Filipenses 1 - Jiñi Tsiji' bʌ Wen T'añ cha'añ Estudio

I TEJCHIBAL ( 1.1-11 ) Cortesía

¹ Pablojon quic'ot Timoteo, i wiñicon lojon Jesucristo, woli c ts'ijbubeñet lojon ili juñ, pejtelel i cha'añet bʌ la Cristo Jesús ya' ti Filipos, yic'ot xcʌntayajob yic'ot diáconojob.

² La' aq'uentiquetla i yutslel yic'ot i ñʌch'tʌlel la' pusic'al ch'oyol bʌ ti Dios lac Tat yic'ot lac Yum Jesucristo.

I yoración Pablo cha'añ xñopt'añob ya' ti Filipos

³ Ti jujunyajl che' mic ña'tañetla, mic su'ben c Yum Dios wocolix i yʌlʌ,

⁴ ti pejtelel ora che' mic tajetla ti oración, mij c'ajtiben Dios la' wenlel ti' tijicñʌyel c pusic'al,

⁵ mic su'ben wocolix i yʌlʌ Dios, come c'ʌlʌl ti' cajibal che' bʌ tsa' caji la' ñop c'ʌlʌl wʌle, woli la' coltañon ti' pucol jiñi wen t'añ;

⁶ che' bʌ cʌntesʌbiletixla, Dios mi caj i ts'ʌctesan majlel jiñi wen bʌ e'tel tsa' bʌ i teche ti la' pusic'al c'ʌlʌl ti' q'uiñilel Jesucristo.

⁷ Che'ʌch yom mic chʌn ña'tañetla ti la' pejtelel ti pejtelel ora, come añetla tic pusic'al; jiñi cha'añ woli la' tajben i yutslel i pusic'al Dios quic'ot, come chʌn xuc'ulon ti jiñi wen t'añ wʌ' ba' ñup'ulon, woli c chʌn tsictesan isujmlel.

⁸ Yujil Dios cha'añ ti pejtelel c pusic'al mic wen c'uxbiñetla ti la' pejtelel yic'ot i c'uxbiya Jesucristo.

⁹ Mij c'ajtiben ti oración, cha'añ mi' chʌn p'ojlel la' c'uxbiya yic'ot la' ña'tʌbal yic'ot ca'bʌl la' pusic'al,

¹⁰ cha'añ mi la' yajcan chuqui ñumen wen, cha'añ mi la' wajñel ti' sʌclel la' pusic'al ti' tojlel la' pi'ʌlob c'ʌlʌl ti' q'uiñilel Cristo,

¹¹ cha'añ ca'bʌl mi' yʌc' i wut toj bʌ la' pusic'al ti' tojlel Jesucristo, che' jiñi, mi caj i tsictiyel i ñuclel Dios, mi caj i su'bentel wocolix i yʌlʌ.

1. CHE' BAJCHE' MI LA CAJÑEL TI CRISTO ( 1.12—2.18 ) Cha'añon ñumen uts'at mi cajñel yic'ot Cristo

¹² Hermañujob com mi la' ña'tan, jiñi wocol tsa' bʌ cu'bi tsi' yʌc'ʌ ti utsi pujquel jiñi wen t'añ,

¹³ ti' tojlel pejtelel i soldadojob César woliyo' bʌ ti cʌntaya, yic'ot yaño' bʌ ja'el, laj yujilob ñup'ulon cha'añ ti' caj Cristo.

¹⁴ Ca'bʌl la quermañujob tsa' ch'ejl-ayob ti lac Yum cha'añ ñup'ulon, ñumen ch'ejl woli' su'bob jiñi wen t'añ, ma'añobix i bʌq'uen.

¹⁵ Isujm añ wiñicob mu' bʌ i su'bob i T'añ Cristo yic'ot i tsʌytsʌyñʌyel i pusic'al tic tojlel, cha'añ mi' t'oxob hermañujob; pero yaño' bʌ mi' su'bob i T'añ Cristo cha'añ yom i melob chuqui uts'at.

¹⁶ Mach ti' pejtelelobic woliyob ti subt'añ ti isujm, cojach utsi yom i p'ojlesʌbeñoñob c wocol ila ti mʌjquibʌl,

¹⁷ pero yaño' bʌ mi' cha'leñob subt'añ yic'ot c'uxbiya, come yujilob cha'añ wa'chocobilon ti Dios cha'añ mic tsictesan isujmlel jiñi wen t'añ.

¹⁸ ¿Chuqui mi cʌl, che' jiñi? Mi woli' su'bob i T'añ Cristo cha'añ yom i bajñel chañ-esañob i bʌ, o mi woli' su'bob ti jump'ejl i pusic'al, tijicñayon cha'añ woli ti sujbel, chʌn tijicña mi caj cu'bin,

¹⁹ come cujil mi caj cʌjq'uel ti colel cha'añ la' woración yic'ot i ye'tel i yEspíritu Jesucristo,

²⁰ come che'ʌch com ja'el ti pejtelel c pusic'al, cha'añ ti wi'il ma'añic mi caj cʌjq'uel ti quisin mi ts'ita'ic; pero ti pejtelel c ch'ejlel che' bajche' ti yam bʌ ora, che' ja'el wʌle, mi caj i pʌstʌl i ñuclel Cristo tic tojlel, mi cuxulonto o mi mux c chʌmel,

²¹ come cuxul Cristo tic pusic'al, jiñʌch j cuxtʌlel, mi tsa' chʌmiyon ñumen tijicñayon ti' tojlel.

²² Pero mi añ to j c'ʌjñibal wʌ' ti pañimil ti' tojlel xñopt'añob, mach cujilic baqui bʌ yom mic yajcan.

²³ Come woli ti chʌn q'uextʌyel c pusic'al cha'añ cha'chajp woli c ña'tan, comix chʌmel cha'añ mi cajñel yic'ot Cristo, jiñʌch c'ax uts'at bʌ,

²⁴ pero yom to mic chʌn ajñel quic'otetla cha'añ mij cʌntesañetla.

²⁵ Che'ʌch woli c ña'tan, jiñi cha'añ cujil mu' to cajñel quic'otetla, cha'añ mi' p'ojlel la' wenlel yic'ot i tijicñʌyel la' pusic'al ti' ñopol Cristo,

²⁶ che' jiñi mi caj i p'ojlel i ñuclel la' pusic'al ti Cristo Jesús cha'añon che' mic cha' c'otel ba'añetla.

²⁷ Yom jach mi la' wajñel ti uts'at che' bajche' mi' cʌntesañonla i wen t'añ Cristo, che' jiñi mi tsa' j q'ueleyetla, o mi ma'añix tsa' j q'ueleyetla, mi caj cu'bin xuc'uletla ti jump'ejl la' pusic'al, che' temel mi la' cha'len wersa cha'añ mi' ñojpel jiñi wen t'añ,

²⁸ mach yomic mi la' wis bʌc'ñan la' contrajob, che' jiñi tsiquil ti' tojlelob mi caj i jisʌntelob, pero jatetla Dios mi caj i coltañetla.

²⁹ Come aq'uebiletla la' c'ʌjñibal ti Cristo, mach cojic jach cha'añ mi la' ñop, pero cha'añ ja'el mi la' wu'bin wocol cha'añ Cristo.

³⁰ Lajal woli yujtel wocol ti la' tojlel che' bajche' tic tojlel come woli c ñusan wocol che' bajche' tsa' la' wu'bi.