Hebreos 6 - Jiñi Tsiji' bʌ Wen T'añ cha'añ Estudio

¹ Jiñi cha'añ mach yomix mi lac chʌn jal-añ ti' ñopol i cajibal isujmlel Cristo, la'ix wen sojlic ti lac pusic'al pejtelel isujmlel, mach jiñic jach i tejchibal cʌntesa. Yom mi lac junyajlel cʌy jiñi lolom jach bʌ lac melbal cha'añ mi lac ñop Dios,

² jiñi la' cʌntesʌntel ti ch'ʌmja' yic'ot i yʌc'ol c'ʌbʌl ti la' jol, la' wujilix mi' caj i tejchelob ch'ojyel jiñi chʌmeño' bʌ, che' ja'el tsa'ix la' wu'bi isujmlel tojmulil mach bʌ yujilic jilel, jasʌlix ili la' cʌntesʌntel.

³ Pero añ to yom mi la' taj la' colel ti Cristo, la lac ñop ti pejtelel che' bajche' yom Dios.

⁴ Jiñi mu' bʌ i cha' cʌyob Dios, ¿bajche' mi caj i cha' ñopob? Tsa'ix i cʌn q'ueleyob i sʌclel, tsa'ix i cʌn tajayob i wenlel ti Dios yic'ot ti Ch'ujul bʌ Espíritu,

⁵ tsi' mulayob jiñi uts'at bʌ i t'añ Dios, tsi' yu'biyob i p'ʌtʌlel i yumʌntel mu' to bʌ caj i tilel,

⁶ pero mi tsa' cha' yajliyob, mach mejlix lac chʌn ñijcʌbeñob i pusic'al cha'añ mi' cha' sutq'uiñob i bʌ, come woli' cha' ch'ijob ti cruz i Yalobil Dios yilal, woli' i cha' ac'ob ti wajlentel.

⁷ Dios mi' yʌq'ueñ i bendición jiñi lum mu' bʌ i chʌn jap ja'al che' mi' choc tilel. Mi' yʌc' ti colel uts'at tac bʌ lac pʌc'bal,

⁸ pero mi woli jach i yʌc' ti colel pimel am bʌ i ch'ixal, ma'añic i c'ʌjñibal jiñi lum, pujch'emix, i yum mi caj i cʌy, mi' caj ti pulel.

⁹ C'uxbibilet bʌ la, anquese che'ʌch woli c su'beñet lojon, cujil lojon cha'añ uts'at añetla, woli la' wʌc' la' wut ti uts'at come coltʌbiletixla,

¹⁰ come Dios mach jontolic, mach ñajʌyic i cha'añ jiñi wen bʌ la' melbal yic'ot la' c'uxbiya, come ti' c'aba' Dios tsa' la' colta i cha'año' bʌ, c'ʌlʌl wʌle woli to la' coltañob.

¹¹ Pero com lojon chʌn bʌxetla ti jujuntiquiletla c'ʌlʌl jinto mi la' chʌmel, cha'añ che' jiñi mi la' taj pejtelel jiñi woli bʌ la' pijtan,

¹² mach comic lojon cha'añ mi la' ts'u'b-an, pero tsajcanla majlel jiñi woli bʌ i yʌq'ueñtelob pejtelel jiñi albil bʌ i cha'añ Dios, come mi' chʌn pijtañob ti' xuc'tʌlel i pusic'al jiñi woli bʌ i ñopob.

¹³ Dios tsi' yʌq'ue Abraham jiñi xuc'ul bʌ i t'añ, i bajñel jach tsi' xuc'choco i t'añ, come ma'añic yam bʌ ñuc bʌ che' bajche' Dios tsa' bʌ mejli i xuc'chocon,

¹⁴ tsi' su'be Abraham: “Ti isujm ca'bʌl mi caj cʌq'ueñet bendición, mi caj c wen p'ojlesʌbeñet a p'olbal”.

¹⁵ Abraham jal tsi' pijta ti' xuc'tʌlel i pusic'al, Dios tsi' ts'ʌctesa chuqui albil i cha'añ.

¹⁶ Ti isujm, wiñicob mi' tajbeñob i c'aba' jiñi ñumen ñuc bʌ cha'añ mi' xuc'chocoñob i t'añ, che' mi' xuc'chocoñob ti' c'aba' yam bʌ, ma'añix majqui mi mejlel i jem.

¹⁷ Dios yom i wen tsictesan cha'añ mach mejlic ti jejmel i t'añ, pejtelel mu' bʌ i ñopob mi caj i yʌq'ueñtelob chuqui albil i cha'añ, jiñi cha'añ tsi' bajñel taja i c'aba' cha'añ mi' xuc'chocon i t'añ,

¹⁸ Dios mach mejlic i cha'len lot, añ cha'chajp mach bʌ yujilic q'uextʌyel, jiñʌch i xuc'tʌlel i pusic'al yic'ot jiñi albil bʌ i t'añ, jiñi cha'añ joñonla tsa' bʌ lac taja laj coltʌntel ti Dios, mi lac taj i ñuq'uesʌntel lac pusic'al cha'añ mi lac chʌn pijtan jiñi su'bebilon bʌ la.

¹⁹ Jiñi lac pijtaya, jiñʌch mu' bʌ i tsʌts xuc'chocoñonla, mi' yʌc'onla ti ochel ti junwejl pisil bʌ tsalʌl yilal ya' ti panchan,

²⁰ ba' tsa' ñaxan ochi Jesús cha'añonla, tsa' ochi ti c'ax ñuc bʌ Motomaj lac cha'añ ti pejtelel ora, lajal che' bajche' i motomajil Melquisedec.