Hebreos 10 - Jiñi Tsiji' bʌ Wen T'añ cha'añ Estudio

¹ Come i mandar Moisés cojach mi' pʌsbeñonla i yʌxñʌlel jiñi mu' to bʌ caj i tilel, jiñi mero isujm bʌ, jiñi mandar mach mejlic i ts'ʌctesʌbeñob i wenlel i pusic'al, anquese ti jujump'ejl ja'b mi' chʌn tsʌnsʌbeñob i majtañ Dios che' mi' ch'ujutesañob.

² Tsa'ic mejli i sʌc-esan jiñi mu' bʌ i ch'ujutesañob Dios, jasʌl junyajl tsi' tsʌnsʌbeyob i majtañ. Che'ic jiñi tsa' junyajlel ñusʌbentiyob i mul.

³ Pero che' mi' chʌn tsʌnsʌbeñob i majtañ Dios ti jujump'ejl ja'b, jiñʌch cha'añ mi' chʌn ña'tʌntel añʌch mulil,

⁴ come i ch'ich'el tat wacax yic'ot i ch'ich'el tat chivo mach mejlic i junyajlel jisan mulil.

⁵ Jiñi cha'añ, che' bʌ tsa' tili Cristo ti pañimil, tsi' yʌlʌ: “Mach awomic tsʌnsʌbil bʌ a majtañ yic'ot ofrenda. Pero tsa' wʌq'ueyon c bʌc'tal.

⁶ Ma'añic ma' mulan pulbil bʌ a majtañ yic'ot yan tac bʌ mu' bʌ i yʌq'ueñetob cha'añ ma' ñusʌbeñob i mul.

⁷ Jiñi cha'añ tsa' cʌlʌ: Awilan, c Dios, tsa'ix tiliyon cha'añ mic mel chuqui awom, che' bajche' ts'ijbubil ti bʌlbil bʌ juñ”.

⁸ Ti ñaxan tsi' yʌlʌ: “Mach awomic tsʌnsʌbil bʌ a majtañ yic'ot alʌc'ʌl mu' bʌ i yʌq'ueñetob ti a majtañ, yic'ot pulbil bʌ a majtañ, yic'ot yan tac bʌ cha'añ ma' ñusʌbeñob i mul, mach che'ic ma' mulan”, anquese ti pejtelel ili majtañʌl mi' yʌc'ob che' bajche' mi' yʌl jiñi mandar.

⁹ Ti wi'il tsi' yʌlʌ: “Awilan, tsa' tiliyon cha'añ mic mel chuqui awom Dios”, che' bajche' jiñi, tsi' jisa jiñi ñaxan bʌ mandar cha'añ mi' wa'chocon jiñi tsiji' bʌ.

¹⁰ Wʌle sʌc-esʌbiloñixla che' bajche' yom Dios cha'añ ti' caj tsi' yʌc'ʌ junyajl jach i bʌc'tal Jesucristo che' bʌ tsa' chʌmi cha'añonla.

¹¹ Pejtelel motomaj ti' tojlel judíojob ti jujump'ejl q'uiñ mi' chʌn aq'ueñob jiñi jach bʌ majtañʌl, anquese iliyi mach mejlic i wis jisan mulil.

¹² Pero Cristo junyajl tsi' yʌc'ʌ i bʌ ti' majtañ Dios cha'añ mi' toj lac mul ti pejtelel ora, che' bʌ tsa' ujti i yʌc' i bʌ, tsa' buchle ya' ti' ñoj Dios.

¹³ Ya' buchul woli ti pijt jinto mi' t'uchtʌntel pejtelel i contra,

¹⁴ come ti jump'ejl jach i majtañ Dios, tsi' junyajlel wen'esʌbeyob i pusic'al jiñi sʌc-esʌbilobix bʌ i cha'añ.

¹⁵ Che'ʌch mi' su'beñonla jiñi Ch'ujul bʌ Espíritu; ñaxan tsi' yʌlʌ:

¹⁶ “Jiñʌch xuc'ul bʌ c t'añ mu' bʌ caj c mel yic'otob che' ñumeñix ca'bʌl q'uiñ, che'en lac Yum: mi caj cotsʌbeñob c mandar ti' pusic'al, yic'ot mi caj c ts'ijbubeñob ti' ña'tʌbal”, che'en lac Yum.

¹⁷ Tsi' cha' alʌ: “Ma'añic mi caj c chʌn ña'tʌbeñob i mul yic'ot i jontolil”, che'en.

¹⁸ Che' ñusʌbilix lac mul, mach chʌn yomix i majtañ Dios cha'añ mulil.

3. LAC XUC'TɅLEL YIC'OT LAC P'ɅTɅLEL TI JIÑI WOCOL TAC ( 10.19—12.29 ) Xic'bentel cha'añ xuc'ulob

¹⁹ Jiñi cha'añ, hermañujob, añ lac librejlel cha'añ mi lac cochel ti jiñi C'ax Ch'ujul bʌ Ajñibʌl cha'añ ti' ch'ich'el Jesucristo,

²⁰ ti jiñi tsiji' bʌ bij, jiñi cuxul bʌ tsa' bʌ i jambeyonla Jesús, wʌle mi mejlel laj c'axel ti junwejl pisil, jiñʌch i bʌc'tal.

²¹ Che' ja'el añ lac cha'añ c'ax ñuc bʌ Motomaj mu' bʌ i cʌntan i cha'año' bʌ Dios.

²² Jiñi cha'añ la' lac lʌc'tesan lac bʌ ba'añ Dios ti jump'ejl lac pusic'al, mach yomic tilebixel lac pusic'al che' mi lac ñop, yom sʌc-esʌbil lac pusic'al ti leco tac bʌ lac ña'tʌbal yic'ot yom pocbil lac bʌc'tal ti yʌx bʌ ja'.

²³ La' lac chʌn ac' ti lac pusic'al chuqui ñopol lac cha'añ woli bʌ lac pijtan, come xuc'ul jiñi tsa' bʌ i yʌc'ʌ i t'añ.

²⁴ La' laj coltañ lac bʌ ti pejtelel chuqui wen, cha'añ mi laj c'uxbin lac bʌ bajche' yom yic'ot wen bʌ lac melbal,

²⁵ mach yomic mi laj cʌy lac tempan lac bʌ che' bajche' mi' melob lamital, la' lac ch'ejl-esan lac bʌ; cojco che' wolix laj q'uel woli ti lʌc'tiyel jiñi cojix bʌ q'uiñ.

Mulil cha'añ jach la com che' la cujilix

²⁶ Mi añ majqui mi' chʌn cha'len mulil cha'añ jach yom i pusic'al che' cʌñʌlix i cha'añ isujmlel, wolix i ñusan Cristo tsa' bʌ i tojbe i mul. Ma'añix majqui mi caj i chʌn tojben i mul;

²⁷ añ jach bʌbʌq'uen bʌ i pijtaya ba' mi caj i tojob i mul ti' c'ʌc'al i mich'ajel Dios pejtelel i contrajob.

²⁸ Majqui jach tsi' ñusʌbe i mandar Moisés, tsa' tsʌnsʌnti che' bʌ añ cha'tiquil uxtiquil tsa' bʌ i tsictesʌbeyob i mul, ma'añic majqui tsi' p'unta.

²⁹ ¿Mach ba ñumeñic mi caj i toj i mul jiñi mu' bʌ i ts'a'len i Yalobil Dios, jiñi mu' bʌ ñusan jiñi xuc'ul bʌ t'añ yic'ot i ch'ich'el mu' bʌ i sʌc-esañonla, yic'ot jiñi woli' bʌ i ts'a'len jiñi Espíritu woli bʌ i pʌyonla ti' yutslel i pusic'al?

³⁰ La cujil jiñʌch lac Yum tsa' bʌ i yʌlʌ: “Joñon mij q'uextan jontolil; joñon mi caj cʌq'uen i toj”. Tsi' cha' alʌ: “Lac Yum mi caj i mel i cha'año' bʌ”.

³¹ Bʌbʌq'uen jax muq'uic i yʌq'ueñonla lac toj lac mul jiñi cuxul bʌ Dios.

³² Cha' ña'tanla bajche' tsa' la' mele ti yam bʌ ora, che' bʌ tsa' la' ch'ʌmbe isujm, chʌn xuc'uletla yic'ot lac Yum anquese ca'bʌl jax tsa' la' ñusa wocol,

³³ tsa' wajlentiyetla, tsa' tic'lʌntiyetla ti' wut ca'bʌlob, yaño' bʌ tsi' temeyob i bʌ yic'ot jiñi tsa' bʌ tic'lʌntiyob,

³⁴ come tsa' la' p'unta jiñi tsa' bʌ mʌjquiyob, che' bʌ tsa' xujch'inti la' chu'bʌañ tsa' la' cuchu yic'ot i tijicñʌyel la' pusic'al, come la' wujil añ ñumen wen bʌ la' chu'bʌañ ti panchan mach bʌ yujilic jilel.

³⁵ Jiñi cha'añ mach mi la' sʌt i ch'ejlel la' pusic'al, come añʌch ñuc bʌ la' chobejtʌbal woli bʌ la' pijtan,

³⁶ yom chʌn xuc'uletla ti' cuchol wocol cha'añ mi la' taj chuqui tac albil i cha'añ Dios che' bʌ tsa'ix la' mele chuqui yom Dios.

³⁷ Come jumuc' to mi caj i tilel jiñi tal bʌ, mach jalix mi caj i tilel.

³⁸ “Jiñi toj bʌ i pusic'al cuxul mi' yajñel cha'añ tsi' ñopo Dios, che'en. Pero mi tsi' cʌyʌ i ñopon, mach tijicñayic mi caj q'uel”.

³⁹ Pero mach lajaloñicla bajche' jiñi mu' bʌ i cha' cʌy i ñopob, mu' bʌ i majlelob ti c'ajc, joñonla mi lac ñop Dios mu' bʌ i coltañ lac ch'ujlel.