Gálatas 3 - Jiñi Tsiji' bʌ Wen T'añ cha'añ Estudio

2. DIOS MI' YɅC'ONLA TI LIBRE CHA'AÑ TSA' LAC ÑOPO CRISTO ( 3.1—5.12 ) Mi lac taj jiñi Espíritu che' xuc'ul mi lac ñop

¹ ¡Sojquemetla añet bʌ la ti Galacia! ¿Majqui tsi' socoyetla cha'añ mi la' cʌy la' jac'ben isujmlel jiñi wen t'añ tsa' bʌ wen su'bentiyetla cha'añ tsa' ch'ijle ti cruz Jesucristo?

² Cojach com j c'ajtibeñetla: ¿Tsa' ba aq'uentiyetla jiñi Espíritu cha'añ ti' jac'ol i mandar Moisés? ¿Mach ba cha'añic tsa' la' ñopo jiñi wen t'añ che' bʌ tsa' la' wu'bi?

³ ¿Chucoch tsʌts la' pusic'al? Tsa' caji la' ñop Cristo ti' p'ʌtʌlel jiñi Espíritu, pero wʌle, ¿mu' ba i mejlel la' taj la' wenlel ti la' bajñel p'ʌtʌlel?

⁴ ¿Tsa' ba la' to'ol ñusa ca'bʌl wocol cha'añ jiñi wen t'añ? Pero mi cʌl mach to'olic jach.

⁵ Diosʌch jiñi mu' bʌ i yʌq'ueñetla jiñi Espíritu, jiñi mu' bʌ i mel ñuc bʌ i ye'tel ti la' tojlel. ¿Cha'añ ba tsa' la' jac'ʌ jiñi mandar? ¿Mach ba cha'añic tsa' la' ñopo che' bʌ tsa' la' wu'bi?

Dios tsi' q'uelbe i xuc'tʌlel Abraham

⁶ Abraham ja'el tsi' ñopo Dios, jiñi cha'añ Dios tsi' ch'ʌmʌ ti' wenta, tsi' q'uele ti toj.

⁷ Ña'tanla che' jiñi, pejtelel mu' bʌ i ñopob Dios i yalobilobʌch Abraham.

⁸ Wʌn ts'ijbubilʌch ti' t'añ Dios, cha'añ mi caj i ñusʌbeñob i mul ja'el jiñi gentilob che' xuc'ul mi' ñopob Dios, jiñi cha'añ tsa' wʌn su'benti Abraham jiñi wen t'añ: “Ti a tojlel mi caj i tajob i wenlel pejtelel tejclum tac”.

⁹ Jiñi cha'añ, majqui jach mi' ñop Dios mi' taj i wenlel yic'ot Abraham jiñi tsa' bʌ i ñopo Dios ti xuc'ul.

¹⁰ Come pejtelel jiñi mu' bʌ i ñop i coltañob i bʌ ti' jac'ol jiñi mandar mi caj i chojquelob ti Dios. Come ts'ijbubil: “Mux i chojquelob ti Dios pejtelel jiñi mach bʌ añic mi' melob ti ts'ʌcʌl chuqui tac ts'ijbubil ti' juñilel jiñi mandar”.

¹¹ Tsiquil che' jiñi, Dios ma'añic majqui mi' ñusʌben i mul, ma'añic mi' yotsan ti' wenta mi juntiquilic cha'añ jach ti' jac'ol jiñi mandar, come mi yʌl: “Jiñi tsa'ix bʌ i yotsa i bʌ ti' wenta Dios cha'añ jach tsi' ñopo, cuxul mi' yajñel”, che'en.

¹² Mach lajalic i jac'ol mandar che' bajche' i ñopol Cristo, come mi' yʌl: “Jiñi mu' bʌ i jac' jiñi mandar ti ts'ʌcʌl cuxul mi caj i yajñel ti jiñi mandar”, che'en.

¹³ Pero ya' ti cruz Cristo tsi' mʌñʌyonla loq'uel ti' p'ʌtʌlel jiñi mandar mu' bʌ i yʌc'onla ti chojquel, come Cristo tsa' chojqui ti Dios cha'añonla, jiñi cha'añ ts'ijbubil: “Chocbil ti Dios majqui jach mi' joc'chocontel ti te'”,

¹⁴ che'ʌch tsa' ujti cha'añ ti Cristo Jesús mi' tajob i wenlel gentilob ja'el, che' bajche' Dios tsi' wʌn su'be Abraham, cha'añ mi lac laj aq'uentel jiñi Espíritu che' mi lac ñop.

¹⁵ Mic cha'len t'añ ti lajiya hermañujob: Wʌ' ti pañimil che' mi lac ts'ijban ti juñ jump'ejl xuc'ul bʌ t'añ che' bajche' mi caj i t'oxtʌl chu'bʌañʌl che' mi lac chʌmel, ma'añic majqui mi' mejlel i jem, ma'añic majqui mi' mejlel i cha' ts'ijban yam bʌ t'añ che' añix i sellojlel.

¹⁶ Dios tsi' yʌq'ue Abraham xuc'ul bʌ t'añ yic'ot i p'olbal. Ma'añic tsi' yʌlʌ i p'olbalob, pero tsi' yʌlʌ a p'olbal, come juntiquil jach, jiñʌch Cristo.

¹⁷ Jiñʌch isujmlel woli bʌ c su'b: Dios tsi' wʌn su'bu cha'añ mi caj i tilel Cristo, che' ñumeñix jumbajc' yic'ot lujump'ejl i cha'c'al (430) ja'b, tsi' yʌc'ʌ jiñi mandar, jiñi mandar tsa' bʌ tili ti wi'il ma'añic tsi' jeme jiñi xuc'ul bʌ t'añ tsa' bʌ i ñaxan alʌ.

¹⁸ Come mi cha'añʌch jiñi mandar mi laj coltʌntel, che' jiñi mach cha'añic jiñi xuc'ul bʌ t'añ; pero Dios ti' yutslel i pusic'al tsi' colta Abraham che' bʌ tsi' yʌq'ue jiñi xuc'ul bʌ i t'añ.

I c'ʌjñibal jiñi mandar

¹⁹ Jiñi cha'añ, ¿chuqui i ye'tel jiñi mandar che' jiñi? Dios tsi' yʌq'ueyonla jiñi mandar cha'añ mi' tsictesʌbeñonla lac mul, pero ma'añix i c'ʌjñibal jiñi mandar che' mi' tilel i p'olbal che' bajche' wʌn albil ti xuc'ul bʌ t'añ; Dios tsi' c'ʌñʌ i yángelob i yʌq'ueñ mandar Moisés cha'añ mi yʌc' ti cʌjñel jiñi t'añ.

²⁰ Mi juntiquil jach mach wersajic mi' c'ʌn mu' bʌ i ñusan majlel t'añ, pero Dios, che' bʌ tsi' yʌc'ʌ i t'añ cha'añ mi' coltañ wiñicob x'ixicob, tsi' bajñel wa'choco i t'añ.

²¹ Ixcu jiñi mandar, ¿i contra ba jiñi xuc'ul bʌ t'añ albil bʌ i cha'añ Dios? Mach i contrajic; actan tsa'ic aq'uentiyonla laj cuxtʌlel cha'añ ti' jac'ol mandar, che' jiñi, isujmʌch mi laj q'uejlel ti toj cha'añ ti' jac'ol mandar.

²² Pero i t'añ Dios mi' yʌl woli' yajñelob ti' p'ʌtʌlel mulil pejtelel año' bʌ ti pañimil, che' mi la cʌq'uentel jiñi albil bʌ t'añ ti Dios, che' mi lac ñop Jesucristo, muq'uix lac taj laj coltʌntel.

²³ Che' maxto tilemic jiñi wen t'añ mu' bʌ lac ñop, añon to la ti' wenta jiñi mandar, ñup'ulonla jinto tsa' tsictesʌbentiyonla jiñi wen t'añ mu' bʌ lac ñop.

²⁴ Jiñi mandar lajalʌch che' bajche' xtoj-esaya lac cha'añ, cha'añ mi lac ñop Cristo, cha'añ mi laj q'uejlel ti toj.

²⁵ Pero wʌle che' bʌ tilemix jiñi wen t'añ mu' bʌ lac ñop, che' jiñi ma'añoñixla ti' wenta jiñi mandar.

²⁶ I yalobiletla Dios ti la' pejtelel cha'añ tsa' la' ñopo Cristo Jesús.

²⁷ Ti pejteletla tsa' bʌ ochiyetla ti ch'ʌmja' ti Cristo, wolix la' mel che' bajche' Cristo.

²⁸ Come ma'añix judío bʌ, mi griegojic, mi am bʌ ti' yum, o mi librejix añ, ma'añic wiñic mi x'ixic, come ti la' pejtelel jump'ejl jach añetla ti Cristo Jesús.

²⁹ Mi' cha'añetla Cristo, mero i p'olbaletla Abraham, mi caj la' taj jiñi albil bʌ i cha'añ Dios.