Hechos 16 - Jiñi Tsiji' bʌ Wen T'añ cha'añ Estudio

Timoteo tsa' majli yic'ot Pablo yic'ot Silas

¹ Ti wi'il tsa' c'oti Pablo ti Derbe yic'ot ti Listra. Awilan ya'añ xcʌnt'añ i c'aba' Timoteo. Judía i ña', xñopt'añʌch ti Cristo, Griego i tat.

² Jiñi hermañujob ti Listra yic'ot ti Iconio tsi' su'buyob cha'añ uts'atʌch i cuxtʌlel Timoteo.

³ Jiñi cha'añ Pablo tsi' ña'ta i pʌy majlel Timoteo, cha'añ mi' tsepben i pʌchʌlel come ti pejtelel judíojob yujilob cha'añ griego i tat.

⁴ Che' bʌ tsa' ñumiyob ti tejclum tac, tsi' su'beyob cha'añ mi' jac'ob jiñi mandar tsa' bʌ i comol ña'tayob jiñi apóstolob yic'ot ancianojob año' bʌ ti Jerusalén.

⁵ Jiñi cha'añ, jiñi xñopt'añob tsa' p'ʌt-esʌntiyob ti' t'añ Dios, tsa' wen p'ojliyob ti jujump'ejl q'uiñ.

Pablo tsi' q'uele wiñic ch'oyol bʌ ti Macedonia

⁶ Tsa' ñumiyob majlel ti Frigia yic'ot ti Galacia, tsa' tijq'uiyob ti Ch'ujul bʌ Espíritu cha'añ ma'añic mi' su'bob jiñi wen t'añ ya' ti Asia.

⁷ Che' bʌ tsa' c'otiyob lʌc'ʌl ti Misia, tsi' ñopoyob i ñumel ti Bitinia, pero i yEspíritu Jesús tsi' tiq'uiyob.

⁸ Che' bʌ tsa' ñumiyob majlel ti Misia, tsa' ju'biyob majlel ti Troas.

⁹ Che' ti ac'ʌlel añ chuqui tsi' q'uele ti' ñajal Pablo, juntiquil wiñic am bʌ ti Macedonia, tsa' wa'le ti' tojel, tsi' c'ajtibe ti wocol t'añ: “La' ti Macedonia, coltañon lojon”, che'en.

¹⁰ Che' bʌ q'uelbilix i cha'añ Pablo, tsa' c chajpa lojon c bʌ ti ora cha'añ mic majlel lojon ti Macedonia, come tsa' c ña'ta lojon isujm tsi' pʌyʌyon lojon Dios cha'añ mic su'b lojon jiñi wen t'añ.

Pablo añ ti mʌjquibʌl ya' ti Filipos

¹¹ Tsa' ochiyon lojon ti barco ya' ti Troas, toj tsa' majliyon lojon c'ʌlʌl ti Samotracia, ti yijc'ʌlal c'ʌlʌl ti Neápolis.

¹² Ti wi'il tsa' majliyon lojon ti Filipos, jiñi ñuc bʌ tejclum ti' lumal Macedonia, jiñʌch jump'ejl xchumtʌl am bʌ ti' wenta Roma. Ya'i, tsa' jal-ayon lojon ti jiñi tejclum.

¹³ Ti' q'uiñilel c'aj-o tsa' loq'uiyon lojon ti ti' tejclum, tsajñiyon lojon ti ti' colem ja' ba' i tilel mi' pejcañob Dios. Tsa' buchleyon lojon, tsa' c cha'le lojon t'añ yic'ot jiñi x'ixicob tsa' bʌ i tempayob i bʌ.

¹⁴ Ya'añ juntiquil x'ixic i c'aba' Lidia, ch'oyol bʌ ti Tiatira, jiñʌch mu' bʌ i chon chʌccojan bʌ pisil. Lidia tsi' bʌc'ña Dios, che' bʌ tsi' ñʌch'tʌbe i cʌntesa Pablo. Lac Yum tsi' jambe i pusic'al cha'añ mi' jac'ben i t'añ.

¹⁵ Che' bʌ tsa' ujti i ch'ʌm ja' yic'ot jiñi año' bʌ ti yotot, tsi' su'beyon lojon: —Conla ti cotot mi tsa' la' q'uele xuc'ulon quic'ot lac Yum, jijlenla ya' ti cotot. Tsi' wersa pʌyʌyon lojon ochel.

¹⁶ Ti yam bʌ q'uiñ che' bʌ woli c majlel lojon ba' mi' cha'leñob oración, juntiquil xch'oc am bʌ i xi'bʌjlel tsa' bʌ mejli i su'beñob wiñicob x'ixicob chuqui tac tal, tsa' tili ba'añon lojon. I yumob tsi' wen cha'leyob ganar cha'añ i ye'tel.

¹⁷ Jiñi xch'oc tsi' tsajcayon lojon majlel quic'ot Pablo, tsi' cha'le c'am bʌ t'añ: —Jiñobʌch i wiñicob Dios am bʌ ti chañ, mu' i bʌ su'beñetla i bijlel la' coltʌntel, —che'en.

¹⁸ Che'ʌch tsi' cha'le t'añ ca'bʌl q'uiñ, Pablo mach chʌn yomix i yu'biben i t'añ, tsi' sutq'ui i bʌ i pejcan, tsi' su'be i xi'bʌjlel: —Mic su'beñet ti' c'aba' Jesucristo, loq'uen ti' pusic'al ili xch'oc. Ti jiñi jach bʌ ora tsa' loq'ui.

¹⁹ Che' bʌ tsi' ña'ta i yumob jiñi xch'oc mach chʌn mejlobix i c'ʌñob ti ganar, tsi' chucuyob Pablo yic'ot Silas, tsi' pʌyʌyob majlel ti choñoñibʌl ti' tojlel año' bʌ i ye'tel.

²⁰ Tsi' su'beyob jiñi año' bʌ i ye'tel, tsi' yʌlʌyob: —Ili judíojob ca'bʌl woli i ñijcañob ti t'añ jiñi chumulo' bʌ wʌ' ti lac tejclum,

²¹ mi' cha'leñob yam bʌ cʌntesa tic'bilon bʌ la cha'añ mi lac ñop yic'ot mi lac mel, come romanojonla.

²² Jiñi cha'añ jiñi wiñicob x'ixicob tsa' caji i contrajiñob Pablo yic'ot Silas; jiñi año' bʌ i ye'tel tsi' tsilbeyob i pislel, tsi' yʌc'ʌyob mandar cha'añ mi' jajts'elob ti asiyal.

²³ Che' bʌ tsa'ix i wen jats'ʌyob, tsi' yotsayob ti mʌjquibʌl, tsi' yʌq'ueyob ti' wenta jiñi xcʌntayajob cha'añ mi' wen cʌntañob.

²⁴ Che' bʌ tsa' su'bentiyob jiñi xcʌntayajob cha'añ mi yotsayob ya' ti cojix bʌ i mal mʌjquibʌl, tsi' ñet'beyob i yoc ti tocol bʌ te'.

²⁵ Pero che' ti ojlil ac'ʌlel, Pablo yic'ot Silas woliyob ti oración yic'ot woli' c'ʌyiñob Dios. Jiñi xñujp'elob woli i yu'biñob.

²⁶ Jiñi cha'añ ti ora tsa' tili tsʌts bʌ i yujquel lum, tsa' ñijcʌyi i c'ʌclib mʌjquibʌl, ti ora tsa' laj jajmi i ti' tac mʌjquibʌl, tsa' jijti i cʌjchil pejtelel jiñi xñujp'elob.

²⁷ Che' bʌ tsa' cajñi i wut jiñi xcʌnta mʌjquibʌl, tsi' q'uele laj jajmeñix i ti' tac mʌjquibʌl, tsi' bots'o i yespada cha'añ mi' tsʌnsan i bʌ, come tsi' lon ña'ta puts'emobix jiñi xñujp'elob.

²⁸ Pero Pablo c'am tsi' cha'le t'añ, tsi' su'be: —Mach a tic'lan a bʌ, umba'añon lojon tic pejtelel lojon.

²⁹ Jiñi xcʌnta mʌjquibʌl tsi' c'ajti c'ajc, ajñel tsa' ochi ti' mal mʌjquibʌl, tsiltsilña ti bʌq'uen tsi' ñocchoco i bʌ ti' t'ejl i yoc Pablo yic'ot Silas.

³⁰ Tsi' pʌyʌyob loq'uel, tsi' c'ajtibeyob: —Wiñicob, ¿chuqui yom mic mel cha'añ mic taj coltʌntel? —Che'en.

³¹ Pablo yic'ot Silas tsi' su'beyob: —Ñopo lac Yum Jesucristo; che' jiñi mi caj a taj a coltʌntel, jatet yic'ot jiñi año' bʌ ti a wotot.

³² Ti wi'il tsa' caji i su'beñob i t'añ lac Yum yic'ot pejtelel jiñi año' bʌ ti' yotot.

³³ Ti jiñi jach bʌ ora ti ac'ʌlel, jiñi xcʌnta mʌjquibʌl tsi' pʌyʌyob majlel ti yotot cha'añ mi' pocbeñob i lojwel tac; che' jiñi tsi' bʌc' ch'ʌmʌ ja' yic'ot pejtelel jiñi año' bʌ ti' yotot.

³⁴ Tsi' pʌyʌyob ochel ti' yotot, tsi' we'sayob, wen tijicña i pusic'al yic'ot pejtelel año' bʌ ti' yotot come tsi' ñopoyob Dios.

³⁵ Che' bʌ tsa' sʌc'a, jiñi año' bʌ i ye'tel tsi' chocoyob majlel xcʌntayajob cha'añ mi' su'beñob jiñi xcʌnta mʌjquibʌl: —Coloxla ili wiñicob.

³⁶ Jiñi xcʌnta mʌjquibʌl tsi' su'be Pablo: —Jiñi año' bʌ i ye'tel tsi' chocoyob tilel mandar cha'añ muq'uix cʌq'uetla ti colel, jiñi cha'añ loq'ueñixla, cucuxla ti' ñʌch'tʌlel la' pusic'al, —che'en.

³⁷ Pero Pablo tsi' su'be jiñi xcʌntaya: —Joñon lojon romanojon lojon, pero tsi' jats'ʌyon lojon ti' wutob wiñicob x'ixicob che' maxto c mele lojon c bʌ yic'ot tsi' yotsayon lojon ti mʌjquibʌl, ¿mu' ba caj i chocon lojon loq'uel ti mucul jach? Isujm mach che'ic yom, la' tilicob i pʌyon lojon loq'uel, —che'en Pablo.

³⁸ Jiñi xcʌntayajob tsa' majliyob ba'añ jiñi año' bʌ i ye'tel cha'añ mi' su'beñob chuqui tsi' yʌlʌ Pablo yic'ot Silas. Jiñi año' bʌ i ye'tel tsi' cha'leyob bʌq'uen che' bʌ tsi' yu'biyob cha'añ romanojob.

³⁹ Jiñi cha'añ tsa' tiliyob ba'añ Pablo yic'ot Silas cha'añ mi' c'ajtiñob i ñusʌntel ti wocol t'añ; tsi' pʌyʌyob loq'uel ti mʌjquibʌl, tsi' c'ajtibeyob cha'añ mi' loq'uelob ti jiñi tejclum.

⁴⁰ Che' jiñi, che' bʌ tsa' loq'uiyob ti mʌjquibʌl, tsa' majliyob ti yotot Lidia. Che' bʌ tsi' q'ueleyob jiñi hermañujob, tsi' ñuq'uesʌbeyob i pusic'al. Ti wi'il tsa' loq'uiyob majlel.