Hechos 20 - Jiñi Tsiji' bʌ Wen T'añ cha'añ Estudio

Pablo tsa' majli ti Macedonia yic'ot ti Grecia

¹ Che' bʌ tsa'ix lajmi jiñi ju'ucña bʌ t'añ, Pablo tsi' choco ti pʌyol jiñi xcʌnt'añob, tsi' ñuq'uesʌbeyob i pusic'al, tsi' meq'ueyob, tsi' su'beyob cha'añ muq'uix caj i majlel, che' jiñi tsa' loq'ui majlel ti Macedonia.

² Che' bʌ tsa'ix ñumi tac ti jiñi lum ba' tsi' wen xic'beyob ti jiñi wen t'añ, tsa' c'oti ti Grecia.

³ Ya'i tsa' jal-a uxp'ejl uw, pero jiñi judíojob woli i chijtañob che' bʌ yomix ochel ti barco cha'añ mi' majlel ti Siria. Pablo tsa' caji i ña'tan cha'añ uts'at mi' cha' sujtel ti Macedonia.

⁴ Tsa' majli yic'otob c'ʌlʌl ti Asia jiñi Sópater ch'oyol bʌ ti Berea i yalobil Pirro, Aristarco yic'ot Segundo ch'oyol bʌ ti Tesalónica; Gayo ch'oyol bʌ ti Derbe; yic'ot Timoteo; yic'ot Tíquico yic'ot Trófimo ch'oyolo' bʌ ti Asia.

⁵ Ili hermañujob tsa' majliyob ti ñaxan i pijtañon lojon ya' ti Troas.

⁶ Che' bʌ tsa' ñumi i q'uiñilel caxlan waj mach bʌ añic i levadurajlel, tsa' ochiyon lojon ti barco ya' ti Filipos. Jo'p'ejl q'uiñ tsa' c xʌñʌ lojon majlel ya' ti Troas, ya'i tsa' c cha' taja lojon c bʌ. Ya'i tsa' cʌleyon lojon wucp'ejl q'uiñ.

Pablo tsi' jula'tayob jiñi año' bʌ ti Troas

⁷ Ti ñaxan bʌ q'uiñ ti semana, tsa' c tempa lojon c bʌ yic'ot jiñi xñopt'añob cha'añ mic xet' lojon waj. Pablo tsi' cʌntesayob jiñi xñopt'añob c'ʌlʌl ti ojlil ac'ʌlel, come yomix majlel ti yijc'ʌlal.

⁸ Ya' ti' cha'lajmlel jiñi otot ba' tsa' c tempa lojon c bʌ, añ ca'bʌl lámpara ts'ʌ'bʌl tac bʌ ya' ti' mal jiñi otot.

⁹ Juntiquil ch'itoñ, i c'aba' Eutico, buchul ti ventana; tsa' caji ti wʌyel come jal woli ti cʌntesa Pablo, che' bʌ tsa'ix wen ochi i wʌyel tsa' yajli ju'bel c'ʌlʌl ti yuxlajmlel i lajm jiñi otot c'ʌlʌl tsa' c'oti ti lum. Chʌmeñix tsi' lotoyob.

¹⁰ Che' jiñi Pablo tsa' ju'bi majlel ya' ti' ye'bal, tsa' bʌc' c'oti i mec', tsi' yʌlʌ: —Mach la' mel la' pusic'al, cuxul to, —che'en.

¹¹ Che' bʌ tsa'ix cha' letsi Pablo, tsi' xet'eyob waj, tsi' c'uxuyob, jalto tsi' cha' cha'le t'añ c'ʌlʌl tsa' sʌc'a; ti wi'il tsa' majli.

¹² Jiñi ch'itoñ cuxul tsi' pʌyʌyob sujtel ti yotot, jiñi cha'añ tsa' ñuc-ayob i pusic'al jiñi hermañujob.

I xʌmbal Pablo ti Troas c'ʌlʌl ti Mileto

¹³ Tsa' ochiyon lojon ti barco, tsa' majliyon lojon ti Asón, ya'i tsa' ñumi c pʌy lojon Pablo che' bajche' tsi' ña'ta, come yom i xʌn majlel ti' yoc.

¹⁴ Che' bʌ tsi' tajayon lojon ti Asón, tsa' c pʌyʌ lojon ochel ti barco, tsa' majliyon lojon ti Mitilene.

¹⁵ Ya'i tsa' cha' majliyon lojon ti barco, ti yijc'ʌlal tsa' c'otiyon lojon ti' tojel Quío. Ti' cha'p'ejlel q'uiñ tsa' c'otiyon lojon ti Samos. [Tsa' c ñusa lojon ac'ʌlel ya' ti Trogilio.] Ti' yuxp'ejlel q'uiñ tsa' c'otiyon lojon ti Mileto.

¹⁶ Pablo tsi' ña'ta cha'añ ñumel jach mi' ñumel ti Éfeso cha'añ ma'añic mi' jalijel ya' ti Asia. Woli' i se'ñun i bʌ, come yom c'otel ti Jerusalén cha'añ i q'uiñilel Pentecostés mi muc'ʌch i mejlel.

Cojix bʌ i cʌntesa Pablo ti Mileto

¹⁷ Che' añ to ti Mileto, Pablo tsi' choco ti pʌyol jiñi ancianojob año' bʌ i ye'tel ti' tojlel xñopt'añob ya' ti Éfeso.

¹⁸ Che' bʌ tsa' c'otiyob, Pablo tsi' su'beyob: —La' wujil bajche' tsa' ajñiyon la' wic'ot ti pejtelel ora c'ʌlʌl ti ñaxan bʌ q'uiñ che' bʌ tsa' ochiyon ti Asia.

¹⁹ Tsa' c melbe i ye'tel lac Yum ti' pec'lel c pusic'al, tsi' tajayon ca'bʌl wocol, tsa' c cha'le uq'uel cha'añ jiñi judíojob tsa' bʌ i chijtayoñob;

²⁰ pero la' wujil ma'añic tsa' c bʌc'ña c su'beñetla jiñi am bʌ i c'ʌjñibal la' cha'añ, tsa' j cʌntesayetla ti' wut wiñicob x'ixicob yic'ot ti jujump'ejl la' wotot.

²¹ Tsa' c su'beyob judíojob yic'ot gentilob cha'añ mi' cʌyob i mul cha'añ mi' ñopob Dios. Tsa' c su'beyob cha'añ mi' ñopob lac Yum Jesucristo.

²² Awilan, samiyoñix ti Jerusalén come pʌybiloñix majlel i cha'añ jiñi Ch'ujul bʌ Espíritu, mach cujilic chuqui mi caj c tumbentel ya'i;

²³ cojach cujil jiñi tsa' bʌ i su'beyon jiñi Ch'ujul bʌ Espíritu cha'añ mi caj i tajon wocol ti jujump'ejl tejclum yic'ot mi caj cochel ti mʌjquibʌl.

²⁴ Ma'añic mic bajñel q'uel j cuxtʌlel ti ñuc, anquese mi cʌjq'uel ti chʌmel, com cha'añ tijicña mic ts'ʌctesan que'tel tsa' bʌ aq'uentiyon ti lac Yum Jesús cha'añ mic su'b jiñi wen t'añ cha'añ i yutslel i pusic'al Dios.

²⁵ Awilan, cujil cha'añ mi juntiquilic ti la' tojlel tsa' bʌ c su'beyetla i yumʌntel Dios, mi caj la' chʌn q'uel c wut.

²⁶ Jiñi cha'añ mic su'beñetla wʌle, mach chʌn c wentajix la' cuxtʌlel ti la' pejtelel,

²⁷ ma'añic tsa' c cha'le bʌq'uen, pero ts'ʌcʌl tsa' c su'beyetla i t'añ Dios.

²⁸ Chʌcʌ q'uele la' bʌ che' jiñi. Cʌntanla pejtelel jiñi tʌñʌme', come jiñi Ch'ujul bʌ Espíritu tsi' yʌq'ueyetla la' we'tel ti xcʌntaya cha'añ mi la' we'san jiñi xñopt'añob i cha'año' bʌ lac Yum tsa' bʌ i mʌñʌ ti' bajñel ch'ich'el.

²⁹ Come cujil che' majlemoñix mi caj i yochelob ti la' tojlel jontol bʌ bʌte'el ts'i', mach bʌ añic mi caj i p'untan tʌñʌme'.

³⁰ Mi caj i wa'tʌlob wiñicob ti la' tojlel mu' bʌ i yʌlob sojquem bʌ t'añ cha'añ mi' pʌyob xñopt'añob cha'añ mi' tsajcañob.

³¹ Jiñi cha'añ yom yʌxʌl la' woj, ña'tanla uxp'ejl ja'b ma'añic tsa' j cʌyʌ c xic'beñetla ti jujuntiquiletla ti q'uiñil yic'ot ti ac'ʌlel. Tsa' c cha'le uq'uel.

³² Wʌle, hermañujob, mi cʌq'uetla ti' c'ʌb Dios yic'ot ti' wenta jiñi wen t'añ mu' bʌ i tsictesan i yutslel i pusic'al Dios. Añ i p'ʌtʌlel jiñi t'añ cha'añ mi' xuc'chocon la' pusic'al, cha'añ mi la' wʌq'uentel chuqui tac la' tem cha'añ jach la' wic'ot pejtelel jiñi sʌc-esʌbilo' bʌ.

³³ Ma'añic tsa' c mulʌbeyetla chuqui añ la' cha'añ, mi plata, mi oro, mi pisil.

³⁴ La' wujil, tsa' c cha'le e'tel tij c'ʌb cha'añ i bʌl c ñʌc' yic'ot tsa' we'sa c pi'ʌlob ja'el wʌ' bʌ añob quic'ot.

³⁵ Ti' pejtelel tsa' bʌ c pʌsbeyetla, cha'añ che' mi lac cha'len e'tel che' bajche' iliyi, mi' mejlel laj coltañ jiñi mach bʌ jasʌlobic i chu'bʌañ. Yom mi la' ña'tan i t'añ lac Yum Jesús tsa' bʌ i yʌlʌ: “Ñumen tijicña jiñi mu' bʌ yʌc' majtañʌl che' bajche' jiñi mu' bʌ i ch'ʌm i majtañ”.

³⁶ Che' bʌ tsa' ujti ti t'añ Pablo, tsa' ñocle yic'otob, tsi' comol cha'leyob oración

³⁷ Jiñi cha'añ ti pejtelelob tsi' cha'leyob ca'bʌl uq'uel, tsi' meq'ueyob Pablo, tsi' ts'ujts'uyob.

³⁸ Wen ch'ijiyem tsi' yu'biyob cha'añ tsi' su'beyob cha'añ ma'añix mi caj i chʌn q'uelbeñob i wut. Tsa' majliyob yic'ot Pablo c'ʌlʌl ti barco.