Hebreos 7 - Jiñi Tsiji' bʌ Wen T'añ cha'añ Estudio

I motomajil Melquisedec

¹ Che' bʌ tsi' mʌlʌ Abraham jiñi guerra ti' tojlel jiñi reyob, Melquisedec tsa' tili cha'añ mi' taj che' wolix i sujtel; Melquisedec jiñʌch rey ti Salem, i motomaj jiñi Ñuc bʌ Dios. Melquisedec tsi' yʌq'ue Abraham i yutslel i t'añ.

² Abraham tsi' yʌq'ue i diezmojlel pejtelel i chu'bʌañ tsa' bʌ i taja ti guerra; añ isujmlel i c'aba' Melquisedec ti lac t'añ, jiñʌch Toj bʌ Rey am bʌ ti Salem. Jiñʌch Rey yujil bʌ ñʌch'chocoya.

³ Ma'añic majqui yujil majqui i tat i ña', ma'añic tsa' tajle i c'aba' i ñojte'elob; ma'añic majqui yujil baqui ora tsi' yila pañimil, mi jiñic jax baqui ora tsa' chʌmi; jiñi cha'añ lajalʌch bajche' i Yalobil Dios, motomaj bʌ ti pejtelel ora.

⁴ Ña'tanla i ñuclel jiñi Melquisedec, Abraham jiñi lac pʌq'uil tsi' yʌq'ue i diezmojlel pejtelel chuqui tsi' taja ti guerra.

⁵ Isujm, ts'ijbubil ti jiñi mandar cha'añ añ ti' wenta i p'olbal Leví mi' yochelob ti' motomajil cha'añ mi' ch'ʌmbeñob i diezmojlel i chu'bʌañ i pi'ʌlob, anquese laj i p'olbalob Abraham ti pejtelelob, pero che'ʌch yom mi' yʌq'ueñob i chu'bʌañ i pi'ʌlob.

⁶ Pero jiñi Melquisedec mach i p'olbalic Leví, pero tsi' ch'ʌmbe i diezmojlel i chu'bʌañ Abraham, tsi' yʌq'ue i yutslel i t'añ jiñi am bʌ i cha'añ jiñi albil bʌ t'añ.

⁷ Isujm, jiñi ñuc bʌ mi' yʌq'ueñ i yutslel i t'añ jiñi mach bʌ wen ñuquic.

⁸ Isujm, mi' ch'ʌmob diezmo i p'olbal levijob yujilo' bʌ chʌmel; pero mi' su'beñonla i ts'ijbujel Dios chʌn cuxul to Melquisedec.

⁹ Mi mejlel la cʌl: Jiñi Leví (i ñojte'el jiñi mu' bʌ i ch'ʌmob diezmo) añ to ti Abraham ba' ora tsi' yʌq'ue Melquisedec i diezmojlel i chu'bʌañ,

¹⁰ come jiñi Leví loq'uemʌch ti' p'olbal Abraham, che' jiñi ya' to añ Leví ti' bʌc'tal Abraham che' bʌ tsa' majli i taj Melquisedec.

¹¹ Dios tsi' yʌq'ue israelob jiñi ts'ijbubil bʌ mandar ti' wenta i p'olbal Leví, tsi' wa'choco motomaj tilemo' bʌ ti Aarón, i yalobil bʌ Leví; tsa'ic mejli i toj-esan wiñicob ili motomaj tilem bʌ ti' p'olbal Leví. Che' jiñi, ¿chuqui to i c'ʌjñibal tsi' wersa choco tilel yam bʌ motomaj wa'chocobil bʌ ti' motomajil Melquisedec?

¹² Come che' bʌ tsa' q'uextʌyi i motomajil i p'olbal Aarón, jiñi mandar tsa' wersa q'uextʌyi ja'el;

¹³ pero jiñi lac Yum che' bajche' mi' su'beñonla ti' ts'ijbujel, tilemʌch ti Judá, jiñʌch yam bʌ junmojt israelob ba' ma'añic mi juntiquilic tsa' bʌ i cha'le i ye'tel ti motomaj ti' t'ejl i pulʌntib i majtañ Dios.

¹⁴ Come ña'tʌbil lac cha'añ tsa' tili lac Yum ti' p'olbal Judá, pero Moisés ma'añic tsi' yʌlʌ mi tal motomaj ti' p'olbal Judá.

¹⁵ Tsiquil che' jiñi tsa'ix tejchi yam bʌ motomaj che' bajche' Melquisedec,

¹⁶ che' bʌ tsa' ochi ti motomaj, mach wa'chocobilic i cha'añ wiñicob che' bajche' ts'ijbubil ti mandar, pero wa'chocobil ti Motomaj yic'ot i p'ʌtʌlel i cuxtʌlel mach bʌ yujilic jilel.

¹⁷ Ti salmo tsi' taja ti t'añ Cristo che' bʌ tsi' yʌlʌ: “Motomajet ti pejtelel ora. Wa'chocobilet ti' motomajil Melquisedec”, che'en.

¹⁸ Isujm tsa' q'uextʌyi jiñi ñaxan bʌ mandar come ma'añic i p'ʌtʌlel, yic'ot ma'añix i c'ʌjñibal,

¹⁹ come i mandar Moisés ma'añic tsa' mejli i coltañonla, pero tsa' tili wen uts'at bʌ lac pijtaya yic'ot Cristo, jiñi cha'añ mi mejlel lac lʌc'tesan lac bʌ ba'añ Dios.

²⁰ Dios tsi' yʌc'ʌ i t'añ che' bʌ tsa' ochi Cristo ti motomaj,

²¹ mach che'ic tsi' mele ti' tojlel yam bʌ motomajob che' bʌ tsa' ochiyob ti' ye'tel, pero Dios tsi' yʌc'ʌ i t'añ ti' tojlel Jesús, tsi' su'be: “A Yum Dios tsa'ix i yʌc'ʌ i t'añ, ma'añic mi' q'uextan i pusic'al: Jatet motomajet ti pejtelel ora, wa'chocobilet ti' motomajil Melquisedec”, che'en.

²² Jiñi cha'añ la cujil ñumen wen jiñi tsiji' bʌ xuc'ul bʌ t'añ, come mi' xuc'chocontel ti Jesús.

²³ Ti ñaxan ca'bʌl motomaj tsa' wa'chocontiyob, come mach jalic tsa' ajñiyob ti' ye'tel, tsa' chʌmiyob ti jujuntiquil.

²⁴ Pero Cristo cuxul ti pejtelel ora, jiñi cha'añ ma'añic mi' q'uextʌyel i motomajil.

²⁵ Jiñi cha'añ mi mejlel i junyajlel coltañ pejtelel jiñi mu' bʌ i lʌc'tesañob i bʌ ba'añ Dios ti' tojlel Jesús, come chʌn cuxul ti pejtelel ora, woli' chʌn tajob ti oración ti' tojlel Dios.

²⁶ Jesús jiñʌch c'ax ñuc bʌ la caj Motomaj jiñi yom bʌ lac cha'añ, come ch'ujulʌch, ma'añic i jontolil, sʌc i pusic'al, mach xmulilic, tsa'ix aq'uenti i ñuclel ti panchan;

²⁷ mach wersajic mi' tsʌnsʌben i majtañ Dios ti jujump'ejl q'uiñ che' bajche' yam bʌ motomajob, ñaxan tsi' tsʌnsʌbeyob i majtañ Dios cha'añ i bajñel mul, ti wi'il cha'añ i mul i pi'ʌlob, pero Jesús tsi' tojo' lac mul che' bʌ tsi' yʌc'ʌ i bʌ ti chʌmel che' bajche' tsʌnsʌbil bʌ i majtañ Dios; jasʌl junyajl tsa' chʌmi.

²⁸ Jiñi mandar mi' wa'chocon ti ñuc bʌ motomaj wiñicob año' bʌ i c'unlel i pusic'al; pero ti wi'il Dios tsi' wa'choco i Yalobil jiñi toj bʌ ti pejtelel ora.