Gálatas 5 - Jiñi Tsiji' bʌ Wen T'añ cha'añ Estudio

Xuc'uletla ti la' librejlel ti Cristo

¹ Librejoñixla, come Cristo tsi' yʌc'ʌyonla ti colel ya' ba' chuculonla, jiñi cha'añ yom libre mi la' chʌn ajñel, mach yomic mi la' cha' ac' la' bʌ ti chujquel ti to'ol e'tel.

² Awilan joñon, Pablo, mic su'beñetla, mi woli la' ch'ʌm tsep pʌchʌlel, ma'añic i c'ʌjñibal Cristo ti la' tojlel.

³ Mic cha' su'beñetla, majqui jach mi' ch'ʌm tsep pʌchʌlel, wersa yom mi' jac' pejtelel i mandar Moisés.

⁴ Ti pejteletla mu' bʌ la' lon ña'tan woli la' ch'ʌjmel ti' wenta Dios cha'añ i jac'ol mandar, chocbiletixla ti Cristo; loq'uemetixla ti' yutslel i pusic'al Dios.

⁵ Joñonla tsa' bʌ lac ñopo Dios woli lac pijtan laj coltʌntel ti' p'ʌtʌlel jiñi Espíritu cha'añ mi laj q'uejlel ti toj,

⁶ come ti Cristo Jesús ma'añic chuqui mi' cha'len mi tsepbil lac pʌchʌlel, o mi mach tsepbilic lac pʌchʌlel, pero ca'bʌl i c'ʌjñibal che' ñopolix lac cha'añ jiñi wen t'añ mu' bʌ i yʌq'ueñonla laj c'uxbin lac bʌ.

⁷ Ti yam bʌ ora tsa' la' jac'ʌ ti uts'at jiñi wen t'añ. ¿Majqui tsi' mʌctayetla cha'añ mi la' cʌy la' jac'ben isujmlel?

⁸ Mach tilemic ti Dios mu' bʌ i pʌyetla.

⁹ Jasʌl ts'ita' levadura cha'añ mi' laj paj-esan caxlan waj.

¹⁰ Cʌyʌlon ti lac Yum, woli j c'ajtiben cha'añ mi' cʌntañetla cha'añ ma'añic mi la' jac' yam bʌ t'añ; Dios mi caj i yʌq'ueñ i toj i mul majqui jach mi' tic'lañetla.

¹¹ Ma'añic i tic'lʌntel jiñi mu' bʌ i su'b tsep pʌchʌlel, pero come joñon woli c su'b jiñi wen t'añ cha'añ jiñi cruz, jiñi cha'añ woli c tic'lʌntel.

¹² Uts'at muq'uic i junyajlel tsepob i bʌ cha'añ mi' loq'uelob ti la' tojlel jiñi woli bʌ i tic'lañetla.

3. I C'ɅÑOL LAC LIBREJLEL ( 5.13—6.10 )

¹³ Hermañujob, tsa' pʌjyiyetla cha'añ libre mi la' wajñel; wʌle mach la' cha' jac'ben i tsuculel la' pusic'al che' librejetixla, ti la' c'uxbiya coltañ la' pi'ʌlob,

¹⁴ come uts'atax che' wolic la' jac' ti' pejtelel ili mandar che' mi la' jac' ili t'añ: “C'uxbin a pi'ʌlob che' bajche' ma' bajñel c'uxbin a bʌ”, che'en.

¹⁵ Pero mi woli la' c'ux la' bʌ yilal, mi woli la' jach' la' bʌ yilal, tsajiletla ame la' jisan la' bʌ.

I tsuculel lac pusic'al yic'ot i yʌc'bal jiñi Espíritu

¹⁶ Mic su'beñetla: Cha'lenla xʌmbal ti jiñi Espíritu, pero mach mi la' jac'ben i colosojlel la' pusic'al,

¹⁷ come i colosojlel lac pusic'al i contrajʌch jiñi Espíritu, jiñi Espíritu mi' contrajin lac tsucul pusic'al; jiñi cha'añ mach mejlic la' mel jiñi la' wom bʌ la' mel.

¹⁸ Mi woli' toj-esañetla majlel jiñi Espíritu, mach chʌn añetixla ti' wenta jiñi mandar.

¹⁹ Tsiquilʌch i mul lac tsucul pusic'al, jiñʌch iliyi: [mi' tajob i yixic] mi' cha'leñob ts'i'lel, mi' melob chuqui tac bi'bi', añob i ts'i'lel i wut,

²⁰ mi' ch'ujutesañob dios tac, mi' cha'leñob wujt, yujilob ts'a'leya yic'ot leto, tsʌytsʌyña jax i pusic'al cha'añ chu'bʌañʌl, yujilob mich'ajel yic'ot a'leya, mi' t'oxob i bʌ ti leto cha'añ socol bʌ cʌntesa,

²¹ tsʌytsʌyñayob i pusic'al cha'añ i wenlel yaño' bʌ, [mi' cha'leñob tsʌnsa,] yic'ot yʌc'ʌjel, yic'ot leco bʌ q'uiñijel yic'ot yan tac bʌ mach bʌ weñic. Mic cha' su'beñetla che' bajche' tsa' c su'beyetla ti yam bʌ ora, jiñi mu' bʌ i cha'leñob che' bajche' jiñi, ma'añic mi caj i yochelob ti' yumʌntel Dios.

²² Pero i yʌc'bal jiñi Espíritu jiñʌch laj c'uxbiya, i tijicñʌyel lac pusic'al, i ñʌch'tʌlel lac pusic'al, lac p'ʌtʌlel ti' cuchol wocol, yic'ot p'untaya, coltaya, i xuc'tʌlel lac pusic'al,

²³ la cutslel, yic'ot i tic'ol lac pusic'al; mach tic'bilic jiñi mu' bʌ i mel bajche' iliyi.

²⁴ Pejtelel i cha'año' bʌ Cristo tsa'ix i ch'ijiyob ti cruz i tsucul pusic'al yic'ot pejtelel i colosojlel yic'ot chuqui mi' mulan.

²⁵ Mi cuxulonla cha'añ jiñi Espíritu, la' lac mel chuqui yom Dios ti' p'ʌtʌlel jiñi Espíritu.

²⁶ La' laj cʌy lac chañ-esan lac bʌ, mach yomic mi lac techbeñob i mich'ajel lac pi'ʌlob, mach yomic tsʌytsʌyña lac pusic'al cha'añ i wenlel lac pi'ʌlob.