Hebreos 1 - Jiñi Tsiji' bʌ Wen T'añ cha'añ Estudio

I TEJCHIBAL: DIOS TSI' CHA'LE T'AÑ TI YALOBIL ( 1.1-4 )

¹ Ti oñiyi, Dios tsi' c'ʌñʌ jiñi x'alt'añob cha'añ mi' pejcan lac ñojte'el, ca'bʌl tsi' pejcayob ti' chajp ti' chajp che' bajche' yom i pejcañob ti jujunyajl,

² wʌle, ti ili cojix bʌ q'uiñ tac tsa'ix i c'ʌñʌ i Yalobil i pejcañonla, tsi' wa'choco cha'añ mi' yʌq'uentel pejtelel chuqui tac añ, tsi' c'ʌñʌ ti' melol pejtelel chuqui tac añ;

³ mi' wen ac' ti tsictiyel i ñuclel i Tat, mero Diosʌch ajñel, i tsictiyemlelʌch i Tat, ti' p'ʌtʌlel i t'añ mi' cʌntan pejtelel chuqui tac añ. Che' bʌ tsa' ujti i poc lac mul, tsa' buchle ti' ñoj jiñi C'ax Ñuc bʌ am bʌ ti panchan.

⁴ Ñumen ñuc bajche' jiñi ángelob, come ñumen ñuc tsa' otsʌbenti i c'aba' bajche' ángelob.

1. I ÑUCLEL I YALOBIL ( 1.5—4.13 ) I yalobil ñumen ñuc che' bajche' ángelob

⁵ Come Dios ma'añic ba' ora tsi' su'be mi juntiquilic ángel: “Jatet Calobilet, wʌle tsa' ochiyon ti a Tat”, ma'añic ba' ora tsi' su'be ángel: “A Taton, jatet calobilet”.

⁶ Che' bʌ tsi' choco tilel ti pañimil ñaxan bʌ i Yalobil, Dios tsi' yʌlʌ: “La' i ch'ujutesañob Calobil pejtelel ángelob”, che'en.

⁷ Dios tsi' yʌlʌ, cha'añ jiñi ángelob: “Orajach mi' majlel i yángelob che' bajche' ic', lajalob jiñi x'e'telob i cha'añ che' bajche' c'ajc mu' bʌ ti lejmel”, che'en.

⁸ Pero che' bʌ tsi' pejca i Yalobil, tsi' yʌlʌ: “A yumʌntel Dios, ti pejtelel ora mi' yajñel, ma'añic i jilibal, ti' p'ʌtʌlel a yumʌntel mi caj a mel chuqui toj.

⁹ Tsa' c'uxbi chuqui toj, tsa' ts'a'le jontolil, jiñi cha'añ Dios, jiñi a Dios tsi' yajcayet, tsa'ix i ñumen aq'ueyet i tijicñʌyel a pusic'al che' bajche' yaño' bʌ a pi'ʌlob”, che'en.

¹⁰ Tsi' yʌlʌ ja'el: “Jatet yumʌlet, ti' cajibal tsa' wa'choco jiñi pañimil. Jiñi panchan i melbalʌch a c'ʌb.

¹¹ Mi' caj ti jilel panchan pañimil, pero jatet mi caj a chʌn ajñel. Mi' cajel ti tsuculʌyel jiñi pañimil yic'ot panchan che' bajche' bujcʌl;

¹² mi' caj a pʌc che' bajche' mi' pʌjquel pisil, mi' cajel ti laj q'uextʌyel, che'en. Pero jatet chʌn junlajalet ti pejtelel ora, ma'añic mi caj i jilel a ja'bilel”.

¹³ Dios ma'añic ba' ora tsi' su'be mi juntiquilic ángel: “Buchi' tic ñoj jinto mi cʌq'ueñet a jisan a contrajob”.

¹⁴ Pejtelel jiñi ángelob, ¿mach ba espíritujobic mu' bʌ i cha'leñob e'tel? ¿Mach ba chocbilobic tilel cha'añ mi' cʌntañob jiñi mu' bʌ caj i coltʌntelob?