Efesios 6 - Jiñi Tsiji' bʌ Wen T'añ cha'añ Estudio

¹ Alobob, jac'benla i t'añ la' tat la' ña', come che'ʌch yom melol ti lac Yum.

² “Q'uele ti ñuc a tat a ña'”, —come jiñʌch ñaxan bʌ mandar cha'añ ma' taj jiñi albil bʌ i cha'añ Dios—,

³ cha'añ ma' taj a wenlel yic'ot cha'añ mi' ñajt añ a ja'bilel ti pañimil.

⁴ Che' ja'el tatʌlob, mach mi la' techben i mich'ajel la' walobilob, ju'sʌbenla i pusic'al che' woliyob ti colel yic'ot cʌntesanla ti lac Yum.

⁵ X'e'telob, jac'benla la' yumob ti pañimil ti bʌq'uen, yic'ot i pec'lel la' pusic'al, che' bajche' ti' tojlel Cristo;

⁶ mach cha'añic jach mi la' q'uejlel ti uts'at ti wiñicob pero yom mi la' wajñel che' bajche' x'e'telob i cha'añ Cristo, ti pejtelel la' pusic'al melela che' bajche' yom Dios.

⁷ Melbenla i ye'tel la' yum ti pañimil ti uts'at che' bajche' mi la' melben lac Yum, mach cha'añic jach mi' la' q'uejlel ti' wiñicob,

⁸ la' wujil, chuqui tac jach wen mi lac mel ti jujuntiquilonla, mi añ lac yum o mi ma'añic lac yum, mi caj lac ch'ʌm lac chobejtʌbal ch'oyol bʌ ti lac Yum.

⁹ Che' ja'el jatetla, i yumet bʌ la e'tel, yom mi la' wajñel ti uts'at ti' tojlel x'e'telob la' cha'añ, cʌyʌ la' bʌc'tesañob, yom mi la' ña'tan añ juntiquil Yumʌl ti panchan, jiñʌch la' Yum, jiñʌch i Yumob ja'el, come ti' tojlel Dios mach jelchojquic mi' q'uel wiñicob x'ixicob.

Lac mʌctʌjib mu' bʌ i yʌc' Dios

¹⁰ Che' ja'el, quermañujob, p'ʌt-esan la' bʌ ti lac Yum come ca'bʌl i p'ʌtʌlel mu' bʌ i yʌq'ueñetla.

¹¹ Xojola pejtelel la' mʌctijib mu' bʌ i yʌq'ueñetla Dios cha'añ mi la' wajñel ti xuc'ul ame i lotiñetla xi'ba.

¹² Come ma'añic woli laj contrajin wiñicob año' bʌ i bʌc'tal yic'ot i ch'ich'el, pero woli laj contrajin xi'bajob año' bʌ i ye'tel yic'ot i p'ʌtʌlel, woli bʌ i melob i yumʌntel ti ic'ch'ipan bʌ pañimil, yic'ot jontol bʌ espíritujob ti pañimil.

¹³ Jiñi cha'añ, ch'ʌmʌla pejtelel la' mʌctʌjib mu' bʌ i yʌq'ueñetla Dios cha'añ xuc'ul mi la' wajñel che' mi' tajetla wocol, che' bʌ tsa'ix ñumi la' cha'añ ti pejtelel, yom chʌn xuc'uletla.

¹⁴ Yom chajpʌbiletla yic'ot isujmlel i t'añ Dios, i wenta la' cajchiñʌc', lʌpʌla toj bʌ la' pusic'al i wenta la' bujc,

¹⁵ yic'ot yom chajpʌbil la' woc cha'añ mi la' majlel yic'ot jiñi wen t'añ mu' bʌ i yuts-esan lac pusic'al yic'ot Dios.

¹⁶ Che' ja'el, ch'ʌmʌla la' mʌctʌjib, jiñʌch i ñopol Dios, cha'añ mi la' mʌctʌben i jalʌjb xi'ba woli bʌ ti lejmel i ñi'.

¹⁷ C'ʌcʌla i mʌctʌjib la' jol, jiñʌch la' coltʌntel, chucula jiñi espada mu' bʌ i c'ʌn jiñi Espíritu jiñʌch i t'añ Dios.

¹⁸ Cha'lenla oración ti pejtelel ora ti jiñi Espíritu, yom mi la' chʌn c'ajtiben chuqui añ to yom la' cha'añ, yom yʌxʌl la' woj cha'añ mi la' chʌn taj ti oración pejtelel i cha'año' bʌ Dios

¹⁹ yic'ot cha'lenla oración cha'añon ja'el, cha'añ mi cʌq'uentel t'añ ba' ora mic cha'len t'añ, cha'añ ch'ejl mi cʌc' ti cʌjñel jiñi wen t'añ mach bʌ tsictiyemic ti yam bʌ ora,

²⁰ come chocbilon tilel cha'añ mic su'b i t'añ Dios, jiñi cha'añ cʌchʌlon ti cadena; c'ajtibenla Dios cha'añ ch'ejl mic su'b jiñi wen t'añ che' bajche' yom.

I YUJTIBAL: I YUTSLEL I T'AÑ PABLO ( 6.21-24 )

²¹ Jiñi la quermañu Tíquico, c'uxbibil bʌ hermano, xuc'ul bʌ x'e'tel i cha'añ lac Yum, jiñʌch mu' bʌ caj i laj su'beñetla che' bajche' añon yic'ot chuqui woli c mel,

²² jiñi cha'añ mic choc tilel ba'añetla cha'añ mi la' ña'tan bajche' añon lojon che' ja'el cha'añ mi' ñuq'uesʌbeñetla la' pusic'al.

²³ La' aq'uenticob la quermañujob i ñʌch'tʌlel i pusic'al, yic'ot c'uxbiya, yic'ot i xuc'tʌlel i pusic'al ch'oyol bʌ ti Dios lac Tat yic'ot ti lac Yum Jesucristo.

²⁴ La' aq'uenticob i yutslel i pusic'al pejtelel mu' bʌ i chʌn c'uxbiñob lac Yum Jesucristo. [Amén].