Hechos 10 - Jiñi Tsiji' bʌ Wen T'añ cha'añ Estudio

3. TSA' SUJBI JIÑI WEN T'AÑ TI' TOJLEL GENTILOB ( 10.1—28.31 ) Pedro yic'ot Cornelio

¹ Ya' ti Cesarea, ya'añ juntiquil wiñic i c'aba' Cornelio am bʌ ti' wenta jo'c'al soldado romanojob i c'aba' Italiana.

² Tsi' ch'ujutesa Dios jiñi wiñic. Tsi' bʌc'ña Dios yic'ot pejtelel año' bʌ ti' yotot. Tsi' yʌq'ueyob ca'bʌl i majtañ jiñi p'ump'uño' bʌ yic'ot ti pejtelel ora tsi' pejca Dios ti oración.

³ Che' ti och'ajel q'uiñ Cornelio añ chuqui tsi' q'uele ti' ñajal, jiñʌch juntiquil i yángel Dios tsa' bʌ c'oti ba'añ. Jiñi ángel tsi' pejca: —¡Cornelio! —Che'en.

⁴ Cornelio tsi' ch'ujch'uj q'uele yic'ot tsi' cha'le bʌq'uen che' bʌ tsi' q'uele jiñi ángel. Tsi' su'be: —¿Chuqui awom c Yum? —Che'en. Jiñi ángel tsi' su'be: —Jiñi a woración yic'ot i majtañ tac jiñi p'ump'uño' bʌ mu' bʌ a wʌq'ueñob woli' ña'tʌntel ti Dios.

⁵ Choco majlel cha'tiquil wiñicob ti Jope, cha'añ mi' pʌy tilel Simón, jiñi am bʌ i cha'chajplel i c'aba' Pedro,

⁶ ya' jijlem ti' yotot Simón, jiñi xts'aj pʌchi, lʌc'ʌl añ i yotot ti ti' mar, jiñi mi caj i su'beñet chuqui yom ma' mel, che'en jiñi ángel.

⁷ Che' majlemix jiñi ángel tsa' bʌ i pejca Cornelio, tsi' pʌyʌ tilel cha'tiquil i wiñicob yic'ot juntiquil i soldado tsa' bʌ i colta ti' ye'tel mu' bʌ i c'uxbin Dios.

⁸ Che' bʌ tsi' su'beyob pejtelel chuqui tac tsa' ujti, Cornelio tsi' chocoyob majlel ti Jope.

⁹ Ti yijc'ʌlal, che' woliyob ti xʌmbal majlel ti bij, che' lʌc'ʌlix añob ti tejclum, Pedro tsa' letsi ti' cha'p'ejlel piso ti yotot cha'añ mi' pejcan Dios, jiñʌch che' ts'ita' jax yom i taj xinq'uiñil.

¹⁰ Añix ca'bʌl i wi'ñal, yomix i cha'len we'el, che' woli to i chajpʌbeñob i bʌl i ñʌc' añ chuqui tsi' q'uele Pedro ti' ñajal.

¹¹ Tsi' q'uele calal jiñi panchan, woli' ju'bel tilel che' bajche' colem pisil cʌchbil ti' chʌmp'ejlel i xujc, tsa' ju'sʌnti c'ʌlʌl ti lum.

¹² Ya' ti' mal jiñi pisil añ ca'bʌl alʌc'ʌl tac, yic'ot bʌte'el ti' chajp ti' chajp, yic'ot jiñi jʌlʌcña bʌ mi' cha'len xʌmbal, yic'ot te'lemut.

¹³ Tsa' tili i t'añ lac Yum ba'añ Pedro, tsi' su'be: —Ch'ojyen Pedro, tsʌnsan, c'uxu, —che'en.

¹⁴ Jiñi cha'añ Pedro tsi' jac'ʌ: —Ma'añic c Yum; come ma'añic ba' ora tsa' j c'uxu chuqui tac tic'bil mi chuqui tac bi'bi', —che'en.

¹⁵ Tsa' cha' tili i t'añ lac Yum ba'añ Pedro: —Mach yomic ma' ts'a'len jatet chuqui tac sʌc-esʌbilix i cha'añ Dios, —che'en.

¹⁶ Uxyajl tsa' ujti iliyi, ti wi'il jiñi pisil tsa' cha' chujqui letsel ti panchan.

¹⁷ Che' woli to i chʌn ña'tan Pedro chuqui isujmlel jiñi tsa' bʌ ujti i q'uel, awilan, tsa' tiliyob jiñi wiñicob chocbilo' bʌ tilel i cha'añ Cornelio, tsi' c'ajtiyob baqui añ i yotot Simón, tsa' c'otiyob ti ti' jiñi otot.

¹⁸ Che' bʌ tsa' c'otiyob, tsi' c'ajtiyob mi ya' jijlem Simón jiñi am bʌ i cha'chajplel i c'aba' Pedro.

¹⁹ Che' woli to i chʌn ña'tan Pedro jiñi tsa' bʌ ujti i q'uel, jiñi Ch'ujul bʌ Espíritu tsi' su'be: Awilan, uxtiquil wiñicob woli' sajcañet.

²⁰ Ch'ojyen, juben, cucu yic'otob, mach yomic tilebixel a pusic'al, come joñon tsa' c chocoyob tilel, che'en.

²¹ Jiñi cha'añ Pedro tsa' ju'bi majlel ba'añ jiñi wiñicob chocbilo' bʌ tilel i cha'añ Cornelio, tsi' su'beyob: —Joñoñʌch woli bʌ la' sajcan. ¿Chucoch woli la' sajcañon? —Che'en.

²² Tsi' jac'ʌyob: —Jiñi Cornelio, i yaj capitán jo'c'al soldadojob, jiñi toj bʌ wiñic, mu' bʌ i bʌc'ñan Dios, cʌmbil i cha'añ pejtelel israelob cha'añ weñʌch i melbal. Juntiquil ch'ujul bʌ ángel tsi' su'be Cornelio cha'añ mi' pʌyet majlel ti' yotot cha'añ mi' yu'bin chuqui ti t'añ ma' su'ben.

²³ Jiñi cha'añ Pedro tsi' pʌyʌyob ochel, tsi' yʌq'ueyob ba' mi' c'ajob i yoj. Che' ti yijc'ʌlal tsa' ch'ojyi, tsa' majli yic'otob, tsa' majli yic'ot lamital hermañujob año' bʌ ti Jope.

²⁴ Ti yijc'ʌlal tsa' c'otiyob ti Cesarea. Cornelio wolix i pijtañob, tsa'ix i tempa i pi'ʌlob yic'ot i cʌñʌyo' bʌ.

²⁵ Che' bʌ tsa' c'oti Pedro ti otot, tsa' tili Cornelio i taj, tsi' ñocchoco i bʌ ti' tojlel cha'añ mi' ch'ujutesan.

²⁶ Pero Pedro tsi' teche ch'ojyel, tsi' su'be: —Ch'ojyen, wiñicon jach ja'el che' bajche' jatet, —che'en.

²⁷ Che' bʌ woliyob ti t'añ, tsa' ochi Pedro ti' mal otot, ya'i tsi' taja ca'bʌl tempʌbilo' bʌ.

²⁸ Pedro tsi' su'beyob: —La' wujil tic'bil ti mandar mi' yajñel judío yic'ot wiñic ch'oyol bʌ ti yam bʌ lum, pero Dios tsi' cʌntesayon cha'añ mach weñic mic ts'a'len wiñicob mi juntiquilic, mach mejlic c bi'leñob.

²⁹ Jiñi cha'añ tsa' tiliyon che' bʌ tsa' pʌjyiyon tilel, ma'añic tsa' c ñusa c pʌyol, jiñi cha'añ mij c'ajtibeñetla: ¿chucoch tsa' la' pʌyʌyon tilel? Che'en.

³⁰ Jiñi cha'añ Cornelio tsi' jac'ʌ: —Añix chʌmp'ejl q'uiñ che' bajche' ti ili ora woliyon ti ch'ajb; che' ti och'ajel q'uiñ che' woliyon ti oración ti cotot, awilan tsa' wa'le juntiquil wiñic ti' tojel c wut, wen sʌcxowan i bujc,

³¹ tsi' su'beyon: “Cornelio, tsa'ix i yu'bi Dios a woración, yujilix Dios pejtelel uts'at bʌ a melbal, che' bʌ tsa' wʌq'ue i majtañ jiñi p'ump'uño' bʌ.

³² Choco majlel wiñicob ti Jope, pʌyʌ tilel Simón, jiñi am bʌ i cha'chajplel i c'aba' Pedro, ya' jijlem ti' yotot Simón jiñi xts'aj pʌchi, ya'añ i yotot lʌc'ʌl ti ti' mar; che' mi' julel mi caj i pejcañet”, che'en.

³³ Jiñi cha'añ ti orajach tsa' c chocoyob majlel c wiñicob ba'añet. Uts'at tsa' jac'ʌ tilel, wʌle wʌ'añon lojon ti' wut Dios tic pejtelel lojon cha'añ mi cu'bin lojon pejtelel chuqui tsi' su'beyet Dios cha'añ ma' su'beñon lojon.

I subt'añ Pedro ti yotot Cornelio

³⁴ Jiñi cha'añ Pedro tsa' caji ti t'añ, tsi' yʌlʌ: —Wʌle mic ña'tan ti isujm, junlajal mi' q'uelonla Dios.

³⁵ Ti pejtelel lum Dios mi' q'uel ti uts'at jiñi mu' bʌ i bʌc'ñañob, yic'ot jiñi mu' bʌ i melob chuqui toj.

³⁶ Dios tsi' choco tilel jiñi wen t'añ ba'añ israelob, cha'añ mi' tajob i ñʌch'tʌlel i pusic'al ti Jesucristo, jiñʌch i Yum pejtelel wiñicob.

³⁷ Jatetla tsa'ix la wu'bi jiñi t'añ tsa' bʌ pujqui ti pejtelel Judea, tsa' bʌ tejchi ya' ti Galilea che' bʌ Juan tsi' su'bu cha'añ yom mi' ch'ʌmob ja',

³⁸ Dios tsi' yajca Jesús jiñi loq'uem bʌ ti Nazaret cha'añ mi yʌq'ueñ Ch'ujul bʌ Espíritu yic'ot i p'ʌtʌlel. Baqui jach tsa' ñumi tsi' mele chuqui uts'at tac, tsi' lajmesa pejtelel jiñi tic'lʌbilo' bʌ i cha'añ xi'ba, come añ Dios yic'ot.

³⁹ Joñon lojon tsa' j q'uele lojon pejtelel chuqui tsi' mele Jesús ti Judea yic'ot ti Jerusalén. Jiñi judíojob tsi' tsʌnsayob, tsi' ch'ijiyob ti cruz.

⁴⁰ Pero Dios tsi' teche ch'ojyel ti' yuxp'ejlel q'uiñ, tsi' yʌq'ueyonla lac cha' q'uel.

⁴¹ Mach ti' wutic pejtelel wiñicob x'ixicob, cojach tic wut lojon tsa' bʌ c cha'le lojon we'el, uch'el yic'ot Jesús che' ch'ojyemix loq'uel ba'añ chʌmeño' bʌ. Dios tsi' wa'chocoyon lojon ti testigo cha'añ mic laj su'b lojon chuqui tsa' j q'uele lojon.

⁴² Jesús tsi' yʌq'ueyon lojon mandar cha'añ mic su'ben lojon wiñicob x'ixicob cha'añ Jesús jiñʌch jiñi yajcʌbil bʌ i cha'añ Dios mu' bʌ caj i cha'len meloñel ti' tojlel cuxulo' bʌ yic'ot chʌmeño' bʌ.

⁴³ Pejtelel x'alt'añob tsi' su'buyob mi caj i ñusʌbentelob i mul ti' c'aba' Jesús pejtelel mu' bʌ i ñopob.

Jiñi gentilob mi yʌq'ueñtelob Ch'ujul bʌ Espíritu

⁴⁴ Che' bʌ woli to ti t'añ Pedro, tsa' tili jiñi Ch'ujul bʌ Espíritu ti' tojlelob pejtelel jiñi tsa' bʌ i yu'biyob jiñi wen t'añ.

⁴⁵ Jiñi hermañujob tsepbilo' bʌ i pʌchʌlel, tsa' bʌ majliyob yic'ot Pedro, tsa' toj sajtiyob i pusic'al come tsa' aq'uentiyob Ch'ujul bʌ Espíritu ja'el jiñi gentilob ti' majtañ jach,

⁴⁶ come tsi' yu'biyob woliyob ti t'añ ti yan tac bʌ t'añ yic'ot woli i su'bob i ñuclel Dios.

⁴⁷ Jiñi cha'añ Pedro tsi' c'ajtibeyob: —¿Mejl ba mi lac tic'ob cha'añ mi' ch'ʌmob ja' jiñi tsa' bʌ aq'uentiyob jiñi Ch'ujul bʌ Espíritu che' bajche' tsa' aq'uentiyonla? —Che'en.

⁴⁸ Pedro tsi' su'beyob cha'añ mi' ch'ʌmob ja' ti' c'aba' Jesucristo. Jiñi gentilob tsi' su'beyob Pedro ti wocol t'añ cha'añ mu' to i cʌytʌl yic'otob cha'p'ejl uxp'ejl q'uiñ.