Hebreos 5 - Jiñi Tsiji' bʌ Wen T'añ cha'añ Estudio

¹ Come pejtelel ñuc bʌ motomaj yajcʌbil bʌ ti' tojlel wiñicob, añ ti' wenta cha'añ mi' melben i ye'tel Dios cha'añ i wenlel wiñicob, cha'añ mi' yʌq'ueñ i majtañ yic'ot tsʌnsʌbil bʌ i majtañ Dios cha'añ i ñusʌntel mulil,

² mi mejlel i p'untan jiñi mach bʌ añic i ña'tʌbal yic'ot jiñi woli bʌ ti sajtel, come wiñicʌch ja'el,

³ jiñi cha'añ wersa yom mi' yʌq'ueñ i majtañ Dios cha'añ i bajñel mul, che' bajche' mi' yʌq'ueñ i majtañ cha'añ i mul yaño' bʌ.

⁴ Ma'añic majqui mi' bajñel ch'ʌm jiñi ñuc bʌ e'tel, cojach jiñi mu' bʌ i pʌjyel ti Dios che' bajche' tsa' pʌjyi Aarón.

⁵ Cristo ja'el, ma'añic tsi' bajñel ñuq'uesa i bʌ cha'añ mi' bajñel otsan i bʌ ti c'ax ñuc bʌ Motomaj, pero Dios tsi' su'be: “Jatet Calobilet; wʌle tsa' ochiyon ti a Tat”.

⁶ Tsi' yʌlʌ ti yam bʌ salmo ja'el: “Jatet motomajet ti pejtelel ora. Wa'chocobilet ti' motomajil Melquisedec”, che'en.

⁷ Che' wʌ' to añ Jesús ti pañimil, ti wocol t'añ yic'ot i yuq'uel tsi' pejca Dios jiñi mu' bʌ i yʌc' ti colel ti' p'ʌtʌlel chʌmel; Dios tsi' yu'bibe i t'añ i Yalobil come uts'at tsi' jac'be i t'añ.

⁸ Anquese Cristo jiñʌch i Yalobil Dios, cha'añ ti' caj i wocol tsi' wen ñopo i jac'ol t'añ;

⁹ che' bʌ tsa'ix ts'ʌctiyi pejtelel chuqui Dios tsi' yʌq'ue ti' wenta cha'añ mi' mel, tsa' ochi ti xColtaya cha'añ mi yʌq'ueñ i cuxtʌlel pejtelel jiñi mu' bʌ i jac'beñob i t'añ.

¹⁰ Dios tsi' su'bu ti c'ax ñuc bʌ motomaj wa'chocobil bʌ ti' motomajil Melquisedec.

Yom wen xuc'ulob

¹¹ Añ to ca'bʌl chuqui com c su'beñet lojon, come ca'bʌl isujmlel ili motomajil, pero wen wocol mi la' ch'ʌmben isujm come lajal che' bajche' mʌcʌl la' chiquin yilal.

¹² Añix ora tsa' la' wu'bi jiñi t'añ, anquese i yorajlelix mi la' wochel ti xcʌntesa, pero añ to yom majqui mi' cha' cʌntesañetla c'ʌlʌl ti' cajibal isujmlel i t'añ Dios. La' wom to la' chu' yilal, come maxto mejlic la' c'ux waj.

¹³ Come pejtelel majqui jach woli to ti chu', maxto wen yujilic bajche' yom mi' yajñel ti toj, come alʌl to.

¹⁴ Come jiñi waj jiñʌch i cha'añ jiñi tsa'ix bʌ i tajayob i colel, che' jiñi muq'uix i cʌn jiñi wen bʌ yic'ot jiñi mach bʌ weñic.