Hechos 12 - Jiñi Tsiji' bʌ Wen T'añ cha'añ Estudio

Tsa' chʌmi Jacobo; Pedro tsa' ochi ti mʌjquibʌl

¹ Ti jiñi jach bʌ ora jiñi rey Herodes tsa' caji i tic'lan lamital jiñi xñopt'añob mu' bʌ i tempañob i bʌ.

² Tsi' tsʌnsa Jacobo ti espada, i yʌscun Juan.

³ Che' bʌ tsi' q'uele Herodes tijicñayob judíojob cha'añ tsi' tsʌnsa Jacobo, tsi' chucu Pedro ja'el. Tsa' ujti iliyi che' ti' q'uiñilelix pan mach bʌ añic i levadurajlel.

⁴ Che' bʌ tsa'ix i chucu Pedro, tsi' yotsa ti mʌjquibʌl, tsi' yʌq'ue ti' wenta jiñi chʌnmojt soldadojob, chʌnchʌntiquil soldado ti jujunmojt cha'añ mi' cʌntan. Herodes tsi' ña'ta i loc'san Pedro che' ñumeñix Pascua cha'añ mi' cha'len meloñel ti' wut jiñi tejclum.

⁵ Che' bʌ Pedro cʌntʌbil ti mʌjquibʌl, jiñi xñopt'añob tsi' chʌn cha'leyob oración ti' ch'ejlelob i pusic'al ti' tojlel Dios cha'añ Pedro.

Pedro tsa' loq'ui ti mʌjquibʌl

⁶ Ti jiñi jach bʌ ac'ʌlel Herodes che' yomix i pʌy loq'uel Pedro cha'añ muq'uix i yʌq'ueñ i mel i bʌ, wʌyʌl Pedro, xinlʌpʌl añ ti' tojlel cha'tiquil soldadojob, cʌchʌl ti cha't'ujm cadena. Jiñi xcʌntayajob woli' cʌntañob i ti' mʌjquibʌl ti jumpat.

⁷ Awilan, tsa' tili i yángel lac Yum ba'añ Pedro, tsa' tsictiyi c'ajc ya' ti mʌjquibʌl; jiñi ángel tsi' lajlaj jats'ʌ ti' ts'ejtʌlel Pedro, tsi' ñijca, tsi' su'be: “Ch'ojyen ti ora”. Ti orajach tsa' tujq'ui jiñi cadena am bʌ ti' c'ʌb.

⁸ Jiñi ángel tsi' cha' su'be: “Cʌchʌ a cajchiñʌc', lʌpʌ a warach”. Che'ʌch tsi' mele. Tsi' cha' su'be: “Lʌpʌ pʌl bʌ a bujc, la' tsajcañon”, che'en.

⁹ Pedro tsi' tsajca loq'uel jiñi ángel, pero mach yujilic mi isujmʌch chuqui woli i mel jiñi ángel, cojach tsi' ña'ta cha'añ ñajal jach woli.

¹⁰ Che' bʌ tsa'ix i ñusayob jiñi ñaxan bʌ xcʌntaya ti wi'il i cha'ticlel bʌ xcʌntaya, tsa' c'otiyob ba'añ colem bʌ i ti' mʌjquibʌl melbil bʌ ti tsucul taq'uiñ, ya' ba' mi' loq'uelob majlel ti tejclum, i bajñel jach tsa' jajmi. Tsa' loq'uiyob ti mʌjquibʌl, che' bʌ tsa'ix i xʌñʌyob majlel ti calle, tsi' bʌc' sʌtʌ i bʌ jiñi ángel.

¹¹ Jiñi cha'añ Pedro tsa'ix i ch'ʌmbe isujm jiñi woli bʌ i yujtel ti' tojlel, tsi' yʌlʌ: “Wʌle mic ña'tan isujmʌch cha'añ jiñi c Yum tsi' choco tilel i yángel, tsi' coloyon ti' c'ʌb Herodes yic'ot ti' c'ʌb pejtelel judíojob tsa' bʌ i chijtayoñob”.

¹² Che' bʌ tsa'ix i ña'ta pañimil, tsa' c'oti ti' yotot María i ña' Juan am bʌ i cha'chajplel i c'aba' Marcos, ya' tempʌbilob ca'bʌl xñopt'añob woli i pejcañob Dios.

¹³ Che' bʌ Pedro tsi' jats'ʌ i ti' corredor, tsa' tili juntiquil xch'oc i c'aba' Rode cha'añ mi' q'uel majqui ya'añ.

¹⁴ Che' bʌ tsi' cʌmbe i t'añ Pedro, tijicñajax tsi' yu'bi, ma'añic tsi' jambe i ti' corredor, ajñel tsa' cha' ochi majlel ti' mal otot, cha'añ mi' su'b, cha'añ Pedro ya'ix wa'al ti ti' corredor, che'en.

¹⁵ Tsi' su'beyob: —¡Sojquem a jol! Pero Rode tsi' chʌn su'bu cha'añ jiñʌch Pedro. Che' jiñi tsi' yʌlʌyob: —I yángel jach.

¹⁶ Che' bʌ Pedro woli to i chʌn jats' i ti' corredor, che' bʌ tsi' jamʌyob jiñi puerta tsi' q'ueleyob ya' wa'al Pedro, tsa' toj sajtiyob i pusic'al.

¹⁷ Pedro tsi' pʌsbeyob i c'ʌb cha'añ mi' ñʌjch'elob, tsa' caji i tsictesʌbeñob bajche' lac Yum tsi' loc'sa ti mʌjquibʌl. Tsi' su'beyob: —Su'benla Jacobo yic'ot jiñi hermañujob chuqui tsa' ujti. Ti wi'il tsa' loq'ui majlel, tsa' majli ti yam bʌ tejclum.

¹⁸ Che' bʌ tsa' sʌc'a, tsi' cha'leyob ca'bʌl t'añ jiñi soldadojob cha'añ ma'añix tsiquil Pedro.

¹⁹ Herodes tsi' sʌcla Pedro, pero che' bʌ ma'añic tsi' taja, che' bʌ tsa' ujti i c'ajtibeñob xcʌntayajob, tsi' yʌc'ʌ mandar cha'añ mi' tsʌnsʌntelob. Che' bʌ ujti iliyi, Herodes tsa' loq'ui ti Judea, tsa' ju'bi majlel ti Cesarea, ya'i tsa' jal-a.

Tsa' chʌmi Herodes

²⁰ Herodes tsa' caji i mich'len wiñicob año' bʌ ti Tiro yic'ot ti Sidón. Tsa' tiliyob jiñi wiñicob ba'añ Herodes, pero ñaxan tsi' mucul pejcayob Blasto, jiñi i yaj q'uel wʌyib Herodes, tsi' c'ajtibeyob ti wocol t'añ cha'añ mi' cʌy i mich'leñob, come ya' woli' tajob i bʌl i ñʌc' ti' lumal Herodes.

²¹ Che' bʌ tsa' c'oti i yorajlel, tsa' buchle Herodes ti' buchlib ba' mi' cha'len meloñel, lʌpʌl i cha'añ i pislel rey, tsa' caji ti t'añ.

²² Jiñi cha'añ jiñi wiñicob tsi' cha'leyob c'am bʌ t'añ: ¡Jiñʌch dios woli bʌ ti t'añ, mach wiñiquic!

²³ Ti ora i yángel lac Yum tsi' yotsʌbe i c'am-ʌjel, come ma'añic tsi' q'uele ti ñuc Dios, tsa' c'uxle ti motso'; tsa' chʌmi.

²⁴ Pero tsa' chʌn ñojpi i t'añ Dios yic'ot tsa' pujqui majlel.

²⁵ Bernabé yic'ot Saulo tsa' loq'uiyob ti Jerusalén che' bʌ tsa' ujtiyob i ye'tel, tsi' pʌyʌyob majlel ja'el Juan Marcos.