Gálatas 6 - Jiñi Tsiji' bʌ Wen T'añ cha'añ Estudio

¹ Hermañujob, mi tsa' yajli ti mulil juntiquil, jatetla woli bʌ la' wajñel ti jiñi Espíritu, cha' toj-esanla ti' yutslel la' pusic'al, pero chʌcʌ q'uele la' bʌ ame pʌjyiquetla ti mulil ja'el.

² Coltañ la' bʌ ti' cuchol wocol, come jiñʌch bajche' mi la' jac'ben i mandar Cristo.

³ Come mi añ majqui mi' lon ña'tan añ i bajñel wenlel, woli jach i lotin i bʌ.

⁴ Ti jujuntiquil la' i bajñel cʌn i bʌ, mi uts'atʌch i melbal; che' jiñi tijicñesan a pusic'al cha'añ wen a melbal, pero mach ma' chañ-esan a bʌ ti' tojlel yaño' bʌ cha'añ jiñi a melbal.

⁵ Come añ ti lac wenta lac melbal ti jujuntiquilonla.

⁶ Jiñi woli bʌ ti cʌntesʌntel ti' t'añ Dios, la' i coltañ i yaj cʌntesa yic'ot i chu'bʌañ.

⁷ Mach mi la' wʌc' la' bʌ ti lotintel; Dios mach mejlic ti wajlentel, come pejtelel chuqui jach mi' pʌc' wiñic mi caj i c'aj,

⁸ jiñi mu' bʌ i pʌc' chuqui tilem bʌ ti' tsucul pusic'al, mi caj i c'aj tojmulil. Pero jiñi mu' bʌ i cha'len pac' ti jiñi Espíritu, mi caj i c'aj i cuxtʌlel mach bʌ añic mi' jilel.

⁹ Mach yomic mi lac lujb-an ti' melol chuqui uts'at, come tal i yorajlel mi caj lac cha'len c'ajbal mi ma'añic mi' lujb-an lac pusic'al.

¹⁰ Jiñi cha'añ la' laj coltañ pejtelel wiñicob che' i yorajlel to, pero ñumen yom mi laj coltañ jiñi mu' bʌ i ñopob Cristo.

I YUJTIBAL ( 6.11-18 ) Pablo mi' taj i ñuclel ti' cruz Cristo

¹¹ Q'uelela tsa' c ts'ijbubeyetla ili juñ ti colem bʌ ts'ijbujel melbil bʌ tij c'ʌb.

¹² Pejtelel jiñi yomo' bʌ q'uejlel ti ñuc, mi' wersa xic'beñetla cha'añ mi la' ch'ʌm tsep pʌchʌlel, come mach yomobic i yu'bin wocol cha'añ i cruz Cristo,

¹³ pero jiñi woli bʌ i ch'ʌmob tsep pʌchʌlel ma'añic woli i jac'ob ti ts'ʌcʌl jiñi mandar; pero yomob cha'añ mi la' ch'ʌm tsep pʌchʌlel, cha'añ mi' q'uelob i bʌ ti ñuc cha'añ i sellojlel ti' la' bʌc'tal.

¹⁴ Pero joñon ma'añic mic sʌclan c ñuclel ti la' tojlel, cojach mij q'uel ti ñuc i cruz lac Yum Jesucristo, come ya' ti cruz tsa' jili i p'ʌtʌlel pañimil tic tojlel. Tsa' ch'ijleyon ti cruz cha'añ ma'añic mic chʌn mulan i cha'añ bʌ pañimil,

¹⁵ come ti Cristo Jesús ma'añic chuqui mi' cha'len mi tsepbil lac pʌchʌlel o mi mach tsepbilic lac pʌchʌlel, pero jiñi ñumen ñuc bʌ jiñʌch che' melbiloñixla ti tsijib.

¹⁶ La' aq'uenticob i ñʌch'tʌlel yic'ot i p'untʌntel ti Dios pejtelel jiñi mu' bʌ i melob che' bajche' woli c su'beñetla yic'ot pejtelel jiñi mero i cha'año' bʌ Dios.

¹⁷ Mach i chʌn tic'lañon majqui jach añ tij contra; come tsiquil i yejtal tac c lojwel cha'añ i wiñicon Jesús.

I yujtibal i yutslel i t'añ Pablo

¹⁸ Hermañujob, la' ajñic ti la' pusic'al i yutslel lac Yum Jesucristo ti la' pejtelel. Amén.