Hechos 14 - Jiñi Tsiji' bʌ Wen T'añ cha'añ Estudio

Pablo yic'ot Bernabé ya' ti Iconio

¹ Che' bʌ tsa' ochiyob ti' sinagoga judíojob ya' ti Iconio, tsi' wen cha'leyob subt'añ, jiñi cha'añ wen ca'bʌl judíojob tsi' ñopoyob yic'ot griegojob.

² Pero jiñi judíojob mach bʌ añic tsi' ñopoyob, tsi' ñijcayob ti mich'ajel jiñi gentilob ti' contra jiñi hermañujob.

³ Jiñi cha'añ Pablo yic'ot Bernabé tsa' jal-ayob ya'i, tsi' cha'leyob t'añ ti' ch'ejlelob i pusic'al come xuc'ulob ti lac Yum. Lac Yum tsi' yʌq'ueyob i pʌs i yejtal i p'ʌtʌlel yic'ot bʌbʌq'uen tac bʌ cha'añ mi' tsictiyel isujmlel i t'añ Dios yic'ot i yutslel Dios.

⁴ Jiñi wiñicob ya' ti tejclum tsi' t'oxoyob i bʌ, ojlil tsi' jac'beyob i t'añ jiñi judíojob, jiñi yam bʌ ojlil tsi' jac'beyob i t'añ jiñi apóstolob.

⁵ Tsi' tem chajpayob i bʌ gentilob yic'ot judíojob yic'ot jiñi yumʌlob i cha'añ, cha'añ mi' tic'lañob Pablo yic'ot Bernabé yic'ot cha'añ mi' julob ti xajlel.

⁶ Che' bʌ ña'tʌbilobix i cha'añ Pablo yic'ot Bernabé tsa' puts'iyob majlel ti Listra yic'ot ti Derbe, yic'ot ti tejclum tac ya' ti Licaonia, yic'ot ti' joytʌlel,

⁷ ya'i tsi' su'buyob majlel jiñi wen t'añ.

Pablo tsa' jujli ti xajlel ya' ti Listra

⁸ Ya' ti Listra ya' buchul juntiquil wiñic mach bʌ weñic i yoc c'ʌlʌl che' bʌ tsi' yila pañimil. Ma'añic ba' ora tsa' mejli ti xʌmbal.

⁹ Jiñi wiñic tsi' yu'bibe i t'añ Pablo, tsi' ch'ujch'uj q'uelbe i wut, che' jiñi tsi' ña'ta ñopol i cha'añ jiñi wiñic cha'añ mi mejlel i c'oc'an.

¹⁰ Ti wen c'am bʌ i t'añ tsi' su'be: —Ch'ojyen, wa'i'. Jiñi wiñic tsa' tijp'i, tsa' caji ti xʌmbal.

¹¹ Che' bʌ tsi' q'ueleyob wiñicob x'ixicob chuqui tsi' mele Pablo, jiñi año' bʌ ti Licaonia c'am tsi' cha'leyob t'añ, tsi' yʌlʌyob ti' t'añ licaoniajob: “Tsa'ix ju'biyob tilel diosob ti lac tojlel che' bajche' wiñic cha'añ mi' jula'tañonla”.

¹² Bernabé tsi' pejcayob ti Júpiter. Pablo tsi' pejcayob ti Mercurio, come Pablo jiñʌch jiñi tsa' bʌ i su'bu jiñi t'añ.

¹³ Jiñi motomaj cha'añ Júpiter, ya'añ ti' yotlel jiñi dios am bʌ ti ti' jiñi tejclum, tsi' ch'ʌmʌyob tilel ti ti' tejclum i tat wacax che' ch'ʌlbil ti' ñich pimel. Jiñi motomajob yic'ot pejtelel wiñicob x'ixicob yom i tsʌnsʌbeñob i majtañ Pablo yic'ot Bernabé.

¹⁴ Che' bʌ tsi' yu'biyob chuqui woli i ña'tan i melob ti' tojlel jiñi apóstolob, Bernabé yic'ot Pablo tsi' tsiliyob i pislel, tsa' ñumiyob ti ajñel ba' motocñayob, tsi' cha'leyob c'am bʌ t'añ,

¹⁵ tsi' yʌlʌyob: —Wiñicob, ¿chucoch mi la' mel che' bajche' iliyi? Joñon lojon wiñicon jach lojon ja'el che' bajche'etla. Woli c su'b lojon cha'añ yom mi la' cʌy jiñi lolom jach bʌ la' melbal cha'añ mi la' ñop jiñi cuxul bʌ Dios tsa' bʌ i mele panchan yic'ot pañimil yic'ot mar yic'ot pejtelel i bʌl.

¹⁶ Anquese ti yam bʌ ora Dios tsi' yʌq'ueyob i mel wiñicob x'ixicob che' bajche' jach bajñel yomob,

¹⁷ pero ma'añic tsi' cʌyʌ i pʌs wen bʌ i ye'tel. Tsi' yʌq'ueyonla ja'al tilem bʌ ti panchan yic'ot tsi' yʌc'ʌ ti wut pʌc'ʌbʌl tac che' ti yorajlel cha'añ i bʌl lac ñʌc' yic'ot cha'añ i tijicñʌyel lac pusic'al.

¹⁸ Anquese tsi' yʌlʌyob pejtelel iliyi, wocol tsa' mejli i tic'ob jiñi wiñicob x'ixicob cha'añ ma'añic mi' tsʌnsʌbeñob i majtañ.

¹⁹ Ti jim bʌ ora tsa' tiliyob judíojob ch'oyolo' bʌ ti Antioquía yic'ot ti Iconio, tsi' jembeyob i ña'tʌbal jiñi wiñicob x'ixicob, tsa' caji i contrajiñob Pablo yic'ot tsi' juluyob ti xajlel, tsi' tujc'ayob loq'uel ti ti' tejclum come tsi' lon ña'tayob chʌmeñix.

²⁰ Pero che' joyolob i cha'añ xñopt'añob, tsa' ch'ojyi Pablo, tsa' ochi ti tejclum. Ti yijc'ʌlal tsa' majli ti Derbe temel yic'ot Bernabé.

²¹ Che' bʌ tsa'ix i su'buyob jiñi wen t'añ ya' ti Derbe ba' tsi' cʌntesayob ca'bʌl wiñicob x'ixicob, Pablo yic'ot Bernabé tsa' cha' majliyob ti Listra yic'ot ti Iconio yic'ot ti Antioquía.

²² Tsi' ch'ejl-esʌbeyob i pusic'al xñopt'añob, tsi' xic'beyob cha'añ xuc'ul mi' chʌn ñopob i t'añ Dios yic'ot tsi' su'beyob: “Wersa yom mi lac ñusan ca'bʌl wocol cha'añ mi la cochel ti' yumʌntel Dios”.

²³ Tsi' wa'chocoyob ancianojob ti jujump'ejl tejclum ba'añ xñopt'añob. Che' bʌ tsa' ujtiyob ti oración yic'ot ch'ajb, tsi' yʌc'ʌyob ti' c'ʌb lac Yum jiñi tsa' bʌ i ñopoyob.

Tsa' sujtiyob ti Antioquía che' ya'añob ti Siria

²⁴ Tsa' ñumiyob majlel ti Pisidia, tsa' c'otiyob ti Panfilia.

²⁵ Che' bʌ tsa'ix i su'buyob jiñi wen t'añ ya' ti Perge, tsa' ju'biyob tilel ti Atalía.

²⁶ Ya' ti Atalía tsa' ochiyob ti barco cha'añ mi' sujtelob ti Antioquía ya' ba' tsi' c'ajtibeyob i yutslel i pusic'al Dios cha'añ jiñi e'tel tsa' bʌ i meleyob Pablo yic'ot Bernabé.

²⁷ Che' bʌ tsa' c'otiyob, tsi' tempayob i bʌ jiñi xñopt'añob. Pablo tsi' su'beyob pejtelel chuqui tac wen ñuc tsi' mele Dios yic'otob, yic'ot che' bajche' tsi' jambeyob i pusic'al gentilob cha'añ mi' ñopob ja'el.

²⁸ Pablo yic'ot Bernabé jal tsa' cʌleyob yic'ot jiñi xñopt'añob ya'i.