Hechos 15 - Jiñi Tsiji' bʌ Wen T'añ cha'añ Estudio

Tempa bʌ ti Jerusalén

¹ Jiñi cha'añ lamital wiñicob ch'oyolo' bʌ ti Judea tsa' caji i cʌntesañob jiñi hermañujob: “Mi ma'añic mi la' ch'ʌm tsep pʌchʌlel che' bajche' tsi' yʌlʌ Moisés, mach mejlic la' taj la' coltʌntel”.

² Pablo yic'ot Bernabé tsa' caji i cʌlʌx pejcañob i bʌ yic'ot judíojob, tsi' contrajiyob i bʌ ti t'añ. Jiñi cha'añ jiñi hermañujob tsi' wa'chocoyob Pablo yic'ot Bernabé yic'ot cha'tiquil uxtiquil hermañujob cha'añ mi' majlelob ti Jerusalén cha'añ mi' c'ajtiñob isujmlel jiñi tsep pʌchʌlel ti' tojlel apóstolob yic'ot ancianojob.

³ Jiñi chocbilo' bʌ majlel i cha'añ xñopt'añob, tsa' ñumiyob majlel ti Fenicia yic'ot ti Samaria, tsi' su'buyob bajche' tsi' sutq'uiyob i bʌ ja'el jiñi gentilob, tsi' wen ñuq'uesʌbeyob i pusic'al pejtelel jiñi hermañujob.

⁴ Che' bʌ tsa' c'otiyob ti Jerusalén, uts'at tsi' ch'ʌmʌyob ti' wenta jiñi apóstolob yic'ot ancianojob yic'ot jiñi xñopt'añob, tsi' su'buyob pejtelel chuqui tac tsi' mele Dios yic'otob.

⁵ Lamital fariseojob tsa'ix bʌ i ñopoyob Cristo tsa' wa'leyob, tsi' yʌlʌyob: —Wersa yom mi' ch'ʌmob tsep pʌchʌlel yic'ot wersa yom mi' xic'bentelob cha'añ mi' jac'beñob i mandar Moisés.

⁶ Che' jiñi, jiñi apóstolob yic'ot ancianojob tsi' tempayob i bʌ cha'añ mi' wen ña'tañob bajche' yom.

⁷ Che' bʌ tsa'ix i cha'leyob ca'bʌl t'añ, Pedro tsa' wa'le, tsi' su'beyob: —Hermañujob, la' wujil añix ora Dios tsi' yajcayon cha'añ mic su'beñob gentilob jiñi wen t'añ cha'añ mi' ñopob.

⁸ Jiñi Dios mu' bʌ i cʌmben i pusic'al wiñicob x'ixicob, tsi' yʌc'ʌ ti tsictiyel cha'añ woli ch'ʌmob ti' wenta che' bʌ tsi' yʌq'ueyob jiñi Ch'ujul bʌ Espíritu che' bajche' tsi' yʌq'ueyonla ja'el.

⁹ Lajal tsi' q'ueleyob che' bajche' tsi' q'ueleyonla, tsi' sʌc-esʌbeyob i pusic'al che' bʌ tsi' ñopoyob.

¹⁰ Jiñi cha'añ ¿chucoch che' jiñi, mi la' wilʌben i pusic'al Dios? Yic'ot ¿chucoch mi la' wʌq'uen jiñi xñopt'añob i cuch jiñi wocol tac bʌ? Ma'añic tsa' mejli lac lʌt' joñonla mi jiñic lac ñojte'elob.

¹¹ Pero mi lac ñop mi caj laj coltʌntel cha'añ ti' yutslel i pusic'al lac Yum Jesús, che'ʌch mi caj i coltʌntelob jiñi gentilob ja'el.

¹² Ti pejtelel jiñi tempʌbilo' bʌ tsa' ñʌjch'iyob. Tsi' yu'bibeyob i t'añ Bernabé yic'ot Pablo che' bʌ tsi' su'buyob chuqui tac ñuc tsi' mele Dios ti' tojlelob yic'ot i yejtal tac i p'ʌtʌlel yic'ot bʌbʌq'uen tac bʌ ti' tojlel gentilob.

¹³ Che' bʌ tsa' ujtiyob ti t'añ, Jacobo tsa' caji ti t'añ, tsi' yʌlʌ: —Hermañujob, ñʌch'tʌbeñonla c t'añ.

¹⁴ Simón tsa' ujti i su'beñetla bajche' Dios tsa' caji i pʌsbeñob gentilob i yutslel i pusic'al che' bʌ tsi' yajca wiñicob x'ixicob cha'añ mi' tsictesʌbeñob i ñuclel i c'aba'.

¹⁵ Che'ʌch ja'el tsi' yʌlʌyob x'alt'añob, che' bajche' ts'ijbubil:

¹⁶ “Ti wi'il mi caj c cha' tilel, mi caj c cha' wa'chocon i yotot David tsa' bʌ yajli, mi caj c cha' mel jiñi p'ulul bʌ tsa' bʌ cʌle, mi caj c cha' wa'chocon,

¹⁷ cha'añ mi' sʌclañob lac Yum i colojbal wiñicob yic'ot pejtelel gentilob cha'añ mi yʌc'ob ti cʌjñel j c'aba',

¹⁸ che' woli' yʌl lac Yum tsa' bʌ i yʌc'ʌ ti cʌjñel c'ʌlʌl ti wajali”.

¹⁹ Jiñi cha'añ mi cʌl mach weñic mi' lac mʌctañ gentilob mu' bʌ i sutq'uiñob i bʌ cha'añ mi' ñopob Dios.

²⁰ Cojach yom mi la' ts'ijbubeñob ti juñ cha'añ mi' cʌyob i c'ux chuqui tac aq'uebil dios te', yic'ot chuqui tac milbil yic'ot i ch'ich'el, yic'ot cha'añ mi' cʌyob i ts'i'lel ja'el,

²¹ come c'ʌlʌl ti wajali añ ti jujump'ejl tejclum jiñi mu' bʌ i su'bob i t'añ Moisés ti sinagoga ba' mi' q'uejlel i juñ Moisés ti jujump'ejl i q'uiñilel c'aj-o.

²² Jiñi cha'añ jiñi apóstolob yic'ot ancianojob yic'ot pejtelel jiñi xñopt'añob mu' bʌ i tempañob i bʌ, tsi' ña'tayob cha'añ uts'at mi' yajcañob wiñicob ti' tojlel hermañujob cha'añ mi' chocob majlel ti Antioquía temel yic'ot Pablo yic'ot Bernabé. Tsi' yajcayob Silas yic'ot Judas, jiñi am bʌ i cha'chajplel i c'aba' ti Barsabás, jiñobʌch ñuc bʌ wiñicob ti' tojlel hermañujob.

²³ Tsi' meleyob carta, tsi' yʌlʌyob: “Joñon lojon apóstolon bʌ lojon yic'ot ancianojon bʌ lojon quic'ot la quermañujob, woli c melbeñetla jiñi juñ hermañujob, gentilet bʌ la ya' ti Antioquía yic'ot ti Siria yic'ot ti Cilicia. Mi cʌq'ueñetla cortesía.

²⁴ Tsa'ix cu'bi lojon añ wiñicob tsa' bʌ loq'uiyob tic tojlel lojon tsa' bʌ i tic'layetla ti' t'añ, tsi' socbeyetla la' pusic'al, [come tsi' yʌlʌyob wersa mi la' ch'ʌm tsep pʌchʌlel, wersa mi la' jac' jiñi mandar,]

²⁵ jiñi cha'añ, che' bʌ tempʌbilon lojon tsa' c ña'ta lojon uts'at mic yajcan lojon wiñicob cha'añ mic choc lojon tilel ba'añetla temel yic'ot Bernabé yic'ot Pablo jiñi mu' bʌ j c'uxbin lojon,

²⁶ ili wiñicob tsi' yʌc'ʌyob i bʌ ba' bʌbʌq'uen mi' chʌmelob cha'añ ti' caj i c'aba' lac Yum Jesucristo.

²⁷ Jiñi cha'añ woli c choc lojon tilel Judas yic'ot Silas cha'añ mi' wen su'beñetla isujmlel ili carta,

²⁸ come joñon lojon yic'ot jiñi Ch'ujul bʌ Espíritu tsa' c ña'ta lojon mach yomic mi cʌq'ueñetla la' cuch chuqui tac wocol ti' jac'ol. Cojach jiñi yom:

²⁹ Cʌyʌ la' c'ux jiñi tsʌnsʌbil bʌ i majtañ dios te' yic'ot i ch'ich'el yic'ot jiñi milbil bʌ, mach mi la' cha'len ts'i'lel; mi uts'at mi la' cʌntan la' bʌ cha'añ pejtelel jiñi, uts'at mi la' mel, ajñenla ti la' wenlel”.

³⁰ Jiñi cha'añ, jiñi yajcʌbilo' bʌ tsa' ju'biyob majlel ti Antioquía, che' bʌ tsi' tempayob jiñi xñopt'añob, tsi' yʌq'ueyob jiñi juñ.

³¹ Che' bʌ tsa' ujti i pejcañob jiñi juñ, wen tijicña tsi' yu'biyob come tsa' ñuq'uesʌbentiyob i pusic'al.

³² Judas yic'ot Silas, x'alt'añobʌch ja'el, tsi' ñuq'uesʌbeyob i pusic'al jiñi hermañujob ti' cʌntesa yic'ot tsi' xuc'chocobeyob i pusic'al.

³³ Che' bʌ tsa'ix jal-a yic'otob, ti wi'il jiñi hermañujob tsi' chocoyob sujtel ti ñʌch'tʌlelob i pusic'al cha'añ mi' cha' sujtelob ba'añ i pi'ʌlob tsa' bʌ i yʌq'ueyob i ye'tel

³⁴ [Silas tsi' ña'ta uts'at mi' cʌytʌl ya'i.]

³⁵ Pablo yic'ot Bernabé tsa' cʌleyob ti Antioquía, tsi' chʌn cʌntesayob ti' t'añ lac Yum. Ca'bʌl wiñicob tsa' majliyob yic'ot ti subt'añ.

I CHA'YAJLEL I XɅMBAL PABLO

³⁶ Che' ñumeñix cha'p'ejl uxp'ejl q'uiñ, Pablo tsi' su'be Bernabé: —Conla c cha' jula'tan la quermañujob ti pejtelel tejclum ba' tsa' lac su'beyob i t'añ lac Yum cha'añ mi laj q'uel bajche' yilalob, —che'en.

³⁷ Bernabé yom i pʌy majlel Juan am bʌ i cha'chajplel i c'aba' ti Marcos,

³⁸ pero Pablo mach yomic i pʌy majlel, come tsi' tʌts'ʌ i bʌ ti' tojlelob che' bʌ ya'añob ti Panfilia. Ma'añix tsi' chʌn tsʌcleyob majlel ti e'tel.

³⁹ Cha'chajpob i ña'tʌbal, jiñi cha'añ tsi' t'oxoyob i bʌ; Bernabé tsi' pʌyʌ majlel Marcos ti barco, tsa' majliyob ti Chipre.

⁴⁰ Pablo tsi' yajca Silas, che' jiñi, jiñi hermañujob tsi' yʌc'ʌyob ti' c'ʌb lac Yum cha'añ mi' yajñelob ti' yutslel i pusic'al lac Yum.

⁴¹ Tsa' ñumiyob majlel ti Siria yic'ot ti Cilicia, tsi' xuc'choco xñopt'añob baqui jach tsi' tempayob i bʌ.