Efesios 5 - Jiñi Tsiji' bʌ Wen T'añ cha'añ Estudio

Cha'lenla xʌmbal che' bajche' jiñi año' bʌ ti' sʌclel pañimil

¹ Tsajcanla i melbal Dios, come c'uxbibil bʌ i yalobiletla.

² Ti pejtelel chuqui mi la' mel c'uxbin la' bʌ che' bajche' tsi' c'uxbiyonla Cristo, tsi' yʌc'ʌ i bʌ ti chʌmel cha'añonla che' bajche' tsʌnsʌbil bʌ i majtañ Dios, che' bajche' ofrenda xojocña bʌ i yujts'il.

³ Jiñi cha'añ, mach yomic mi la' cha'len ts'i'lel, mi chuqui tac bi'bi' ti' melol, mi i tsʌjyuntel chu'bʌañʌl, mach yomic mi' yujtel ti la' tojlel pejtelel iliyi, come i cha'añetla Dios;

⁴ che' ja'el mach yomic leco t'añ, mi sojquem bʌ t'añ, mi alas t'añ, pero c'ʌñʌla la' wej cha'añ mi la' su'ben wocolix i yʌlʌ Dios.

⁵ Come la' wujil ti isujm, ma'añic mi caj i yochel ti' yumʌntel Dios, mi juntiquilic xts'i'lel, mi jiñic am bʌ ti' bi'bi'lel, mi jiñic tsʌytsʌyña bʌ i pusic'al cha'añ chu'bʌañʌl, come ti' pejtelel iliyi lajalʌch che' bajche' i ch'ujutesʌntel dios te'.

⁶ Ma'añic majqui yom mi' lotiñetla yic'ot lolom jach bʌ t'añ, come jiñi cha'añ tal i mich'ajel Dios ti' contra xñusa mandarob.

⁷ Mach yomic mi la' xʌ' otsan la' bʌ yic'otob,

⁸ ti yam bʌ ora añetla ti ic'ch'ipan bʌ pañimil, pero wʌle añetla ti' sʌclel pañimil yic'ot lac Yum, i sʌcleletla pañimil yic'ot lac Yum; ajñenla che' bajche' jiñi año' bʌ ti' sʌclel pañimil.

⁹ [Come i yʌc'bal jiñi Espíritu] jiñʌch pejtelel chuqui tac uts'at yic'ot chuqui toj yic'ot pejtelel chuqui isujm.

¹⁰ Cha'lenla wersa la' mel jiñi mu' bʌ i mulan lac Yum.

¹¹ Mach yomic mi la' mel lolom jach bʌ la' melbal che' bajche' jiñi año' bʌ ti ic'ch'ipan bʌ pañimil, pero yom mi la' tsictesʌbeñob i mul,

¹² come quisintic jax ti' yʌlol chuqui tac mi' mucul melob.

¹³ Che' mi lac laj ac' ti' sʌclel pañimil, mi caj i tsictiyel mi wen o mi jontol, come jiñi i sʌclel mi laj ac' ti tsictiyel.

¹⁴ Jiñi cha'añ albilix: “Caña a wut woliyet bʌ ti wʌyel, ch'ojyen loq'uel ba'añ chʌmeño' bʌ, Cristo mi caj i yʌq'uet ti ajñel ti' sʌclel pañimil”.

¹⁵ Yom yʌxʌl la' woj, che' bajche' jiñi año' bʌ i pusic'al, tsajiletla ame muq'uic la' ñusan q'uiñ che' bajche' jiñi tontojo' bʌ.

¹⁶ C'ʌñʌla ti uts'at ti jujump'ejl q'uiñ, come ca'bʌl woli' p'ojlel jontolil ti ili ora.

¹⁷ Jiñi cha'añ, mach la' mel la' bʌ ti tonto, pero ña'tanla chuqui yom lac Yum.

¹⁸ Mach yomic mi la' yʌc-añ ti vino, come mi caj i yʌq'uetla ti wocol, pero yom but'uletla ti jiñi Espíritu,

¹⁹ pejcan la' bʌ ti salmo tac, ti himno tac, yic'ot c'ay tac i cha'añ Dios, c'ʌyinla lac Yum, su'bula i ñuclel ti la' pusic'al;

²⁰ chʌn su'benla wocolix i yʌlʌ Dios lac Tat ti' c'aba' lac Yum Jesucristo, cha'añ pejtelel chuqui jach mi' yujtel.

Otsan la' bʌ ti' wenta yaño' bʌ

²¹ Yom mi la' wotsan la' bʌ ti uts'at ti' wenta la' pi'ʌlob cha'añ woli la' bʌc'ñan Dios.

²² X'ixicob, otsan la' bʌ ti uts'at ti' wenta la' ñoxi'al che' bajche' mi la' mel ti' tojlel lac Yum,

²³ come jiñi wiñic i jolʌch jiñi x'ixic che' bajche' Cristo i jolʌch jiñi xñopt'añob, come i bʌc'talobʌch Cristo, che' ja'el Cristo jiñʌch i yaj Coltaya.

²⁴ Jiñi cha'añ, jiñi x'ixicob la' i yotsañob i bʌ ti' wenta i ñoxi'al ti pejtelel chuqui mi' melob che' bajche' xñopt'añob mi' yotsañob i bʌ ti' wenta Cristo.

²⁵ Wiñicob, c'uxbin la' wijñam che' bajche' Cristo tsi' c'uxbi i cha'año' bʌ, tsi' yʌc'ʌ i bʌ ti chʌmel cha'añob,

²⁶ cha'añ mi' yotsañob ti ch'ujul, che' bʌ tsa'ix i sʌc-esa ti ja' yic'ot ti' t'añ,

²⁷ cha'añ mi' i pʌs i cha'año' bʌ che' wen i t'ojol jax ti' tojlel, che' ma'añobic i pʌjq'uemal mi i sojwic'lel, mi yam bʌ i bi'bi'lel, cha'añ mi' yajñelob ti ch'ujul yic'ot che' ma'añobic i pʌjq'uemal.

²⁸ Che' ja'el jiñi wiñicob yom mi' c'uxbiñob i yijñam che' bajche' mi' bajñel c'uxbiñob i bʌc'tal. Jiñi mu' bʌ i c'uxbin i yijñam, woli' bajñel c'uxbin i bʌ,

²⁹ come ma'añic wiñic mu' bʌ i bajñel ts'a'len i bʌc'tal, pero mi' we'san, mi' cʌntan ti uts'at che' bajche' Cristo mi' cʌntan i cha'año' bʌ,

³⁰ come i bʌc'talonla Cristo, [chuculonla ti bʌc'tal yic'ot ti bʌquel.],

³¹ Jiñi cha'añ mi' cʌy i tat i ña' wiñic cha'añ mi' yajñel yic'ot i yijñam, jiñi cha'tiquil mi' yochelob ti juntiquil jach.

³² Jiñʌch ñuc bʌ isujmlel mach bʌ tsictiyemic ti yam bʌ ora; woli c su'beñetla ti lajiya cha'añ mi la' ña'tan bajche' mi' yajñel Cristo yic'ot xñopt'añob.

³³ Jiñi cha'añ ti jujuntiquiletla yom mi la' c'uxbin la' wijñam che' bajche' mi la' bajñel c'uxbin la' bʌ; che' ja'el jiñi x'ixic la' i p'is ti' wenta i ñoxi'al.