Hechos 17 - Jiñi Tsiji' bʌ Wen T'añ cha'añ Estudio

Ca'bʌl t'añ ya' ti Tesalónica

¹ Pablo yic'ot Silas tsa' ñumiyob ti Anfípolis yic'ot ti Apolonia, tsa' c'otiyob ti Tesalónica ya' ba'añ i sinagoga judíojob.

² Che' bajche' i tilel mi' mel Pablo, tsa' ochi ti sinagoga, uxp'ejl q'uiñ che' ti' q'uiñilel tac c'aj-o tsi' cha'le t'añ yic'ot judíojob,

³ tsi' cʌntesayob ti' Ts'ijbujel Dios cha'añ wersa yom mi' yu'bin wocol jiñi Cristo yic'ot mux i tejchel loq'uel ba'añ chʌmeño' bʌ. Tsi' su'beyob: “Jiñi Jesús woli bʌ c su'b, jiñʌch Cristo”, che'en.

⁴ Lamital judíojob tsi' ñopoyob, tsi' tempayob i bʌ yic'ot Pablo yic'ot Silas; che'ʌch tsi' meleyob ja'el ca'bʌl griegojob tsa' bʌ i ch'ujutesayob Dios, yic'ot ca'bʌl x'ixicob tsa' bʌ q'uejliyob ti ñuc.

⁵ Tsʌytsʌyñayob i pusic'al jiñi judíojob mach bʌ añic tsi' ñopoyob, tsi' pʌyʌyob cha'tiquil uxtiquil jontolo' bʌ wiñicob año' bʌ ti calle, tsi' tempayob ca'bʌl wiñicob tsi' xiq'uiyob ti ca'bʌl t'añ jiñi año' bʌ ti tejclum. Ti ajñel tsa' majliyob ti' yotot Jasón cha'añ mi' ñop i loc'sañob Pablo yic'ot Silas ti' wut wiñicob x'ixicob.

⁶ Che' bʌ ma'añic tsi' tajayob, tsi' chucuyob majlel Jasón yic'ot yaño' bʌ hermañujob ti' tojlel jiñi año' bʌ i ye'tel ya' ti tejclum. C'am tsi' yʌlʌyob: “Ili wiñicob jiñʌch woli bʌ i socob wiñicob x'ixicob ti pejtelel pañimil, wʌ' tsa' tiliyob ja'el ilayi.

⁷ Jiñi Jasón tsi' pʌyʌyob ochel ti' yotot. Ti' pejtelelob woli' contrajibeñob i t'añ César, come mi' su'bob añ yam bʌ rey, i c'aba' Jesús”.

⁸ Che' bʌ tsi' yu'biyob wiñicob x'ixicob yic'ot año' bʌ i ye'tel tsa' cajiyob ti ca'bʌl t'añ.

⁹ Pero che' bʌ tsa'ix i ch'ʌmʌyob multa ti' c'ʌb Jasón yic'ot i pi'ʌlob, tsi' coloyob.

Pablo yic'ot Silas ya' ti Berea

¹⁰ Jiñi hermañujob tsi' bʌc' chocoyob majlel Pablo yic'ot Silas c'ʌlʌl ti Berea che' ti ac'ʌlel. Che' bʌ tsa' c'otiyob ya'i, tsa' ochiyob ti' sinagoga judíojob.

¹¹ Jiñi año' bʌ ti Berea ñumen weñob bajche' jiñi año' bʌ ti Tesalónica come ti jump'ejl jach i pusic'al tsi' jac'ʌyob jiñi t'añ. Ti jujump'ejl q'uiñ tsi' wen q'ueleyob i Ts'ijbujel Dios cha'añ mi' ña'tañob mi isujm chuqui tsa' su'bentiyob.

¹² Jiñi cha'añ ca'bʌl judíojob yic'ot griegojob tsi' ñopoyob, yic'ot x'ixicob tsa' bʌ q'uejliyob ti ñuc.

¹³ Che' bʌ tsi' yu'biyob judíojob año' bʌ ti Tesalónica cha'añ Pablo ya' woli ti subt'añ ya' ti Berea, tsa' majliyob ja'el cha'añ mi' ñijcañob wiñicob x'ixicob ti' contra.

¹⁴ Pero jiñi hermañujob tsi' bʌc' chocoyob majlel Pablo ti' tojel mar; pero Silas yic'ot Timoteo tsa' cʌleyob ya' ti Berea.

¹⁵ Jiñi hermañujob tsa' bʌ majliyob yic'ot Pablo tsi' pʌyʌyob majlel c'ʌlʌl ti Atenas; tsa' sujtiyob cha'añ mi' su'beñob majlel Silas yic'ot Timoteo ti ora ba'añ Pablo ya' ti Atenas.

Pablo ya' ti Atenas

¹⁶ Che' bʌ woli to i pijtañob ya' ti Atenas, tsa' caji i yu'bin i ch'ijiyemlel i pusic'al Pablo, come tsi' q'uele but'ul jiñi tejclum ti dios te'.

¹⁷ Jiñi cha'añ ya' ti sinagoga tsi' wen cha'leyob t'añ Pablo yic'ot judíojob yic'ot gentilob tsa' bʌ i ch'ujutesayob Dios, ti jujump'ejl q'uiñ tsi' pejcayob jiñi tsa' bʌ ajñiyob ti choñoñibʌl.

¹⁸ Ya'añ ca'bʌlo' bʌ i ña'tʌbal i c'aba' epicúreojob yic'ot estoicojob mu' bʌ i sʌclañob isujmlel tac pañimil, tsi' cha'leyob t'añ yic'ot Pablo, lamital tsi' yʌlʌyob: —¿Chuqui to woli i to'ol al ili wiñic? Yaño' bʌ tsi' yʌlʌyob: —Woli' su'b yam bʌ dios. Che'ʌch tsi' yʌlʌyob come Pablo tsi' su'bu Jesús tsa' bʌ cha' ch'ojyi ba'añ chʌmeño' bʌ.

¹⁹ Jiñi cha'añ tsi' chucuyob, tsi' pʌyʌyob majlel ti Areópago, tsi' c'ajtibeyob: —¿Mu' ba i mejlel cu'bin lojon isujmlel jiñi tsijib bʌ cʌntesa woli bʌ a su'b?

²⁰ Come jiñi woli bʌ a su'b maxto u'bibilic c cha'añ lojon, jiñi cha'añ com c ña'tan lojon isujmlel jiñi t'añ.

²¹ (Come ti pejtelel jiñi chumulo' bʌ ti Atenas yic'ot jiñi tilemo' bʌ ti yam bʌ lum mu' jach i ñusañob q'uiñ ti t'añ o mi ñʌch'tañob chuqui tac jach tsijib mi' su'bob).

²² Jiñi cha'añ Pablo tsa' wa'le ti yojlil Areópago, tsi' yʌlʌ: —Wiñicob wʌ' ti Atenas mij q'uel ca'bʌl la' dios mu' bʌ la' ch'ujutesan.

²³ Come che' bʌ tsa' ñumiyon tsa' j q'uele i yotlel tac diosob, tsa' c taja jump'ejl pulʌntib ba' ts'ijbubil jiñi t'añ: JIÑI DIOS MACH BɅ CɅMBILIC. Jiñi Dios mu' bʌ la' ch'ujutesan mach bʌ la' cʌñʌyic, jiñʌch woli bʌ c su'b.

²⁴ Jiñi Dios tsa' bʌ i mele pañimil yic'ot pejtelel i bʌl, jiñʌch i Yum Panchan yic'ot Pañimil, ma'añic mi' chumtʌl ti templo tac melbil bʌ ti' c'ʌb wiñicob,

²⁵ Dios ma'añic mi' taj i coltʌntel ti wiñicob, come ma'añic chuqui añ to yom i cha'añ. Jiñʌch mu' bʌ yʌq'ueñonla laj cuxtʌlel, mu' bʌ i yʌq'ueñonla ic' yic'ot pejtelel lac chu'bʌañ.

²⁶ Loq'uem jach ti juntiquil wiñic, Dios tsi' laj mele wiñicob ti jujunchajp cha'añ mi' pam chumtʌlob ti pejtelel pañimil; tsi' yʌq'ueyob i yorajlel i cuxtʌlel yic'ot tsi' melbeyob i cayajonlel i lumal,

²⁷ cha'añ mi' sʌclañob Dios, cha'añ mi' tajob, anquese isujm mach ñajtic añ Dios ti lac tojlel ti jujuntiquilonla,

²⁸ come tilem ti Dios laj cuxtʌlel yic'ot lac p'ʌtʌlel ti xʌmbal, che' ja'el cuxulonla ti' p'ʌtʌlel, che' bajche' tsi' yʌlʌyob ja'el jiñi xts'ijbayajob la' cha'añ: “Come joñonla ja'el i p'olbalonla”.

²⁹ Mi' p'olbalonla Dios, mach yomic mi la cʌl lajalʌch Dios bajche' oro mi plata, mi xajlel mu' bʌ i melob wiñicob ti' bajñel pusic'al i wenta i yejtal Dios.

³⁰ Ca'bʌl ora Dios tsi' ñusʌbeyob i sajtemal wiñicob tsa' bʌ i meleyob ti yam bʌ ora che' ma'añobic i ña'tʌbal, pero wʌle mi' su'beñob pejtelel wiñicob x'ixicob baqui jach añob, cha'añ mi' cʌyob i mul,

³¹ come Dios tsa'ix i wʌn ña'ta jiñi q'uiñ baqui ora mi caj i cha'len meloñel ti toj, tsa'ix i wa'choco jiñi wiñic mu' bʌ caj i mel jiñi año' bʌ ti pañimil che' bajche' tsi' tsictesʌbeyonla ti isujm cha'añ tsi' teche ch'ojyel Jesús ba'añ chʌmeño' bʌ cha'añ mi lac ñop.

³² Che' bʌ tsi' yu'biyob mi' cha' ch'ojyelob chʌmeño' bʌ, lamital tsi' wajleyob, pero yaño' bʌ tsi' yʌlʌyob: “Ti yan to bʌ ora mic cha' u'bin lojon a t'añ”.

³³ Pablo tsa' loq'ui ti' tojlelob.

³⁴ Pero cha'tiquil uxtiquil tsa' bʌ i ñopoyob Jesús tsi' tsajcayob majlel Pablo, ya'añ ja'el yic'otob Dionisio ch'oyol bʌ ti Areópago yic'ot juntiquil x'ixic i c'aba' Dámaris yic'ot yaño' bʌ.