Hechos 28 - Jiñi Tsiji' bʌ Wen T'añ cha'añ Estudio

Pablo añ ti joyol bʌ ja' i c'aba' Malta

¹ Che' uts'at tsa' c'otiyon lojon ti ti' mar, tsa' c ña'ta lojon cha'añ jiñi lum joyol bʌ ti ja' jiñʌch i c'aba' Malta.

² Jiñi chumulo' bʌ ya' ti joyol bʌ ja' tsi' wen p'untayon lojon; tsi' xiq'uiyob c'ajc, tsi' pʌyʌyon lojon ochel tic pejtelel lojon come woli to ja'al, yic'ot tsʌwan jax pañimil.

³ Jiñi cha'añ Pablo tsi' tempa junsejt si', che' bʌ tsi' yotsa ti c'ajc, tsa' loq'ui lucum cha'añ i ticwʌlel c'ajc, tsi' c'uxbe i c'ʌb Pablo.

⁴ Jiñi wiñicob ya' bʌ chumulo' ti jiñi lum, che' bʌ tsi' q'ueleyob ts'uyul lucum ti' c'ʌb Pablo, tsi' su'beyob i bʌ: —Isujm ili wiñic, jiñʌch xtsʌnsa, anquese uts'at tsa' loq'ui ti ja', pero wʌle mux caj i chʌmel cha'añ i mul.

⁵ Pablo tsi' pajq'ui ochel ti c'ajc jiñi lucum, pero ma'añic chuqui tsi' cha'le.

⁶ Tsi' ña'tayob jiñi wiñicob mux i sijt'el o mux i bʌc' chʌmel ti ora, pero che' bʌ jumuq'uix tsi' pijtayob tsa' caji i q'uelob ma'añic chuqui tsi' cha'le, tsi' q'uextayob i pusic'al, tsa' caj i yʌlob jiñʌch juntiquil dios.

⁷ Añ juntiquil i c'aba' Publio am bʌ i ye'tel ti jiñi lum joyol bʌ ti ja', tsi' pʌyʌyon lojon ochel ti' yotot, uxp'ejl q'uiñ tsi' we'sayon lojon ti' yutslel i pusic'al.

⁸ Ñolol i tat Publio ti' wʌyib, woli yu'bin c'ajc yic'ot c'ux ñʌc' ta'. Pablo tsa' ochi i q'uel, che' bʌ tsa'ix i pejca Dios, tsi' yʌc'ʌ i c'ʌb ti' jol, tsi' lajmesa.

⁹ Che' bʌ tsi' yu'biyob chuqui tsa' ujti, tsa' tiliyob ja'el yaño' bʌ xc'am-ʌjelob loq'uemo' bʌ ti jiñi lum joyol bʌ ti ja', tsa' laj lajmesʌntiyob;

¹⁰ che' bʌ tsa' c cha' teche lojon c xʌmbal ti barco, jiñi wiñicob tsi' yʌq'ueyon lojon ca'bʌl c majtañ lojon cha'añ pejtelel chuqui yom cha'añon lojon.

Tsa' c'oti Pablo ti Roma

¹¹ Che' ñumeñix uxp'ejl uw, tsa' majliyon lojon ti barco ch'oyol bʌ ti Alejandría, come ya'ʌch tsi' ñusa i yorajlel tsʌñal ti jiñi lum joyol bʌ ti ja', añ i yejtal Cástor yic'ot Pólux bombil ti' pat jiñi barco.

¹² Che' bʌ tsa' c'otiyon lojon ti Siracusa, ya' tsa' jal-ayon lojon uxp'ejl q'uiñ.

¹³ Che' bʌ tsa' loq'uiyon lojon ya'i, tsa' c xʌñʌ lojon majlel ti ti' ti' ja' ti barco c'ʌlʌl tsa' c'otiyon lojon ti Regio; che' ñumeñix jump'ejl q'uiñ, tsa' tejchi ic' loq'uem bʌ ti sur, ti' cha'p'ejlel q'uiñ tsa' c'otiyon lojon ti Puteoli,

¹⁴ ya'i tsa' c taja lojon lamital hermañujob tsa' bʌ i c'ajtibeyon lojon cha'añ mij cʌytʌl lojon yic'otob wucp'ejl q'uiñ. Ti wi'il tsa' c'otiyon lojon ti Roma.

¹⁵ Che' bʌ tsi' yu'biyob jiñi hermañujob ya' ti Roma cha'añ tsa'ix c'otiyon lojon ti Apio yic'ot Tres Tabernas, tsa' tiliyob i tajon lojon. Pablo tsi' su'be wocolix i yʌlʌ Dios che' bʌ tsi' q'ueleyob, che' jiñi tsi' taja i ñuclel i pusic'al.

¹⁶ Che' bʌ tsa' c'otiyon lojon ti Roma, tsa' aq'uenti Pablo ba' mi' bajñel chumtʌl ti' jump'ejl otot yic'ot juntiquil soldado tsa' bʌ aq'uenti i cʌntan.

Pablo tsi' cha'le subt'añ ti Roma

¹⁷ Che' bʌ ñumeñix uxp'ejl q'uiñ, Pablo tsi' pʌyʌ jiñi año' bʌ ñuc bʌ i ye'tel ti' tojlel judíojob. Che' bʌ tempʌbilob, Pablo tsi' su'beyob: —Wiñicob c pi'ʌlob, ma'añic chuqui tsa' c cha'le ti' contra lac pi'ʌlob, ma'añic tsa' j contrajibe i t'añ lac ñojte'el, pero tsi' ñup'uyoñob ya' ti Jerusalén, wʌle tsa'ix ajq'uiyon ti' c'ʌb romanojob;

¹⁸ che' bʌ tsi' meleyoñob yom i coloñob, come ma'añic c mul cha'añ mic chʌmel.

¹⁹ Jiñi judíojob tsi' wersa c'ajtiyob cha'añ ma'añic mi' cʌjq'uel ti colel, jiñi cha'añ tsa' c wersa c'ajti c mel c bʌ ba'añ César anquese ma'añic chuqui mic su'b ti' contra c pi'ʌlob tic lumal.

²⁰ Jiñi cha'añ tsa' c pʌyʌyetla tilel cha'añ mij q'ueletla, cha'añ mic pejcañetla, come cʌchʌlon ti cadena cha'añ woli c ñop jiñi mu' bʌ i ñopob jiñi israelob, che'en Pablo.

²¹ Jiñi judíojob tsi' jac'ʌyob: —Joñon lojon ma'añic tsa' chocbentiyon lojon tilel juñ ti judea cha'añ mi' su'bob a mul, ma'añic tsi' su'buyob a mul mi juntiquilic lac pi'ʌlob tsa' bʌ juliyob ja'el, ma'añic chuqui tsi' yʌlʌyob ti a contra.

²² Pero com cu'bin lojon chuqui wola' ñop, come jiñi cujil bʌ lojon cha'añ ti pejtelel lum woli' contrajintelob jiñi mu' bʌ i ñopob che' bajche' jatet.

²³ Jiñi judíojob tsi' wʌn ña'tayob baqui bʌ ora mi' cha' tempañob i bʌ yic'ot Pablo, ca'bʌl tsa' c'otiyob ya' ba' chumul, Pablo tsi' wen su'beyob jiñi wen t'añ cha'añ i yumʌntel Dios, c'ʌlʌl ti sʌc'ajel c'ʌlʌl ti ic'ajel tsi' wen tsictesʌbeyob isujmlel Jesús che' bajche' ts'ijbubil ti' mandar Moisés yic'ot ti' juñ jiñi x'alt'añob.

²⁴ Ojlil tsi' ñopoyob chuqui tsi' su'beyob, ojlil ma'añic tsi' ñopoyob.

²⁵ Tsi' t'oxoyob i bʌ ti t'añ. Che' bʌ tsa' caji i tʌts'ob i bʌ, Pablo tsi' su'beyob: —Isujm chuqui tsi' yʌlʌ jiñi Ch'ujul bʌ Espíritu che' bʌ tsi' c'ʌmbe i yej jiñi x'alt'añ Isaías che' bʌ tsi' pejca lac ñojte'el, tsi' yʌlʌ:

²⁶ “Cucu ba'añ wiñicob x'ixicob, su'beñob: Mi caj la' wu'bin t'añ, pero ma'añic mi caj la' ch'ʌmben isujm; mi caj la' q'uel, pero ma'añic mi caj i c'otel la' wut,

²⁷ come tsa' ochi ti tonto i pusic'al ili wiñicob x'ixicob; mach yomic i yu'biñob, tsi' muts'uyob i wut, ame i q'uelob ti' wut, ame i yu'biñob ti' chiquin, ame i ch'ʌmbeñob isujm ti' pusic'al, ame i cha' sutq'uiñob i bʌ cha'añ mic lajmesañob”, che'en.

²⁸ Ña'tanla che' jiñi, wolix i sujbel ba'añ gentilob jiñi laj coltʌntel ch'oyol bʌ ti Dios. Jiñi gentilob mi caj i ñʌch'tañob, che'en Pablo.

²⁹ [Che' bʌ tsa' ujti ti t'añ, tsa' majliyob jiñi judíojob, tsi' contrajiyob i bʌ ti ca'bʌl t'añ.]

³⁰ Cha'p'ejl ja'b tsa' ajñi Pablo ti' yotot tsa' bʌ i majña, tsi' pʌyʌ ochel pejtelel tsa' bʌ tili i q'uelob.

³¹ Tsi' su'bu isujmlel i yumʌntel Dios. Ti' ch'ejlel i pusic'al tsi' cʌntesayob isujmlel lac Yum Jesucristo, ma'añic majqui tsi' mʌcta.