Hechos 11 - Jiñi Tsiji' bʌ Wen T'añ cha'añ Estudio

Pedro tsi' pejca xñopt'añob ya' ti Jerusalén

¹ Jiñi apóstolob yic'ot jiñi hermañujob año' bʌ ti Judea tsi' yu'biyob cha'añ jiñi gentilob tsa'ix i ñopoyob i t'añ Dios ja'el.

² Che' bʌ tsa' sujti Pedro ti Jerusalén, jiñi woli bʌ i ñopob tsep pʌchʌlel tsi' tsʌts bʌ pejcayob Pedro,

³ tsi' su'beyob: —¿Chucoch tsa' ochiyet ti' yotot wiñicob mach bʌ tsepbilobic i pʌchʌlel yic'ot chucoch tsa' c'uxu waj yic'otob?

⁴ Jiñi cha'añ Pedro quepecña tsa' caji i su'b chuqui tac tsa' ujti, tsi' yʌlʌ:

⁵ —Che' bʌ ya'añon ti tejclum i c'aba' Jope che' woli c pejcan Dios, añ chuqui tsa' j q'uele tic ñajal lajal che' bajche' colem pisil cʌchbil bʌ ti' chʌmp'ejlel i xujc, tsa' ju'bi tilel ti panchan, tsa' c'oti ya' ba'añon.

⁶ Che' bʌ tsa' c wen q'uele, ya'añ alʌc'ʌl, yic'ot jontol tac bʌ bʌte'el, lucum yic'ot te'lemut mu' bʌ ti wejlel.

⁷ Tsa' cu'bi t'añ, tsa' bʌ i su'beyon: “Ch'ojyen, Pedro; tsʌnsan, c'uxu”, che'en.

⁸ Tsa' c su'be: “C Yum, ma'añic, come ma'añic ba' ora tsa' wis ochi ti quej chuqui tac tic'bil yic'ot chuqui tac bi'bi'”.

⁹ Jiñi cha'añ Dios tsi' jac'beyon ti' cha'yajlel: “Chuqui tac tsa'ix i sʌc-esa Dios mach yomic ma' ts'a'len”, che'en.

¹⁰ Uxyajl tsa' c'oti jiñi t'añ tic tojlel, ti wi'il tsa' cha' chujqui letsel ti panchan ti pejtelel.

¹¹ Awilan, tsa' bʌc' tiliyob uxtiquil wiñicob, chocbilo' bʌ tilel c'ʌlʌl ti Cesarea, tsa' c'otiyob ti jiñi otot ba'añon.

¹² Jiñi Espíritu tsi' su'beyon cha'añ ma'añic mic bʌc'ñan majlel yic'otob. Che' ja'el tsa' majliyob wʌctiquil hermañujob quic'ot. Tsa' ochiyon lojon ti' yotot Cornelio.

¹³ Tsi' su'beyon lojon che' bajche' tsi' q'uele juntiquil ángel wa'al ti yotot. Jiñi ángel tsi' su'be: “Choco majlel wiñicob ti Jope, cha'añ mi' pʌy tilel Simón, jiñi am bʌ i cha'chajplel i c'aba' ti Pedro,

¹⁴ jiñi mi caj i su'beñet wen t'añ cha'añ mi la' taj la' coltʌntel, jatet yic'ot pejtelel año' bʌ ti a wotot”, che'en.

¹⁵ Che' bʌ tsa' cajiyon ti t'añ, tsa' aq'uentiyob Ch'ujul bʌ Espíritu ja'el, che' bajche' tsa' aq'uentiyonla ti ñaxan.

¹⁶ Che' jiñi tsa' c'ajtiyi c cha'añ i t'añ lac Yum tsa' bʌ i yʌlʌ: “Isujm, Juan tsi' yʌq'ueyetla ch'ʌmja' ti ja', pero jatetla mi caj la' wʌq'uentel la' ch'ʌm Ch'ujul bʌ Espíritu”, che'en.

¹⁷ Mi Dios tsi' yʌq'ueyob i majtañ che' bajche' tsi' yʌq'ueyonla che' bʌ tsa' lac jac'be i t'añ lac Yum Jesucristo, ¿majquiyon cha'añ mic tiq'ue Dios?

¹⁸ Che' bʌ tsi' yu'bibeyob i t'añ, ñʌch'ʌl tsa' cʌleyob, tsi' su'buyob i ñuclel Dios, tsi' yʌlʌyob: —Dios tsa'ix i yʌq'ueyob gentilob ja'el i cʌyob i mul cha'añ mi' tajob i cuxtʌlel.

Xñopt'añob ya' ti Antioquía

¹⁹ Che' bʌ tsa' chʌmi Esteban tsa' tejchi ca'bʌl i tic'lʌntel xñopt'añob. Jiñi wiñicob x'ixicob tsa' bʌ pam pujquiyob cha'añ i tic'lʌntelob; tsa' majliyob c'ʌlʌl ti Fenicia, ti Chipre yic'ot ti Antioquía. Jiñi jach judíojob tsa' su'bentiyob jiñi wen t'añ.

²⁰ Pero ya'añ ja'el wiñicob ch'oyolo' bʌ ti Chipre, yic'ot ti Cirene, che' bʌ tsa' ochiyob ti Antioquía tsi' pejcayob griegojob ja'el, tsi' su'buyob jiñi wen t'añ cha'añ lac Yum Jesús.

²¹ Añ i p'ʌtʌlel lac Yum yic'otob, wen ca'bʌl tsi' sutq'uiyob i bʌ cha'añ mi' ñopob lac Yum.

²² Jiñi xñopt'añob mu' bʌ i tempañob i bʌ ti Jerusalén tsi' yu'biyob chuqui tac tsa' ujti; tsi' chocoyob majlel Bernabé c'ʌlʌl ti Antioquía.

²³ Che' bʌ tsa' c'oti Bernabé ya' ti Antioquía, tijicña i pusic'al come tsi' q'uele añob ti' yutslel i pusic'al Dios. Tsi' xic'beyob ti pejtelelob cha'añ mi' chʌn ñopob lac Yum ti' xuc'tʌlel i pusic'al.

²⁴ Uts'at i pusic'al Bernabé, but'ul ti Ch'ujul bʌ Espíritu, ñopol i cha'añ i t'añ Dios ti jump'ejl i pusic'al. Ca'bʌl wiñicob x'ixicob tsi' ñopoyob lac Yum.

²⁵ Ti wi'il tsa' majli Bernabé ti Tarso cha'añ mi' sʌclan Saulo, [che' bʌ tsi' taja, tsi' pʌyʌ majlel ti Antioquía.]

²⁶ Jump'ejl ja'b tsa' tem ajñiyob ya'i yic'ot jiñi xñopt'añob mu' bʌ i tempañob i bʌ, tsi' cʌntesayob ca'bʌl wiñicob x'ixicob. Ya' ti Antioquía tsa' tejchi ti pejcʌntelob ti cristiano jiñi xñopt'añob.

²⁷ Ti jiñi bʌ q'uiñ, x'alt'añob ch'oyolo' bʌ ti Jerusalén tsa' cajiyob ti ju'bel majlel ti Antioquía.

²⁸ Tsa' wa'le juntiquil i c'aba' Agabo. Ti' p'ʌtʌlel jiñi Espíritu tsi' su'beyob tal wi'ñal ti pejtelel pañimil; jiñi wi'ñal tsa' caji che' woli ti yumʌntel Claudio.

²⁹ Jiñi cha'añ, jiñi xñopt'añob tsi' ña'ta i chocbeñob majlel i coltʌntel jiñi hermañujob año' bʌ ti Judea che' bajche' c'amel mi mejlel i yʌc'ob ti jujuntiquil.

³⁰ Che'ʌch tsi' meleyob, tsi' chocoyob majlel ti' c'ʌb Bernabé yic'ot Saulo cha'añ mi' yʌq'ueñob jiñi ancianojob.