Chuqui mi caj lac mel ti' tojlel ili wiñicob? Mach mejlic la cʌl mi xlotob, come isujmʌch tsa'ʌch i pʌsʌyob ñuc tac bʌ i yejtal i p'ʌtʌlel; come ti' pejtelel jiñi chumulo' bʌ ti Jerusalén laj yujilob, mach mejlic la cʌl mach isujmic.

¹⁷ Pero cha'añ ma'añic mi' chʌn p'ojlel majlel jiñi t'añ ti lac tejclum, la' lac bʌc'tesañob jiñi wiñicob cha'añ ma'añix mi' chʌn su'bob jiñi t'añ ti' c'aba' Jesús.

¹⁸ Jiñi cha'añ Pedro yic'ot Juan tsa' pʌjyiyob tilel, tsa' tijq'uiyob cha'añ ma'añix mi' chʌn cha'leñob t'añ yic'ot cʌntesa ti' c'aba' Jesús.

¹⁹ Pero Pedro yic'ot Juan tsi' jac'ʌyob: —Su'bula jatetla, mi toj ti' wut Dios che' mic ñusʌben lojon i t'añ cha'añ mic jac' lojon chuqui mi la' wʌl,

²⁰ come mach mejlic j cʌy c su'b lojon chuqui tsa' bʌ j q'uele lojon yic'ot tsa' bʌ cu'bi lojon.

²¹ Jiñi yumʌlob, che' bʌ tsa' ujti i cha' bʌc'tesañob tsi' coloyob, ma'añic bajche' tsa' mejli i yʌq'ueñob i toj i mul, come ti' caj tsi' bʌc'ñayob wiñicob x'ixicob, come ti' pejtelelob woli' i su'bob i ñuclel Dios cha'añ tsa' c'oc'a jiñi wiñic,

²² come jiñi wiñic tsa' bʌ c'oq'uesʌnti cha'añ ñuc bʌ i p'ʌtʌlel Dios, ñumeñix ti cha'c'al i ja'bilel.

Jiñi xñopt'añob tsi' c'ajtiyob i ch'ejlel i pusic'al

²³ Che' bʌ tsa' ajq'uiyob ti colel Pedro yic'ot Juan, tsa' majli i tempañob i bʌ ba'añ i pi'ʌlob yic'ot yaño' bʌ xcʌnt'añob; tsi' laj alʌyob chuqui tsi' su'beyob jiñi ñuc bʌ motomajob yic'ot xñoxob año' bʌ i ye'tel.

²⁴ Che' bʌ tsa'ix ujti i laj u'biñob jiñi t'añ, tsi' comol pejcayob Dios, tsi' yʌlʌyob: P'ʌtʌl bʌ c Yum Dios, jatet Dioset tsa' bʌ a mele panchan yic'ot pañimil, mar yic'ot pejtelel i bʌl,

²⁵ tsa' cha'le t'añ [ti Ch'ujul bʌ a wEspíritu ti' yej] a wiñic David, che' bʌ tsi' yʌlʌ: “¿Chucoch tsi' tempayob i bʌ jiñi wiñicob x'ixicob yic'ot jiñi xchumtʌl tac cha'añ mi' chajpañob i mel jiñi mach bʌ añix i c'ʌjñibal?

²⁶ Jiñi reyob ti pañimil tsi' tempayob i bʌ, yic'ot jiñi yumʌlob tsi' much'chocoyob i bʌ cha'añ mi' contrajiñob lac Yum yic'ot i Cristo”. Che'en.

²⁷ Isujm ti ili tejclum, tsi' tempayob i bʌ Herodes Antipas yic'ot Poncio Pilato, yic'ot jiñi gentilob yic'ot israelob ti' contra Jesús, jiñi Ch'ujul bʌ a Walobil, jiñi yajcʌbil bʌ a cha'añ,

²⁸ cha'añ mi' ts'ʌctesañob jiñi tsa'ix bʌ a wʌn ña'ta cha'añ mi' yujtel.

²⁹ Wʌle, c Yum Dios, q'uele bajche' mi' bʌc'tesañon lojon, aq'ueñon lojon i ch'ejlel c pusic'al cha'añ mic su'b lojon a t'añ.

³⁰ Sʌts'ʌ a c'ʌb ti c'oq'uesaya, pʌsʌ ñuc tac bʌ i yejtal a p'ʌtʌlel yic'ot ñuc tac bʌ a melbal ti' c'aba' Ch'ujul bʌ a Walobil Jesús.

³¹ Che' bʌ tsa' ujti i pejcañob Dios, tsa' ñijcʌyi jiñi otot ba' tempʌbilob. Ti pejtelelob tsa' bujt'iyob ti Ch'ujul bʌ Espíritu, ti jim bʌ ora tsi' chʌn su'buyob i t'añ Dios ti' ch'ejlelob i pusic'al.

I tem cha'añob jach i chu'bʌañ

³² Pejtelel jiñi tsa' bʌ i ñopoyob Jesús jump'ejlob jach i pusic'al yic'ot i ña'tʌbal. Ma'añic majqui tsi' yʌlʌ mi i bajñel cha'añ i chu'bʌañ, pero i tem cha'añob jach.

³³ Jiñi xcʌnt'añob but'ulob ti' p'ʌtʌlel Dios, tsi' chʌn su'buyob cha'añ tsa' ch'ojyi lac Yum Jesús. Pejtelel jiñi xñopt'añob, tsa' aq'uentiyob i yutslel i pusic'al Dios.

³⁴ Ma'añic mi juntiquilic añ to bʌ chuqui yom i cha'añ, come jiñi año' bʌ i lum yic'ot i yotot tsi' choñoyob, tsi' ch'ʌmbeyob tilel i tojol jiñi tsa' bʌ i choñoyob,

³⁵ tsi' p'ulchocoyob ti yoc jiñi chocbilo' bʌ majlel ti subt'añ, tsa' t'oxbentiyob jiñi xñopt'añob, majqui jach añ to bʌ chuqui yom i cha'añ.

³⁶ José, jiñʌch juntiquil levita ch'oyol bʌ ti Chipre. Jiñi apóstolob mi pejcañob ti Bernabé (añ isujmlel ti lac t'añ: Jiñʌch mu' bʌ i ñuq'uesan lac pusic'al).

³⁷ Bernabé tsi' choño i lum, tsi' ch'ʌmbe tilel i tojol tsi' yʌc'ʌ lʌc'ʌl ti yoc jiñi chocbilo' bʌ majlel ti subt'añ.