Hebreos 3 - Jiñi Tsiji' bʌ Wen T'añ cha'añ Estudio

I yalobil ñumen ñuc che' bajche' Moisés

¹ Jiñi cha'añ, ch'ujul bʌ hermañujob, jatetla woli bʌ la' pʌjyel ochel ti Dios, wen cʌñʌla majqui jiñi Cristo Jesús, jiñʌch apóstol, jiñʌch c'ax ñuc bʌ motomaj lac cha'añ mu' bʌ lac ñop;

² xuc'ul tsi' melbe i ye'tel Dios jiñi tsa' bʌ i wa'choco, che' bajche' xuc'ul tsi' mele i ye'tel Moisés ti' tojlel i cha'año' bʌ Dios.

³ Jiñi xmel otot ñumen ñuc bajche' i yotot, che' ja'el Jesús ñumen yom mi laj c'uxbin bajche' Moisés come ñumen ñuc.

⁴ Ti jujump'ejl otot añʌch majqui tsi' mele; pero jiñi tsa' bʌ i mele pejtelel chuqui tac añ, jiñʌch Dios.

⁵ Moisés xuc'ul tsi' melbe i ye'tel Dios ti' tojlel i cha'año' bʌ, che' bajche' i wiñic, tsi' wʌn tsictesa jiñi tsa' bʌ tili ti wi'il;

⁶ pero Cristo i Yalobilʌch Dios, mi' cʌntan ti xuc'ul jiñi i cha'año' bʌ Dios, tsiquil che' jiñi i cha'añonla, mi c'ʌlʌl ti' jilibal chʌn lotol ti lac pusic'al chuqui tsa' lac ñopo, mi xuc'ul mi lac pijtan ti' tijicñʌyel lac pusic'al.

I q'uiñilel caj cha'añ i tejclum Dios

⁷ Jiñi cha'añ, che' bajche' mi' yʌl jiñi Ch'ujul bʌ Espíritu: “Mi woli la' wu'biben i t'añ Dios,

⁸ mach mi la' wʌc' ti tsʌts-an la' pusic'al, che' bajche' tsi' cha'leyob la' tatob che' bʌ tsi' contrajiyoñob ya' ti colem bʌ i tiquiñal lum che' bʌ tsi' yilʌbeyoñob c pusic'al.

⁹ Jiñi la' ñojte'el tsi' yilʌbeyoñob c pusic'al. Anquese cha'c'al ja'b tsi' q'ueleyob c melbal.

¹⁰ Che' jiñi tsi' techbeyoñob c mich'ajel ili wiñicob, tsa' c su'bu: Ti pejtelel ora añob i sajtemal come leco chuqui tsi' ña'tayob ti' pusic'al, mach yomic i cʌñob c bijlel.

¹¹ Jiñi cha'añ, mich' tsa' c su'bu ti isujm: Ma'añic mi caj cʌq'ueñob i c'aj i yoj”.

¹² Jiñi cha'añ hermañujob, chʌcʌ q'uele la' bʌ ame tejchic jontolil ti la' pusic'al, ame mi la' cʌy jiñi cuxul bʌ Dios mi mach xuc'ulic mi la' ñop.

¹³ Pero yom mi la' xic'ben la' bʌ ti uts'at ti jujump'ejl q'uiñ, che' woli to i pʌyonla: Cha'añ ma'añic mi la' wʌc' ti tsʌts-an la' pusic'al ti mulil yujil bʌ lotiya,

¹⁴ come lac tem cha'añʌch i yutslel i pusic'al Dios la quic'ot Cristo, cha'añ c'ʌlʌl ti' jilibal mi lac chʌn ñop che' bajche' ti ñaxan ti' xuc'tʌlel lac pusic'al.

¹⁵ I t'añ Dios mi' su'beñonla: “Mi woli la' wu'biben i t'añ wʌle, mach mi la' wʌc' ti tsʌts-an la' pusic'al che' bajche' tsi' cha'leyob che' bʌ tsi' contrajiyoñob”.

¹⁶ ¿Majqui tsi' contrajiyob che' bʌ tsi' yu'bibeyob i t'añ? ¿Mach ba ti' pejtelelobic jiñi tsa' bʌ i pʌyʌyob loq'uel Moisés ti Egipto?

¹⁷ ¿Majqui jiñi tsa' bʌ i techbeyob i mich'ajel Dios cha'añ cha'c'al ja'b? ¿Mach ba jiñic jiñi tsa' bʌ i cha'leyob mulil, jiñi tsa' bʌ chʌmiyob ya' ti jochol bʌ lum?

¹⁸ ¿Majquiyob jiñi tsa' bʌ su'bentiyob cha'añ ma'añic mi caj i tajob c'aj-o? ¿Mach ba jiñobic tsa' bʌ i ñusʌbeyob i t'añ?

¹⁹ Tsiquil che' jiñi, ma'añic tsa' mejliyob ti ochel, come ma'añic tsi' ñopoyob.