Hechos 13 - Jiñi Tsiji' bʌ Wen T'añ cha'añ Estudio

ÑAXAN BɅ I XɅMBAL PABLO

¹ Ya'añob x'alt'añob yic'ot xcʌntesajob ti' tojlel xñopt'añob año' bʌ ti Antioquía: I c'aba'ob Bernabé, yic'ot Simón, jiñi am bʌ i cha'chajplel i c'aba' Niger, yic'ot Lucio ch'oyol bʌ ti Cirene, yic'ot Saulo, yic'ot Manaén, jiñi tsa' bʌ tem coli yic'ot jiñi yumʌl Herodes.

² Che' bʌ woliyob ti ch'ajb yic'ot che' bʌ woli i ch'ujutesañob lac Yum, jiñi Ch'ujul bʌ Espíritu tsi' su'beyob: “Wa'choconla Bernabé yic'ot Saulo come pʌybilob cha'añ mi' melob jiñi e'tel tsa' bʌ c chajpʌbeyob”, che'en.

³ Che' bʌ tsa' ujtiyob ti ch'ajb yic'ot oración, tsi' yʌc'ʌyob i c'ʌb ti' jol, che' jiñi tsi' chocoyob majlel.

Tsa' sujbi i t'añ Dios ti Chipre

⁴ Bernabé yic'ot Saulo tsa' ju'biyob majlel ti Seleucia, come chocbilob majlel i cha'añ jiñi Ch'ujul bʌ Espíritu, ya'i tsa' ochiyob ti barco cha'añ mi' majlelob ti Chipre.

⁵ Che' bʌ tsa' c'otiyob ti Salamina tsa' caji i su'bob i t'añ Dios ti' sinagoga tac judíojob. Tsi' pʌyʌyob majlel ja'el Juan cha'añ mi' coltañob ti' ye'tel lac Yum.

⁶ Che' bʌ tsa'ix i laj xʌñʌyob ñumel jiñi lum joyol bʌ ti ja', tsa' c'ʌlʌl c'otiyob ti Pafos, ya'i tsi' tajayob juntiquil xwujt, jiñʌch judío, xlot bʌ x'alt'añ i c'aba' Barjesús.

⁷ Ya'añ Barjesús yic'ot jiñi gobernador Sergio Paulo. Wen p'ip' i ña'tʌbal, tsi' choco ti pʌyol Bernabé yic'ot Saulo come yom i yu'bin i t'añ Dios.

⁸ Jiñi xwujt Elimas (jiñʌch i c'aba' ti yam bʌ t'añ), tsi' ñopo i mʌctañ i t'añ Dios ame i ñop jiñi am bʌ i ye'tel.

⁹ Jiñi cha'añ Saulo, i c'aba'ʌch Pablo ja'el, but'ul ti Ch'ujul bʌ Espíritu, tsi' ch'ujch'uj q'uelbe i wut jiñi xwujt,

¹⁰ tsi' su'be: —¡I yalobilet xi'ba, but'ulet ti ca'bʌl lot yic'ot ca'bʌl jontolil, i contrajet pejtelel chuqui tac toj! ¿Chucoch ma'añic ma' cʌy a xoyben jiñi toj bʌ i bijlel lac Yum?

¹¹ Wʌle mi' cajel i contrajiñet lac Yum; mi caj a wochel ti xpots', ca'bʌl ora ma'añic mi caj a q'uel i c'ʌc'al q'uiñ. Ti ora tsa' yajpi i wut, tsa' ochi ti ac'ʌlel yilal. Tsi' sajca majqui mi' toj-esan majlel ti' c'ʌb.

¹² Jiñi cha'añ jiñi am bʌ i ye'tel, che' bʌ tsi' q'uele chuqui tsa' ujti, tsi' ñopo i t'añ Dios, tsa' toj sajti i pusic'al cha'añ i cʌntesa lac Yum.

Pablo yic'ot Bernabé ti Antioquía

¹³ Che' bʌ tsa' loq'uiyob ti Pafos, Pablo yic'ot i pi'ʌlob tsa' c'otiyob ti Perge ti Panfilia; pero Juan tsi' tʌts'ʌ i bʌ ti' tojlelob, tsa' sujti majlel ti Jerusalén.

¹⁴ Pablo yic'ot i pi'ʌlob tsa' ñumiyob ti Perge, tsa' c'otiyob ti Antioquía ti Pisidia, ya'i tsa' ochiyob ti sinagoga che' ti' q'uiñilel c'aj-o, tsa' buchleyob.

¹⁵ Che' bʌ tsa' ujti i q'uelob jiñi ts'ijbubil bʌ mandar yic'ot i ts'ijbujel x'alt'añob, jiñi yumʌlob ti sinagoga tsi' chocoyob majlel wiñicob cha'añ mi' su'beñob: —Wiñicob, c pi'ʌlob, mi añ chuqui la' wom la' su'beñob wiñicob x'ixicob cha'añ mi la' ñuq'uesʌbeñob i pusic'al, su'bula.

¹⁶ Jiñi cha'añ Pablo tsa' wa'le, tsi' pʌsbeyob i c'ʌb cha'añ mi' ñʌjch'elob, tsi' yʌlʌ: —U'binla israelob, yic'ot mu' bʌ la' bʌc'ñan Dios:

¹⁷ I Dios israelob tsi' yajca lac ñojte'el tsi' yʌq'ueyob i ñuclel che' ya'añob ti' lumal Egipto ba' mach bʌ i lumalobic, ti' p'ʌtʌlel i c'ʌb tsi' pʌyʌyob loq'uel ti Egipto.

¹⁸ Cha'c'al ja'b tsi' chʌn cuchbeyob i sajtemal yic'ot tsi' cʌntayob ya' ti jochol bʌ lum,

¹⁹ yic'ot tsi' jisʌbeyob i p'ʌtʌlel wuctiquil yumʌlob ya' ti' lumal Canaán, che' jiñi Dios tsi' t'oxbeyob lac ñojte'el i lumal Canaán.

²⁰ Tsa' jal-a pejtelel iliyi lujump'ejl i yuxc'al i cha'bajc' (450) ja'b. Dios tsi' yʌq'ue juezob c'ʌlʌl ti' yorajlel jiñi x'alt'añ Samuel.

²¹ Ti wi'il, tsi' c'ajtiyob i rey. Dios tsi' wa'chocobeyob Saúl i yalobil Cis, loq'uem bʌ ti' p'olbal Benjamín. Cha'c'al ja'b tsi' mele i ye'tel.

²² Dios tsi' choco loq'uel ti' ye'tel Saúl, tsi' wa'choco David ti' rey israelob. Dios tsi' yʌc'ʌ ti cʌjñel David che' bʌ tsi' yʌlʌ: “Yajcʌbilix c cha'añ David, i yalobil Isaí, c wiñic uts'at bʌ mij q'uel, mu' bʌ caj i mel pejtelel chuqui com”, che'en.

²³ Dios tsi' ts'ʌctesa i t'añ che' bʌ tsi' choco tilel ti Israel juntiquil xColtaya, loq'uem bʌ ti' p'olbal David, jiñʌch Jesús.

²⁴ Che' maxto tilemic Jesús, Juan tsi' su'beyob cha'añ mi' cʌyob i mul pejtelel israelob yic'ot cha'añ mi' ch'ʌmob ja'.

²⁵ Che' wolix ti ts'ʌctiyel i ye'tel Juan, tsi' yʌlʌ: “¿Majquiyon mi la' wʌl? Mach joñoñic jiñi tal to bʌ, pero tal to tic pat juntiquil ñuc bʌ, mach uts'atoñic cha'añ mic ticben i xʌñʌb am bʌ ti yoc”, che'en.

²⁶ Hermañujob, i p'olbalet bʌ la Abraham, jatetla gentilob mu' bʌ la' bʌc'ñan Dios, tsa' chocbentiyetla tilel jiñi t'añ cha'añ mi la' coltʌntel,

²⁷ come jiñi chumulo' bʌ ti Jerusalén yic'ot i yumob ma'añic tsi' cʌñʌyob Jesús, ma'añic tsi' ch'ʌmbeyob isujm i t'añ jiñi x'alt'añob mu' bʌ i q'uelob ti jujump'ejl i q'uiñilel c'aj-o, tsi' ts'ʌctesʌbeyob i t'añ x'alt'añob che' bʌ tsi' yʌc'ʌyob ti chʌmel Jesús.

²⁸ Anquese ma'añic chuqui tsi' wis tajayob ti' contra cha'añ mi' tsʌnsañob, pero tsi' c'ajtibeyob Pilato cha'añ mi' yʌc' ti chʌmel.

²⁹ Che' bʌ tsa'ix i ts'ʌctesayob pejtelel chuqui ts'ijbubil, tsi' ju'sayob ti te', tsi' yotsayob ti mucoñibʌl.

³⁰ Pero Dios tsi' teche ch'ojyel ba'añ chʌmeño' bʌ.

³¹ Ca'bʌl q'uiñ tsi' q'ueleyob Jesús jiñi tsa' bʌ letsiyob majlel yic'ot ti' bijlel Galilea c'ʌlʌl ti Jerusalén, testigojob jiñi tsa' bʌ i q'ueleyob.

³² Joñon lojon ja'el mic su'b lojon jiñi wen t'añ tsa' bʌ wʌn su'bentiyob lac ñojte'el che' bʌ tsi' yʌc'ʌ xuc'ul bʌ i t'añ Dios.

³³ Dios tsi' ts'ʌctesʌbeyonla i t'añ, i yalobilon bʌ la Israel che' bʌ tsi' cha' teche ch'ojyel Jesús. Che'ʌch ts'ijbubil ja'el ti' cha'p'ejlel salmo: “Jatet calobilet. Sajmʌl tsa' c techeyet calobil”, che'en.

³⁴ Dios tsi' teche ch'ojyel Jesús ba'añ chʌmeño' bʌ, cha'añ ma'añic mi' yʌc' ti oc'mʌl, che'ʌch tsa' ts'ʌctiyi ili t'añ: “Mi caj c pʌsbeñetla i yutslel c pusic'al mach bʌ mejlic ti q'uextʌyel che' bajche' tsa' c pʌsbe David”, che'en.

³⁵ Jiñi cha'añ mi' yʌl ja'el ti yam bʌ salmo: “Ma'añic mi caj a wʌc' ti oc'mʌl Ch'ujul bʌ a Walobil”, che'en.

³⁶ Che' bʌ tsa' ujti i coltañ i pi'ʌlob che' bajche' yom Dios, tsa' chʌmi David, tsa' mujqui ba' mucul i ñojte'el, tsa' oc'mʌ.

³⁷ Pero ma'añic tsa' oc'mʌ i bʌc'tal jiñi tsa' bʌ i teche ch'ojyel Dios.

³⁸ Ña'tanla quermañujob, cha'añʌch ti' ye'tel Jesús tsa' ñusʌnti la' mul.

³⁹ Cha'añ ti' ye'tel Jesucristo, pejtelel mu' bʌ i ñopob mi' ch'ʌjmelob ti' wenta Dios che' ñusʌbilix i mul; ma'añic tsa' mejli la' ch'ʌjmel ti' wenta cha'añ ti' jac'ol i mandar Moisés.

⁴⁰ Chʌcʌ q'uele la' bʌ, che' jiñi, ame i tajetla jiñi ts'ijbubil bʌ ti' juñ x'alt'añob:

⁴¹ “Q'uelela xts'a'leyajet bʌ la, la' toj sajtic la' pusic'al, la' jiliquetla, come joñon woli c mel junchajp e'tel ti la' wut mach bʌ añic mi caj la' ñop anquese añ majqui mi' su'beñetla”, che'en Pablo.

⁴² Che' woli' loq'uelob Pablo yic'ot Bernabé ti' sinagoga judíojob, jiñi gentilob tsi' c'ajtibeyob ti wocol t'añ cha'añ ti yan to bʌ i q'uiñilel c'aj-o mi' cha' su'beñob jiñi jach bʌ t'añ.

⁴³ Che' bʌ tsa'ix ujti jiñi tempa bʌ ti sinagoga, ca'bʌl xuc'ulo' bʌ judíojob yic'ot gentilob mu' bʌ i ch'ujutesañob Dios, tsi' tsajcayob majlel Pablo yic'ot Bernabé. Jiñi cha'añ tsi' pejcayob yic'ot tsi' xic'beyob cha'añ mi' chʌn ajñelob ti' yutslel i pusic'al Dios.

⁴⁴ Che' bʌ tsa' cha' c'oti i q'uiñilel c'aj-o, yoma ti' pejtelel jiñi año' bʌ ya' ti jiñi tejclum tsi' tempayob i bʌ cha'añ mi' yu'bibeñob i t'añ lac Yum.

⁴⁵ Pero jiñi judíojob, che' bʌ tsi' q'ueleyob ca'bʌl wiñicob x'ixicob, tsa' tejchiyob i mich'ajel, tsi' cha'leyob t'añ ti' contra i cʌntesa Pablo, tsi' p'ajayob.

⁴⁶ Jiñi cha'añ Pablo yic'ot Bernabé ch'ejlob i pusic'al, tsi' su'buyob: —Isujm jatetla wersa tsa' ñaxan su'bentiyetla i t'añ Dios; pero tsa'ix la' q'uele ti lolom, woli la' ñusan la' cuxtʌlel mach bʌ añic mi' jilel, jiñi cha'añ muq'uix c majlel lojon ba'añ gentilob,

⁴⁷ come che'ʌch tsi' yʌq'ueyon lojon mandar lac Yum. Tsi' yʌlʌ: “Tsa'ix c wa'chocoyet cha'añ ma' pʌsbeñob i sʌclel pañimil jiñi gentilob, cha'añ mi' tajob i coltʌntel c'ʌlʌl ti' petol pañimil”.

⁴⁸ Jiñi gentilob wen tijicñayob che' bʌ tsi' yu'biyob jiñi t'añ, tsi' su'buyob wen ñuc i t'añ lac Yum. Jiñi tsa' bʌ yajcʌntiyob cha'añ mi' tajob i cuxtʌlel mach bʌ añic mi' jilel, tsi' laj ñopoyob.

⁴⁹ Tsa' pujqui i t'añ lac Yum ti pejtelel jiñi lum.

⁵⁰ Pero jiñi judíojob tsi' xic'beyob jiñi x'ixicob xuc'ulo' bʌ mi' ch'ujutesañob Dios, mu' bʌ i q'uejlelob ti ñuc, yic'ot jiñi ñuco' bʌ ti jiñi tejclum, cha'añ mi' tic'lañob Pablo yic'ot Bernabé. Tsi' chocoyob loq'uel ti' lumal.

⁵¹ Che' jiñi tsi' tijcayob loq'uel i ts'u'bejñal i yoc ti' contra jiñi tejclum. Tsa' majliyob ti Iconio.

⁵² Jiñi xñopt'añob wen tijicñayob i pusic'al yic'ot but'ulob ti Ch'ujul bʌ Espíritu.