Gálatas 1 - Jiñi Tsiji' bʌ Wen T'añ cha'añ Estudio

I TEJCHIBAL ( 1.1-9 ) I yutslel i t'añ Pablo

¹ Pablojon, apóstolon mach chocbiloñic majlel i cha'añ wiñicob mi ti' p'ʌtʌlelic wiñic. Pero i chocbalon majlel Jesucristo yic'ot Dios lac Tat tsa' bʌ i teche ch'ojyel Jesús ba'añ chʌmeño' bʌ.

² Joñon quic'ot pejtelel hermañujob wʌ' bʌ añob woli c ña'tañet lojon xñopt'añet bʌ la mu' bʌ la' tempan la' bʌ ya' ti Galacia.

³ La' aq'uentiquetla i yutslel yic'ot i ñʌch'tʌlel i pusic'al ch'oyol bʌ ti Dios lac Tat yic'ot ti lac Yum Jesucristo.

⁴ Tsi' yʌc'ʌ i bʌ ti chʌmel cha'añ lac mul che' bajche' yom Dios lac Tat cha'añ mi' loc'sañonla ti' p'ʌtʌlel jontolil am bʌ ti pañimil wʌle.

⁵ La' sujbic i ñuclel ti pejtelel ora. Amén.

Ma'añic yam bʌ wen t'añ

⁶ Woli' toj sajtel c pusic'al come maxto añic ora tsa' la' ñopo, pero wʌle wolix la' cha' cʌy Dios tsa' bʌ i pʌyʌyetla ti' yutslel i pusic'al Cristo. Woli la' cha' sutq'uin la' bʌ cha'añ mi la' ñop yam bʌ t'añ.

⁷ Ma'añic yam bʌ wen t'añ, pero añ wiñicob woli bʌ i su'bob yam bʌ t'añ cha'añ mi' socbeñob isujmlel i wen t'añ Cristo.

⁸ Majqui jach mi' su'b yam bʌ t'añ mach bʌ lajalic bajche' jiñi wen t'añ tsa' bʌ c su'bu lojon, mi ángel tilem bʌ ti panchan o mi juntiquil tic tojlel lojon mu' bʌ i su'b yam bʌ t'añ, la' junyajlel chojquic ti Dios.

⁹ Che' bajche' tsa' c su'beyet lojon ti yam bʌ ora woli c cha' su'beñetla: Mi añ majqui woli i su'beñetla yam bʌ wen t'añ yilal mach bʌ jiñic jiñi tsa' bʌ lac ñopo, la' chojquic jiñi wiñic ti Dios.

1. JIÑI WEN T'AÑ TSA' BɅ I SU'BU PABLO ( 1.10—2.21 ) I ye'tel Pablo cha'añ jiñi wen t'añ

¹⁰ ¿Woli ba c sajcan c ñuclel ti' tojlel wiñicob, o ti' tojlel Dios? ¿Woli ba c mel chuqui uts'at cha'añ mi' q'ueloñob ti ñuc wiñicob? Mi woli jach c mel chuqui uts'at cha'añ mi' q'ueloñob ti ñuc wiñicob, che' jiñi mach i wiñicoñic Cristo.

¹¹ Com c su'beñetla hermañujob, jiñi wen t'añ tsa' bʌ c su'bu, mach tilemic ti' ña'tʌbal wiñicob.

¹² Ma'añic tsa' aq'uentiyon yic'ot ma'añic tsa' j ñopo ti' tojlel wiñicob, pero Jesucristo tsi' pʌsbeyon isujmlel i wen t'añ.

¹³ Wen la' wujilix bajche' tsa' c ñopbeyob i ñopbal israelob, ma'añic i p'isol bajche' tsa' c tic'la i cha'año' bʌ Dios mu' bʌ i tempañob i bʌ, tsa' c ñopo c jisañob.

¹⁴ Ti pejtelel i ñopbal israelob ñumen bʌxon ti' jac'ol bajche' c pi'ʌlob, ñumen bʌxon ti' su'bol i t'añ c ñojte'elob.

¹⁵ Dios tsi' yajcayon che' maxto añic tsa' quila pañimil, tsi' pʌyʌyon ti' yutslel jach i pusic'al.

¹⁶ Che'ʌch yom i pusic'al tsi' pʌsbeyon i Yalobil, cha'añ mic su'b ti' tojlel gentilob jiñi maxto bʌ i cʌñʌyobic Dios, ma'añic majqui tsa' c'ajtibe isujmlel jiñi wen t'añ.

¹⁷ Ma'añic tsa' majli j q'uelob ti Jerusalén jiñi ñaxan bʌ apóstolob, pero tsa' majliyon ti Arabia, ti wi'il tsa' cha' sujtiyon tilel ti Damasco.

¹⁸ Che' bʌ ñumeñix uxp'ejl ja'b, tsa' letsiyon majlel ti Jerusalén cha'añ mi cula'tañ Pedro, ya' to tsa' jal-ayon jo'lujump'ejl q'uiñ yic'ot Pedro.

¹⁹ Ma'añic tsa' j q'uele yam bʌ apóstolob; cojach tsa' j q'uele Jacobo, i yijts'in lac Yum.

²⁰ Dios yujil, cha'añ mach c lotic jiñi woli bʌ c ts'ijbubeñetla.

²¹ Ti wi'il tsajñiyon ti tejclum tac ya' ti Siria yic'ot ti Cilicia;

²² pero jiñi xñopt'añob año' bʌ ti Cristo ya' ti Judea, maxto cʌmbiloñic i cha'añob.

²³ Tsa' jach i yu'biyob chuqui woli' yʌlob yaño' bʌ: Jiñʌch, jiñi tsa' bʌ i tic'layonla ti yam bʌ ora, pero wʌle wolix i su'b jiñi wen t'añ tsa' bʌ i lon ñopo i jisan.

²⁴ Tsi' su'buyob i ñuclel Dios, cha'añ jiñi tsa' bʌ i mele tic tojlel.