Hechos 21 - Jiñi Tsiji' bʌ Wen T'añ cha'añ Estudio

Tsa' majli Pablo ti Jerusalén

¹ Che' bʌ tsa' j cʌyʌ lojon la quermañujob, tsa' ochiyon lojon ti barco, toj tsa' majliyon lojon ti Cos; ti yijc'ʌlal c'ʌlʌl ti Rodas, ti wi'il c'ʌlʌl ti Pátara.

² Ya' tsa' c taja lojon barco mu' bʌ i ñumel majlel ti Fenicia, ya'i tsa' ochiyon lojon majlel.

³ Che' bʌ tsa' j q'uele lojon Chipre, tsa' ñumiyon lojon ti' ts'ejtʌlel ili tejclum joyol bʌ ti ja', tsa' ñumiyon lojon majlel c'ʌlʌl ti Siria, tsa' c'otiyon lojon ti Tiro, come yom mi' ju'sʌbentel i cuch jiñi barco.

⁴ Ya'i tsa' c taja lojon xñopt'añob, tsa' cʌleyon lojon ya'i wucp'ejl q'uiñ yic'otob; tsi' su'beyob Pablo ti Espíritu cha'añ ma'añic mi' letsel majlel ti Jerusalén.

⁵ Che' bʌ tsa' ts'ʌctiyi jiñi q'uiñ, tsa' loq'uiyon lojon majlel. Ti' pejtelel jiñi xñopt'añob, jiñi x'ixicob yic'ot i yalobilob temel tsa' majliyon lojon c'ʌlʌl ti ti' jiñi tejclum, tsa' ñocleyon lojon ya' ti ti' ja', tsa' c pejca lojon Dios.

⁶ Tsa' c meq'ue lojon c bʌ, che' jiñi tsa' ochiyon lojon ti barco, jiñi xñopt'añob tsa' sujtiyob ti' yotot.

⁷ Tsa' cujtesa lojon c xʌmbal ti barco che' bʌ tsa' loq'uiyon lojon ti Tiro cha'añ mij c'otel lojon ti Tolemaida; ya'i tsa' cʌq'ue lojon cortesía hermañujob, ya' to tsa' cʌleyon lojon jump'ejl q'uiñ yic'otob.

⁸ Ti yijc'ʌlal tsa' loq'uiyon lojon majlel, tsa' c'otiyon lojon ti Cesarea, ya' tsa' ochiyon lojon ti yotot Felipe, jiñi subt'añ, jiñi tsa' bʌ i tem tajayob i ye'tel yic'ot jiñi wuctiquil.

⁹ Felipe añ chʌntiquil i yixic'al mach to bʌ añic i ñoxi'al, tsi' cha'leyob alt'añ.

¹⁰ Che' bʌ tsa' ñumi ca'bʌl q'uiñ che' ya'añon lojon ya'i, tsa' ju'bi tilel juntiquil x'alt'añ loq'uem bʌ ti Judea, i c'aba' Agabo.

¹¹ Che' bʌ tsa' c'oti ba'añon lojon, tsi' ch'ʌmbe i cajchiñʌc' Pablo, tsi' bajñel cʌchʌ i yoc i c'ʌb, tsa' caji i su'beñob: —Jiñi Ch'ujul bʌ Espíritu tsi' yʌlʌ: “Jiñi judíojob año' bʌ ti Jerusalén, che'i mi caj i cʌchob i yum jiñi cajchiñʌc'ʌl che' bajche' iliyi cha'añ mi yʌc'ob ti' c'ʌb gentilob”, —che'en Agabo.

¹² Che' bʌ tsa' cu'bi lojon jiñi t'añ, joñon lojon yic'ot jiñi ya' bʌ añob tsa' c su'be lojon Pablo ti wocol t'añ cha'añ ma'añic mi' letsel majlel ti Jerusalén.

¹³ Pablo tsi' su'beyon lojon: —¿Chucoch mi la' cha'len uq'uel cha'añ mi la' wʌq'ueñon i ch'ijiyemlel c pusic'al? Joñon chajpʌbilon, mach cojic jach cha'añ mij cʌjchel, pero cha'añ mic chʌmel ja'el ti Jerusalén cha'añ ti' c'aba' lac Yum Jesús, —che'en.

¹⁴ Come ma'añic tsi' jac'beyon lojon c t'añ, jiñi cha'añ tsa' c su'be lojon: —La' i mel chuqui yom lac Yum ti a tojlel.

¹⁵ Ti wi'il tsa' c chajpa lojon c bʌ, tsa' letsiyon lojon majlel ti Jerusalén.

¹⁶ Cha'tiquil uxtiquil xñopt'añob ch'oyolo' bʌ ti Cesarea tsa' majli quic'ot lojon, tsi' pʌyʌyon lojon majlel ti' yotot juntiquil ñaxan bʌ xñopt'añ i c'aba' Mnasón ch'oyol bʌ ti Chipre cha'añ ya'i mij c'aj lojon coj.

Tsi' chucuyob Pablo ti Templo

¹⁷ Che' bʌ tsa' c'otiyon lojon ti Jerusalén, wen tijicñayob i pusic'al jiñi hermañujob, tsi' ch'ʌmʌyon lojon ti' wenta.

¹⁸ Ti yijc'ʌlal Pablo tsa' majli quic'ot lojon ba'añ Jacobo, ya'i tempʌbilob pejtelel jiñi ancianojob.

¹⁹ Che' bʌ tsi' yʌq'ueyob i bʌ cortesía, Pablo quepecña tsa' caji i su'beñob pejtelel chuqui tac tsi' mele Dios ti' tojlel gentilob ya' ba' tsi' cha'le subt'añ.

²⁰ Che' bʌ tsi' yu'biyob, tsi' su'buyob i ñuclel Dios. Jiñi ancianojob tsi' su'beyob Pablo: —Hermano, a wujilix jayp'ejl mil judíojob tsi' ñopoyob; ti' pejtelelob wen bʌxob ti' jac'ol jiñi mandar.

²¹ Tsa'ix u'binti ilayi cha'añ woli a cʌntesan judíojob ya' bʌ añob ti' tojlel gentilob cha'añ mi' cʌy i jac'ob i mandar Moisés. Wola' su'b cha'añ mach yomic mi' tsepbeñob i pʌchʌlel i yalobilob, yic'ot mach yomic mi' cha'leñob che' bajche' i tilel judíojob.

²² Jiñi cha'añ, ¿chuqui mi caj lac mel? Come mi caj i tempañob i bʌ ca'bʌl wiñicob x'ixicob, mi caj i wersa u'biñob cha'añ wʌ'añet.

²³ Jiñi cha'añ, mele chuqui mic su'beñet lojon: Wʌ' añob chʌntiquil wiñicob tsa' bʌ i su'beyob Dios chuqui mi caj i wersa melob.

²⁴ Pʌyʌyob majlel, sʌc-esan a bʌ yic'otob, yic'ot tojbeñob che' bajche' yom cha'añ mi' set'bentelob i tsutsel i jol; che' jiñi ti' pejtelelob mi caj i ñopob cha'añ mach isujmic jiñi woli bʌ ti ajlel ti a tojlel, mi caj i ña'tañob uts'atʌch wola' mel, yic'ot wolʌch a jac' ja'el jiñi mandar.

²⁵ Pero ixcu jiñi gentilob tsa' bʌ i ñopoyob, joñon lojon tsa'ix c ts'ijbube lojon juñ cha'añ ma'añic mi' jac'ob iliyi; cojach tsa' c su'be lojon cha'añ mi' cʌy i c'uxob jiñi tsʌnsʌbil bʌ i majtañ dios te' yic'ot i ch'ich'el jiñi milbil tac bʌ yic'ot mach yomic mi' cha'leñob ts'i'lel.

²⁶ Jiñi cha'añ Pablo tsi' pʌyʌ majlel jiñi wiñicob, ti yijc'ʌlal che' bʌ tsa'ix i sʌc-esa i bʌ yic'otob, tsa' ochi ti Templo cha'añ mi' su'beñob baqui bʌ q'uiñ mi caj i yujtel i sʌc-esañob i bʌ, yic'ot baqui bʌ q'uiñ mi caj i yʌq'uentel i majtañ Dios am bʌ ti' wenta ti jujuntiquil.

²⁷ Che' yomix ts'ʌctiyel jiñi wucp'ejl q'uiñ, cha'tiquil uxtiquil judíojob ch'oyolo' bʌ ti Asia tsi' q'ueleyob Pablo ti Templo, tsi' ñijcayob wiñicob cha'añ mi' chucob Pablo.

²⁸ C'am tsi' yʌlʌyob: —¡Wiñicob israelob, la' la coltañon lojon! Umba'añ ili wiñic mu' bʌ i cha'len cʌntesa ti' contra i cha'año' bʌ Dios yic'ot ti' contra jiñi mandar yic'ot ti' contra jiñi Templo; mach cojic jach jiñi, pero tsa'ix i pʌyʌ ochel griegojob ja'el ti' mal Templo, tsa'ix i bi'b-esa jiñi Ch'ujul bʌ Ajñibʌl.

²⁹ Come tsi' lon ña'tayob tsa'ix i pʌyʌ ochel ti' mal Templo juntiquil wiñic ch'oyol bʌ ti Éfeso, i c'aba' Trófimo, come añix ora tsi' q'ueleyob yic'ot Pablo.

³⁰ Jiñi cha'añ tsa' tejchiyob ti a'leya pejtelel wiñicob año' bʌ ti jiñi tejclum, ti orajach tsi' tempayob i bʌ, tsi' chucuyob Pablo, tsi' tujc'ayob loq'uel ti Templo, ti orajach tsi' ñup'uyob i ti' jiñi Templo.

³¹ Che' bʌ yomix i tsʌnsañob Pablo, tsa' su'benti jiñi ñuc bʌ i ye'tel ti' tojlel jump'ejl mil soldadojob romanojo' bʌ cha'añ woliyob ti leto pejtelel wiñicob ti Jerusalén.

³² Jiñi am bʌ i ye'tel tsi' pʌyʌ majlel soldadojob yic'ot i yaj capitañob, ti ajñel tsa' majliyob ba'añ wiñicob x'ixicob. Che' bʌ tsi' q'ueleyob jiñi soldadojob, jiñi wiñicob tsi' cʌyʌ i jats'ob Pablo.

³³ Jiñi cha'añ che' bʌ tsa' c'oti jiñi am bʌ ñuc bʌ i ye'tel, tsi' chucuyob Pablo. Tsi' yʌc'ʌ mandar cha'añ mi' cʌjchel ti cha't'ujm cadena, tsi' c'ajtibe i c'aba' yic'ot chuqui tsi' mele.

³⁴ Ti pejtelelob jelchojc chuqui tsi' yʌlʌyob ti c'am bʌ t'añ. Jiñi año' bʌ i ye'tel ma'añic tsa' mejli i ch'ʌmben isujm come ju'ucñayob ti ca'bʌl t'añ jiñi wiñicob, jiñi cha'añ tsi' yʌc'ʌyob mandar cha'añ mi' pʌjyel majlel Pablo ti yotlel soldadojob.

³⁵ Che' bʌ tsa' c'otiyob ba' quejpʌctic bʌ ts'ajc, jiñi soldadojob tsi' ch'uyuyob majlel Pablo, come wen mich'ob wiñicob.

³⁶ Jiñi wiñicob woli' bʌ i tsajcañob majlel, c'am tsi' yʌlʌyob: —¡Tsʌnsanla!

I coltʌntel Pablo ti' tojlel wiñicob x'ixicob

³⁷ Che' bʌ tsa' caji i pʌyob ochel Pablo ti' yotlel soldadojob, Pablo tsi' su'be jiñi ñuc bʌ i ye'tel ti' tojlel soldadojob: —¿Mu' ba i mejlel c pejcañet? Tsi' jac'ʌ: —¿Awujil ba t'añ ti griego?

³⁸ ¿Mach ba jatetic jiñi egipcio tsa' bʌ i teche leto ti' contra yumʌl maxto jali? ¿Mach ba jatetic jiñi tsa' bʌ a pʌyʌ majlel ti jochol bʌ lum lujumbajc' xtsʌnsajob? Che'en.

³⁹ Jiñi cha'añ Pablo tsi' su'be: —Joñon mero judíojon, c lumal jiñʌch Tarso ya' ti Cilicia, ya' chucbil j c'aba' ti ñuc bʌ tejclum. Awocolic, la' c pejcan jiñi wiñicob, —che'en.

⁴⁰ Che' bʌ tsi' yʌc'ʌ i t'añ jiñi ñuc bʌ i ye'tel ti' tojlel soldadojob, tsa' wa'le Pablo ba'añ jiñi quejpʌctic bʌ ts'ajc, tsi' pʌsbeyob i c'ʌb jiñi wiñicob. Che' bʌ tsa' ñʌjch'iyob, Pablo tsa' caji i pejcañob ti' t'añ hebreojob, tsi' yʌlʌ: