Hechos 3 - Jiñi Tsiji' bʌ Wen T'añ cha'añ Estudio

Tsa' c'oq'uesʌnti wiñic mach bʌ weñic i yoc

¹ Pedro yic'ot Juan tsa' letsiyob majlel ti Templo ti och'ajel q'uiñ che' ti' yorajlel oración.

² Añ juntiquil wiñic mach bʌ weñic i yoc c'ʌlʌl che' bʌ tsi' yila pañimil, ti jujump'ejl q'uiñ tsi' pʌyʌyob tilel cha'añ mi' yʌc'ob ti' ti' Templo i c'aba' I T'ojol bʌ, cha'añ mi' c'ajtiben taq'uiñ jiñi mu' bʌ i yochelob ya' ti Templo.

³ Jiñi wiñic, che' bʌ tsi' q'uele Pedro yic'ot Juan woli i yochelob ti Templo, tsi' c'ajtibe ti wocol t'añ cha'añ mi yʌq'ueñ taq'uiñ.

⁴ Pedro yic'ot Juan, tsi' ch'ujch'uj q'ueleyob jiñi wiñic, tsi' su'be: —Q'ueleyon lojon, —che'en.

⁵ Jiñi wiñic tsa' caji i ch'ujch'uj q'uelob, come tsi' ña'ta añ chuqui mi caj i yʌq'ueñob.

⁶ Pero Pedro tsi' su'be: —Ma'añic c cha'añ sʌsʌc taq'uiñ, mi oro, pero am bʌ c cha'añ mi caj cʌq'ueñet ti' c'aba' Jesucristo jiñi ch'oyol bʌ ti Nazaret. Ch'ojyen, cha'len xʌmbal, —che'en.

⁷ Jiñi cha'añ Pedro tsi' chucbe ñoj bʌ i c'ʌb, tsi' teche ch'ojyel; ti orajach tsa' p'ʌt-a i yoc yic'ot i bic' i yoc;

⁸ tsa' xit' ch'ojyi, tsa' wa'le, tsa' caji ti xʌmbal, tsa' ochi ti Templo temel yic'ot Pedro yic'ot Juan, tsi' cha'le xʌmbal, tsi' cha'le tijp'el, tsi' su'bu i ñuclel Dios.

⁹ Pejtelel wiñicob x'ixicob tsi' q'ueleyob jiñi wiñic wolix ti xʌmbal yic'ot woli i su'b i ñuclel Dios.

¹⁰ Ti orajach tsi' cʌñʌyob cha'añ jiñʌch jiñi wiñic tsa' bʌ buchle i c'ajtin taq'uiñ ya' ti ti' Templo i c'aba' I T'ojol Bʌ yic'ot tsa' toj sajtiyob i pusic'al, che' ja'el tsa' bʌc'ñayob cha'añ jiñi tsa' bʌ melbenti jiñi wiñic.

I cha'yajlel i subt'añ Pedro

¹¹ Che' chucbil to i cha'añ Pedro yic'ot Juan jiñi wiñic tsa' bʌ c'oq'uesʌnti, pejtelel wiñicob x'ixicob tsa' toj sajtiyob i pusic'al, tsi' tsajcayob majlel c'ʌlʌl jinto tsa' c'otiyob ya' ti corredor i cha'añ Salomón.

¹² Che' bʌ tsi' q'uele Pedro, tsa' caji i su'beñob: Wiñicob ti Israel, ¿chucoch mi' toj sajtel la' pusic'al cha'añ jiñi woli bʌ la' q'uel wʌle? ¿Chucoch mi la' ch'ujch'uj q'uelon lojon che' bajche' mi tic bajñel p'ʌtʌlel lojon o mi tic bajñel uts'atlel lojon tsa' cʌq'ue lojon i p'ʌtʌlel ti xʌmbal ili wiñic?

¹³ I Dios Abraham, Isaac, Jacob yic'ot lac ñojte'elob, tsa'ix i tsictesa i ñuclel i Yalobil, jiñʌch Jesús. Jatetla tsa'ix la' wʌc'ʌ ti' c'ʌb i contra, tsa' la' ts'a'le ti' tojlel Pilato che' bʌ tsi' ña'ta i yʌc' ti colel.

¹⁴ Pero jatetla tsa' la' ts'a'le jiñi Ch'ujul Bʌ, jiñi Toj Bʌ. Tsa' la' c'ajtibe Pilato cha'añ mi' yʌc' ti colel jiñi xtsʌnsa.

¹⁵ Jatetla tsa' la' tsʌnsa jiñi mu' bʌ i yʌq'ueñonla laj cuxtʌlel, pero Dios tsi' teche loq'uel ba'añ chʌmeño' bʌ, joñon tsa' j q'uele lojon.

¹⁶ Cha'añ ti' c'aba' Jesús mu' bʌ c ñop lojon tsi' taja i p'ʌtʌlel jiñi wiñic mu' bʌ la' q'uel, mu' bʌ la' cʌn; cha'añ ti' caj Jesús mu' bʌ lac ñop tsa' c'oq'uesʌnti jiñi wiñic ti la' tojlel.

¹⁷ Wʌle hermañujob, cujil cha'añ jatetla yic'ot jiñi yumʌlob la' cha'añ ma'añic tsa' la' ch'ʌmbe isujm chuqui tsa' la' mele.

¹⁸ Pero Dios tsi' ts'ʌctesa i t'añ tsa' bʌ wʌn sujbi ti' yej pejtelel x'alt'añob: cha'añ Cristo wersa mi' caj i yu'bin wocol.

¹⁹ Jiñi cha'añ cʌyʌ la' mul, sutq'uin la' bʌ cha'añ mi' ñusʌntel la' mul, cha'añ mi la' taj c'aj-o ti' tojlel lac Yum,

²⁰ che' jiñi Dios mi caj i chocbeñetla tilel Jesucristo, che' bajche' wʌn albil i cha'añ.

²¹ Come isujm mi' wersa ajñel Jesucristo ti panchan c'ʌlʌl jinto ti yorajlel mi' cha' mel pejtelel chuqui tac añ, che' bajche' tsi' su'bu Dios ti' tojlel ch'ujul bʌ x'alt'añob i cha'añ ti wajali.

²² Come Moisés tsi' su'be la' ñojte'elob: “La' Yum Dios mi caj i yʌq'ueñetla juntiquil x'alt'añ lajal che' bajche' joñon loq'uem bʌ ti la' pi'ʌlob; yom mi la' ñʌch'tʌben pejtelel chuqui tac mi' caj i su'beñetla.

²³ Pejtelel majqui jach mi' ñusʌben i t'añ jiñi x'alt'añ, mi caj i chojquel loq'uel ti' tojlel i pi'ʌlob cha'añ mi' jilel”, che'en.

²⁴ Ti pejtelel x'alt'añob c'ʌlʌl ti Samuel yic'ot jiñi tsa' to bʌ tiliyob ti wi'ipat, che' bajche' jaytiquil tsi' cha'leyob t'añ, tsi' wʌn su'buyob chuqui tac woli' yujtel ti ili q'uiñ.

²⁵ Jatetla i yalobiletla jiñi x'alt'añob, yic'ot jiñi albil bʌ t'añ su'bil bʌ i cha'añ Dios ti' tojlel lac ñojte'el che' bʌ tsi' su'be Abraham: “Ti a p'olbal mi caj i tajob i wenlel pejtelel jiñi año' bʌ ti pañimil”, che'en.

²⁶ Dios tsi' teche ch'ojyel i Yalobil i c'aba' Jesús, tsi' ñaxan choco tilel ba'añetla cha'añ mi yʌq'ueñetla la' wenlel cha'añ mi' ñijcañetla la' cʌy la' mul ti jujuntiquiletla.