Filemón 1 - Jiñi Tsiji' bʌ Wen T'añ cha'añ Estudio

I yutslel i t'añ Pablo

¹ Pablojon xñujp'elon i cha'añ Jesucristo, wʌ'añon quic'ot la quermañu Timoteo, mic ts'ijbubeñet ili juñ Filemón, c'uxbibilet bʌ c pi'ʌl lojon ti e'tel,

² yic'ot ja'el c'uxbibil bʌ la quermana Apia, yic'ot Arquipo tem soldado quic'ot lojon, yic'ot jiñi xñopt'añob mu' bʌ i tempañob i bʌ ti a wotot:

³ La' aq'uentiquetla i yutslel yic'ot i ñʌch'tʌlel la' pusic'al ch'oyol bʌ ti Dios lac Tat yic'ot ti lac Yum Jesucristo.

I c'uxbiya yic'ot i xuc'tʌlel Filemón

⁴ Ti pejtelel ora mic su'ben c Dios wocolix i yʌlʌ che' mic ña'tañet ti oración,

⁵ come tsa'ix cu'bi añ a c'uxbiya yic'ot i xuc'tʌlel a pusic'al ti lac Yum Jesús yic'ot pejtelel i cha'año' bʌ Dios.

⁶ Mij c'ajtiben Dios, cha'añ la' i coltañet ti' su'bol jiñi woli bʌ lac ñop cha'añ mi' tajob i cuxtʌlel yaño' bʌ ja'el che' mi' cʌñob pejtelel chuqui wen am bʌ ti lac pusic'al cha'añ Cristo Jesús.

⁷ Hermano Filemón wen tijicñayon lojon, tsa' ñuq'uesʌnti lojon c pusic'al come wen awujil c'uxbiya, come cha'añ ti a caj tsa' ñuq'uesʌbeyob i pusic'al i cha'año' bʌ Dios.

Pablo tsi' colta Onésimo

⁸ Anquese añ c p'ʌtʌlel ti Cristo cha'añ mic su'beñet ti mandar che' bajche' yom ma' mel,

⁹ pero c'ux mi cu'biñet, jiñi cha'añ mij c'ajtibeñet ti wocol t'añ. Pablojon, ñoxoñix, xñujp'elon i cha'añ Jesucristo.

¹⁰ Mij c'ajtibeñet ti wocol t'añ, cha' pʌyʌ ochel Onésimo, calobil ti jiñi wen t'añ tsa' bʌ j cʌntesa ya' ti mʌjquibʌl.

¹¹ Ti yam bʌ ora ma'añic i c'ʌjñibal a cha'añ, pero wʌle añix i c'ʌjñibal cha'añet yic'ot cha'añon,

¹² jiñi cha'añ wolix c cha' chocbeñet tilel; pʌyʌ ochel che' jiñi, lajal che' bajche' joñon ma' pʌyon ochel yilal.

¹³ Tsa' c ña'ta uts'at mi' cʌytʌl quic'ot cha'añ mi' coltañon ti a wenta che' wʌ' ñup'ulon cha'añ jiñi wen t'añ.

¹⁴ Pero ma'añic chuqui com c mel jinto ma' su'beñon bajche' yom a pusic'al, come mach comic c xic'beñet cha'añ ma' coltañon.

¹⁵ Tic'ʌl mi tsi' poj cʌyʌyet Onésimo cha'añ ma' junyajlel pʌy ochel ti pejtelel ora;

¹⁶ mach che'ic jach bajche' a wiñic, pero che' bajche' juntiquil am bʌ i c'ʌjñibal, come c'uxbibil bʌ hermañujix ti Cristo. Mic wen c'uxbin, pero ñumen yom ma' c'uxbin jatet come a waj e'telʌch, yic'ot a wermañujix ti lac Yum ja'el.

¹⁷ Jiñi cha'añ, mi laj cʌñʌyʌch lac bʌ ti Cristo, ch'ʌmʌ ti a wenta che' bajche' joñon woli a ch'ʌmon ti a wenta.

¹⁸ Mi jiñi Onésimo añ chuqui tsi' mele ti a contra, mi añ i bet a wic'ot, ac'ʌ tic wenta.

¹⁹ Joñon, Pablo, woli c ts'ijban tij c'ʌb ili juñ, mi caj c tojben anquese wen awujil añ a bet quic'ot come tsa' ñopo Cristo tic tojlel.

²⁰ Hermano Filemón, pʌsbeñon i yutslel a pusic'al ti lac Yum; ñuq'uesʌbeñon c pusic'al ti Cristo.

²¹ Tsa' c ts'ijbubeyet ili juñ come cujil mi caj a jac'beñon, cujil ñumen mi caj a mel bajche' tsa' c su'beyet.

²² Yom ja'el ma' chajpʌbeñon cajñib ba' mic jijlel; come mi cʌl Dios mi caj i jac'beñetla la' woración cha'añ mic cha' tilel ba'añetla.

I yujtibal i t'añ Pablo

²³ Mi' yʌq'ueñet cortesía Epafras c pi'ʌl ti mʌjquel cha'añ Cristo Jesús.

²⁴ Che' ja'el Marcos yic'ot Aristarco yic'ot Demas yic'ot Lucas, c pi'ʌlob ti e'tel.

²⁵ La' ajñic ti la' pusic'al i yutslel i pusic'al lac Yum Jesucristo. Amén.