Hebreos 13 - Jiñi Tsiji' bʌ Wen T'añ cha'añ Estudio

4. I CUXTɅLEL XÑOPT'AÑOB ( 13.1-19 )

¹ Chʌn c'uxbin la' bʌ, come hermañujetla ti Cristo.

² Mach ñajʌyic ti la' pusic'al i p'untʌntel jiñi xñumelob mach bʌ cʌñʌlobic la' cha'añ, añ i tajol tsi' yotsayob ángelob ti yotot lac tatob che' mach cʌmbilobic i cha'añob.

³ Coltañla xmʌjquelob, che' bajche' mi temel ya'añetla la' wic'otob ya' ti mʌjquibʌl; ña'tanla jiñi año' bʌ ti wocol che' bajche' jatetʌchla woli bʌ la' wu'bin wocol.

⁴ Ña'tanla uts'atʌch ñujpuñel, uts'at mi' pʌy i yijñam wiñic, yom xuc'ul mi' pi'leñob i bʌ; come majqui jach mi' taj i yixic, mi añ i yijñam, o mi ma'añic i yijñam mi cha'len ts'i'lel, mi caj i mel i bʌ ti' tojlel Dios.

⁵ Mach yomic chʌquetla ti la' taq'uiñ; yom tijicña mi la' wajñel yic'ot chuqui tac añ la' cha'añ, come Dios tsi' yʌlʌ: “Ma'añic ba' ora mi caj c wis cʌyet”, che'en.

⁶ Jiñi cha'añ, yom ch'ejl lac pusic'al mi lac su'b: “Lac Yum jiñʌch caj Coltaya; ma'añic mi caj c bʌc'ñan chuqui mi' tumbeñon wiñicob”.

⁷ Ña'tanla jiñi xcʌntayajob la' cha'añ tsa' bʌ i su'beyetla i t'añ Dios; ña'tanla jaytiquil la' pi'ʌlob tsi' tajayob i wenlel ti' chajp ti' chajp ti' tojlelob cha'añ ti wen bʌ i melbal, ñopola Dios che' bajche' tsi' ñopoyob.

⁸ Jesucristo ma'añic mi' q'uextʌyel, junlajalʌch ac'bi yic'ot wʌle yic'ot ti pejtelel ora.

⁹ Mach mi la' wʌc' la' bʌ cha'añ mi la' jac' yam bʌ cʌntesa am bʌ i sajtemal ti' chajp ti' chajp; ñumen uts'at mi lac taj i xuc'tʌlel lac pusic'al ti' yutslel i pusic'al Dios, mach cha'añic i bʌl lac ñʌc'; come ma'añic mi' coltañonla ti' tojlel Dios, tsa' jiliyob jiñi tsa' bʌ i jac'ʌyob ili cʌntesa cha'añ i bʌl ñʌc'ʌl.

¹⁰ Añ lac cha'añ pulʌntib ja'el, ba' mach mejlic i c'uxob motomajob chuqui ac'bil ya' ti Tabernáculo,

¹¹ jiñi c'ax ñuc bʌ motomaj tsi' ch'ʌmʌ ochel i ch'ich'el alʌc'ʌl ti Ch'ujul bʌ Ajñibʌl cha'añ i ñusʌntel mulil, tsi' puluyob i bʌc'tal alʌc'ʌl ti junwejl i ti' tejclum.

¹² Che'ʌch ja'el tsi' yu'bi wocol Jesús ti junwejl i ti' tejclum cha'añ mi' sʌc-esañonla ti' bajñel ch'ich'el.

¹³ Jiñi cha'añ la' lac lʌc'tesan lac bʌ ba'añ Jesús ti junwejl i ti' tejclum, yom mi laj cuch lac ts'a'lentel che' bajche' Jesús,

¹⁴ mach wʌ'ic añ lac tejclum, pero woli lac sajcan jiñi tal to bʌ tejclum mach bʌ yujilic jilel.

¹⁵ Jiñi cha'añ, la' lac chʌn aq'uen i majtañ Dios ti' Jesucristo tilem bʌ ti lac pusic'al, yom i yʌl, cha'añ ti la quej mi' sujbel i ñuclel i c'aba' lac Yum.

¹⁶ Mach yomic mi' ñajʌyel ti la' pusic'al i melol chuqui uts'at cha'añ mi la' coltañ la' pi'ʌlob, come jiñʌch i majtañ Dios uts'at bʌ mi' q'uel.

¹⁷ Jac'benla i t'añ xcʌntayajob la' cha'añ, yic'ot otsan la' bʌ ti' wenta, come añob i ye'tel cha'añ mi' wen pʌsbeñetla i bijlel la' coltʌntel, come yujilob cha'añ wersa mi caj i su'bob ti' tojlel Dios, mi uts'at mi la' jac', che' jiñi tijicña mi caj i cʌntañetla, pero mi woli la' wʌq'ueñob i ch'ijiyemlel i pusic'al che' jiñi mach la' tajayic la' wenlel.

¹⁸ Yom mi la' tajon lojon ti oración, cujil ma'añic lojon c mul ti la' tojlel, come ti pejtelel c pusic'al com c mel lojon chuqui uts'at.

¹⁹ Mij c'ajtin la' oración cha'añ Dios mi yʌq'ueñon i yorajlel cha'añ mic tilel ti ora ba'añetla.

I YUJTIBAL ( 13.20-25 ) Bendición

²⁰ Jiñi Dios mu' bʌ i ñʌch'chocoñonla, tsa' bʌ i teche loq'uel lac Yum Jesucristo ba'añ chʌmeño' bʌ, jiñi ñuc bʌ Xcʌnta tʌñʌme', ti' ch'ich'el tsi' yʌq'ue i sellojlel jiñi xuc'ul bʌ t'añ mach bʌ añic mi' jilel,

²¹ la' i yʌq'ueñetla pejtelel chuqui añ to yom la' cha'añ, cha'añ mi la' mel ti pejtelel ora chuqui yom Dios; la' i mel i ye'tel Dios ti jatetla ti' p'ʌtʌlel Cristo che' bajche' mi' mulan, la' tsictiyic i ñuclel Cristo ti pejtelel ora. Amén.

Cojix bʌ i yutslel i t'añ

²² La' wocolic hermañujob, yom uts'at mi la' jac' la' xic'bentel; anquese ts'ita' jach tsa' c ts'ijbubeyetla.

²³ Ña'tanla librejix añ la quermañu Timoteo; mi tsa' juli ti ora ilayi, mi caj c tilel lojon ti jula' ba'añetla.

²⁴ Aq'uenla cortesía pejtelel xcʌntayajob la' cha'añ, yic'ot pejtelel i cha'año' bʌ Dios. Mi' yʌq'ueñetla cortesía jiñi año' bʌ ti Italia.

²⁵ La' ajñic i yutslel i pusic'al Dios la' wic'ot ti la' pejtelel. [Amén.]