Filipenses 2 - Jiñi Tsiji' bʌ Wen T'añ cha'añ Estudio

Pec'lel yic'ot i ñuclel Cristo

¹ Jiñi cha'añ mi añ i ñuq'uesʌntel lac pusic'al ti Cristo yic'ot c'uxbiya, mi mux lac wen cʌn lac bʌ ti jiñi Espíritu, mi mux laj c'uxbin lac bʌ, mi mux lac p'untan lac bʌ,

² che' jiñi ts'ʌctesʌbeñon i tijicñʌyel c pusic'al, yom junlajal la' ña'tʌbal yic'ot la' c'uxbiya yic'ot la' t'añ, yom jump'ejl jach la' pusic'al.

³ Ma'añic chuqui yom mi la' wis mel ti' tsʌytsʌyñʌyel la' pusic'al cha'añ mi la' chañ-esan la' bʌ; pero yom pec' mi la' mel la' bʌ, yom ñumen ñuc mi la' q'uel la' pi'ʌlob che' bajche' mi la' bajñel q'uel la' bʌ;

⁴ mach jiñic jach yom mi la' bajñel ña'tan la' wenlel, pero ñumen yom mi la' ña'tan i wenlel la' pi'ʌlob ja'el.

⁵ Yom lajal la' ña'tʌbal che' bajche' i ña'tʌbal Cristo Jesús:

⁶ Anquese junlajal Jesús yic'ot Dios, pero ma'añic tsi' wersa ña'ta i yajñel che' bajche' Dios,

⁷ pero tsi' wen peq'uesa i bʌ, tsa' ajñi che' bajche' juntiquil x'e'tel am bʌ ti' yum, lajal tsi' yila pañimil che' bajche' wiñic;

⁸ che' bʌ lajal tsa' ajñi che' bajche' wiñic, tsi' wen peq'uesa i bʌ, tsi' wen jac'be Dios c'ʌlʌl tsi' yʌc'ʌ i bʌ ti chʌmel ti cruz.

⁹ Jiñi cha'añ Dios tsi' yʌq'ue c'ax ca'bʌl i ñuclel ya' ti' tojlel, tsi' yʌq'ue ñumen ñuc bʌ i c'aba' che' bajche' pejtelel jiñi ñuco' bʌ i ye'tel,

¹⁰ cha'añ ti' c'aba' Jesús mi caj i ñocchocoñob i bʌ pejtelel año' bʌ ti panchan yic'ot ti pañimil yic'ot ti' ye'bal lum;

¹¹ ti pejtelelob mi caj i yʌlob Yumʌlʌch Jesucristo, cha'añ mi' tsictiyel i ñuclel Dios lac Tat.

I sʌclel pañimil

¹² Jiñi cha'añ hermañujob, c'uxbibilet bʌ lac cha'añ, che' bajche' tsa' la' jac'beyon che' ya' to añon la' wic'ot, ñumen wen woli la' jac' wʌle che' mach ya'ix añon la' wic'ot, yom ti' tsiltsilñʌyel la' pusic'al yic'ot la' bʌq'uen mi la' ch'ʌm ti la' wenta la' coltʌntel,

¹³ come Dios woli' mel i ye'tel ti la' pusic'al cha'añ mi la' mulan yic'ot cha'añ mi la' mel chuqui yom Dios.

¹⁴ Melela ti pejtelel la' pusic'al, mach yomic mi la' cha'len wulwul t'añ mi a'leya,

¹⁵ che' jiñi toj mi caj la' wajñel ti jump'ejl la' pusic'al, i yalobiletla Dios mach bʌ añic la' bi'bi'lel, anquese joyoletla ti jiñi mach bʌ tojobic i pusic'al, jiñi sojquemob jax bʌ, mi' tsictiyel la' sʌclel ti' tojlelob che' bajche' ec';

¹⁶ che' woli la' wʌc' ti cʌjñel jiñi cuxul bʌ T'añ, che' jiñi, tijicña mi caj cu'bin ti' q'uiñilel Cristo come mach lolomic jach que'tel.

¹⁷ Tsa'ix la' ñopo Cristo jiñi tsa' bʌ i yʌc'ʌ i bʌ ti tsʌnsʌbil bʌ i majtañ Dios, mi che'ʌch yom mic chʌmel ja'el cha'añ xuc'ul mi la' ñop, wen tijicñayon quic'otetla.

¹⁸ Jiñi cha'añ yom tijicñayetla, yom mi la' ñuq'uesʌbeñon c pusic'al ja'el.

2. I YE'TEL PABLO ( 2.19—3.21 ) Timoteo yic'ot Epafrodito

¹⁹ Mic pijtan ti lac Yum Jesús, cha'añ mic choc tilel Timoteo ti ora ba'añetla, cha'añ mi' ñuc añ c pusic'al che' mi cu'bin bajche' añetla;

²⁰ come ma'añic yam bʌ c pi'ʌl ilayi lajal bʌ mi' ña'tan che' bajche'on, jiñi jach Timoteo mu' bʌ i ña'tan la' wenlel ti jump'ejl i pusic'al,

²¹ ti pejtelelob mi' ña'tañob i bajñel wenlel, ma'añic mi' ña'tañob chuqui yom Cristo Jesús.

²² Pero la' wujilix añʌch ca'bʌl i c'ʌjñibal Timoteo, che' bajche' ch'itoñ mu' bʌ i coltañ i tat ti e'tel, che'ʌch tsi' coltayon Timoteo ti' pucol jiñi wen t'añ.

²³ Jiñi cha'añ com c choc majlel ya' ba'añetla ba' ora mic ña'tan bajche' mi caj i yujtel jiñi c wocol;

²⁴ cujil ti lac Yum cha'añ mach jalix mi caj c tilel ja'el ya' ba'añetla.

²⁵ Tsa' c ña'ta ja'el cha'añ mic choc majlel ba'añetla jiñi la quermañu Epafrodito, jiñʌch c pi'ʌl ti e'tel ti jiñi wen bʌ guerra, chocbil bʌ tilel la' cha'añ, tsa'ix i wen coltayon;

²⁶ yom i q'ueletla che' ti la' pejtelel, come tsi' wen mele i pusic'al come yujil cha'añ tsa' la' wu'bi cha'añ c'am.

²⁷ Isujmʌch tsa' wen c'am-a Epafrodito, colelix i chʌmel; pero Dios tsi' p'unta, mach jiñic jach tsi' p'unta Epafrodito, tsi' p'untayon ja'el, ame p'ojlic i ch'ijiyemlel c pusic'al.

²⁸ Jiñi cha'añ com c bʌc' choc tilel ba'añetla, cha'añ mi la' taj la' tijicñʌyel che' mi la' q'uel, che' ja'el mi' caj i lajmel jiñi c tsic pusic'al.

²⁹ Pʌyʌla ochel ti lac Yum ti' tijicñʌyel la' pusic'al, q'uelela ti ñuc pejtelel mu' bʌ i melob che' bajche' Epafrodito,

³⁰ come cha'añ ti ye'tel Cristo colel i chʌmel, tsi' yʌc'ʌ i bʌ ba' bʌbʌq'uen mi' chʌmel cha'añ mi' ts'ʌctesʌbeñetla chuqui añ to yom melol tic tojlel maxto bʌ añic tsa' la' melbeyon.