Hebreos 12 - Jiñi Tsiji' bʌ Wen T'añ cha'añ Estudio

Toj jach yom mi laj q'uel Cristo

¹ Joyolonla ti ca'bʌl testigojob che' bajche' colem tocal, jiñi cha'añ la' lac junyajlel cʌy pejtelel jiñi mu' bʌ i mʌctañonla yic'ot pejtelel mulil mu' bʌ i yʌc'onla ti cʌytʌl, la' lac chʌn cha'len wersa che' bajche' jiñi wen yujil bʌ ajñel cha'añ mi lac taj jiñi woli bʌ lac pijtan.

² Toj jach yom mi lac tsajcan majlel Jesús jiñi mu' bʌ i yʌq'ueñonla lac ñop, come ya'ʌch ch'oyol lac xuc'tʌlel, jiñʌch mu' bʌ i ts'ʌctesʌbeñonla chuqui mi lac ñop. Jesús ma'añic tsi' xoyo i bijlel ti' tojlel wocol, come tsi' q'uele jiñi tijicña bʌ woli bʌ i pijtan. Jiñi cha'añ tsi' yʌc'ʌ i bʌ ti quisin che' bʌ tsa' chʌmi ti cruz. Jiñi cha'añ wʌle buchul ti' ñoj Dios ya' ti' yumʌntel.

³ Ña'tanla bajche' Jesús tsi' ñusa wocol che' bʌ ts'a'lebil i cha'añ xmulilob; jiñi cha'añ mach yomic lujb-aquetla ti la' wocol yic'ot mach yomic mi la' lij la' bʌ,

⁴ come maxto añic tsa' la' wʌc'ʌ la' bʌ ti tsʌnsʌntel cha'añ i cuchol wocol cha'añ woli la' contrajin mulil;

⁵ tsa'ix ñajʌyi la' cha'añ bajche' tsi' xic'beyetla Dios che' bajche' mi lac xic'ben la calobil, tsi' yʌlʌ: “Calobil, mach a ts'a'len i ju'sʌntel a pusic'al ti lac Yum, mach a lij a bʌ che' mi' tiq'uet lac Yum,

⁶ come lac Yum mi' ju'sʌben i pusic'al majqui jach mi' c'uxbin, mi' toj-esan jiñi mu' bʌ i yotsan ti' yalobil”, che'en.

⁷ Mi woli la' cuch ti uts'at i ju'sʌntel la' pusic'al, Dios woli' q'ueletla che' bajche' i yalobil; come ¿am ba tatʌl mach bʌ añic mi' ju'sʌben i pusic'al i yalobil?

⁸ Mi ma'añic mi' ju'sʌbeñet la' pusic'al, che' bajche' lac tilel ti' tojlel lac tat, mach i yalobileticla, yañʌch bʌ la' tat.

⁹ Che' ja'el lac tatob ti pañimil tsi' ju'sʌbeyonla lac pusic'al, tsa' lac chʌn q'ueleyob ti ñuc. ¿Mach ba yomic ñumen mi lac jac'ben i t'añ lac Tat ti panchan cha'añ cuxul mi la cajñel?

¹⁰ Isujm ya cha'p'ejl uxp'ejl jach ja'b tsi' ju'sayob lac pusic'al jiñi lac tatob che' bajche' tsi' bajñel ña'tayob ila ti pañimil; pero Dios mi' ju'san lac pusic'al cha'añ mi la cochel ti ch'ujul che' bajche' ch'ujul Dios, cha'añ mi lac taj lac wenlel.

¹¹ Isujm, mach tijicñayic mi la cu'bin che' añ majqui mi' ju'sʌbeñonla lac pusic'al, poj ch'ijiyem mi la cu'bin; pero ti wi'il mi' yʌc' ti p'ojlel toj bʌ lac pusic'al yic'ot i ñʌch'tʌlel che' bʌ tsa'ix lac jac'ʌ ti uts'at.

Mu' bʌ i ts'a'leñob i yutslel Dios

¹² Jiñi cha'añ, p'ʌt-esanla c'um bʌ la' c'ʌb yic'ot c'um bʌ la' pix,

¹³ pʌtʌla toj bʌ bij ame yajlic jiñi q'uichq'uichña bʌ mi' cha'len xʌmbal cha'añ ma'añic mi yutsi asiyel.

¹⁴ Cha'lenla wersa cha'añ ñʌch'ʌl mi la' wajñel yic'ot pejtelel wiñicob x'ixicob, ñopola ajñel ti ch'ujul; come ma'añic majqui mi caj i q'uel lac Yum mi mach ch'ujulic.

¹⁵ Tsajiletmela ame añic juntiquil ti la' tojlel mach bʌ añic mi' tajben i yutslel i pusic'al Dios, cʌntan la' bʌ ame añic jiñi ch'aj bʌ mu' bʌ i tech mich'ajel ti la' pusic'al mu' bʌ i bi'b-esʌbeñob i pusic'al ca'bʌlob.

¹⁶ Tsajiletla ame añic majqui mi' taj i yixic, ame añic majqui mi' ts'a'len jiñi uts'at tac bʌ i cha'añ Dios che' bajche' Esaú, tsi' choño i yʌscunlel cha'añ mi' poj taj i bʌl i ñʌc'.

¹⁷ Come la' wujil, che' yom i ch'ʌmben i bendición i tat, ma'añic tsa' mejli; anquese tsi' cha'le ca'bʌl uq'uel, ma'añix bajche' tsa' mejli i mel i bʌ.

¹⁸ Come jatetla mach pʌybileticla ti wits che' bajche' israelob, ba' woli ti lejmel c'ajc, ba'añ bʌbʌq'uen bʌ sutujt ic' yic'ot ja'al, ba' ic'yoch'an pañimil,

¹⁹ yic'ot i t'añ trompeta, yic'ot i t'añ Dios, jiñi tsa' bʌ i yu'biyob jiñi t'añ tsi' c'ajtibeyob Moisés ti wocol t'añ cha'añ ma'añic mi' chʌn pejcañob Dios,

²⁰ come mach cujchic i cha'añob che' bʌ tsa' su'bentiyob: Wersa mi caj i jujlel ti xajlel majqui jach mi' t'uchtan jiñi wits, mi wiñic o mi alʌc'ʌl.

²¹ C'ax bʌbʌq'uen chuqui tsi' q'ueleyob, jiñi cha'añ Moisés tsi' yʌlʌ: “Woliyon ti bʌq'uen, tsiltsilñayon”, che'en.

²² Pero jatetla tsa'ix c'otiyetla ti wits i c'aba' Sión, i tejclum jiñi cuxul bʌ Dios, jiñi Jerusalén am bʌ ti panchan ba' tempʌbilob bajc'ʌl ángelob,

²³ tsa'ix c'otiyetla ja'el ba' tempʌbilob jiñi ñaxan bʌ i yalobilob Dios ts'ijbubilo' bʌ i c'aba' ti panchan. Ya'añ Dios mu' bʌ i mel pejtelel wiñicob, ya'añob i ch'ujlel toj bʌ wiñicob tsa'ix bʌ cha' mejliyob ti toj,

²⁴ tsa'ix c'otiyetla ba'añ Jesús, jiñi tsa' bʌ i yʌq'ueyonla jiñi tsijib xuc'ul bʌ t'añ tsijcʌbil ti' ch'ich'el cha'añ mi' ñusʌntel lac mul, ñumen uts'at i ch'ich'el che' bajche' i ch'ich'el Abel.

²⁵ Tsajiletla ame la' ñusan lac Yum woli bʌ ti t'añ, come jiñi israelob tsa' bʌ i ñusʌbeyob i t'añ Moisés i wiñic Dios wʌ' ti pañimil tsi' wersa tojoyob i mul, ñumen mi caj lac toj joñonla mi woli lac ñusan Dios mu' bʌ i tic'onla ya' ti panchan.

²⁶ Che' bʌ tsi' cha'le t'añ Dios ya' ti wits tsi' ñijca pañimil ti' t'añ, pero wʌle che' bʌ tsi' yʌq'ueyonla i t'añ tsi' yʌlʌ: “Mi caj c ñijcan yam bʌ junyajl ili pañimil, pero mach jiñic jach ili pañimil yic'ot panchan”.

²⁷ Che' bʌ tsi' yʌlʌ: “Yam bʌ junyajl to”, woli i yʌq'ueyonla lac ña'tan cha'añ mi' caj i q'uextʌyel jiñi melbil tac bʌ yujil bʌ ñijcʌyel, cha'añ mi' pʌntʌyel ti jiñi mach bʌ yujilic ñijcʌyel cha'añ mi' jalijel.

²⁸ Jiñi cha'añ la' lac chʌn su'ben Dios wocolix i yʌlʌ cha'añ ochemoñixla ti' yumʌntel mach bʌ yujilic ñijcʌyel, la' lac ch'ujutesan Dios ti uts'at yic'ot pejtelel lac pusic'al yic'ot bʌq'uen,

²⁹ come Dios jiñʌch c'ajc yujil bʌ jisaya.