Efesios 2 - Jiñi Tsiji' bʌ Wen T'añ cha'añ Estudio

Coltʌbilonla ti' yutslel i pusic'al Cristo

¹ Dios tsi' yʌq'ueyetla la' cuxtʌlel che' chʌmeñetla ti la' jontolil yic'ot ti la' mul,

² come ti yam bʌ ora tsa' ajñiyetla ti jontolil che' bajche' mi' melob jiñi i cha'año' bʌ pañimil, tsa' la' jac'be Satanás i yum pañimil mu' bʌ i yuman xi'bajob, jiñʌch jiñi espíritu woli bʌ ti e'tel ti' pusic'al xñusa mandarob,

³ ti yam bʌ ora lajalʌch tsa' ajñiyonla che' bajche' yaño' bʌ, tsa' lac mele che' bajche' yom lac tsucul pusic'al yic'ot lac bʌc'tal yic'ot lac tsucul ña'tʌbal, jiñi cha'añ ochemonla ti' mich'ajel Dios lajal che' bajche' yaño' bʌ.

⁴ Pero Dios wen ca'bʌl tsi' p'untayonla, yic'ot wen ca'bʌl tsi' c'uxbiyonla,

⁵ tsi' tem aq'ueyonla laj cuxtʌlel la quic'ot Cristo che' chʌmeñonla ti mulil, (coltʌbiletla ti' yutslel jach i pusic'al Dios),

⁶ tsi' techeyonla ch'ojyel temel la quic'ot Cristo, tsi' buchchocoyonla ti panchan la quic'ot Cristo Jesús,

⁷ cha'añ mi' pʌs ti pejtelel ora bajche' tsi' p'untayonla ti oñ bʌ i yutslel i pusic'al, yic'ot i c'uxbiya tsa' bʌ i melbeyonla ti Cristo Jesús.

⁸ Come ti' yutslel jach i pusic'al Dios coltʌbiletla cha'añ tsa' la' ñopo; ma'añic tsa' la' bajñel colta la' bʌ, pero la' majtañ jach tilem bʌ ti Dios.

⁹ Mach cha'añic wen bʌ la' melbal, ame añic majqui mi' lon chañ-esan i bʌ.

¹⁰ I melbalonla Dios, tsi' cha' meleyonla ti Cristo Jesús cha'añ mi lac mel chuqui wen, wʌn ña'tʌbilix i cha'añ Dios chuqui mi caj lac mel.

Tsa' uts-esʌntiyonla ya' ti' cruz Cristo

¹¹ Ña'tanla bajche' añetla ti yam bʌ ora gentilet bʌ la, ts'a'lebiletla cha'añ mach tsepbilic la' pʌchʌlel, jiñi tsepbilo' bʌ i pʌchʌlel tsi' bajñel su'buyob i bʌ ti ñuc cha'añ tsepbil i pʌchʌlel ti' c'ʌb wiñicob.

¹² Ti yam bʌ ora ma'añic Cristo la' wic'ot, mach la' pi'ʌlobic jiñi israelob, mach la' cha'añic jiñi xuc'ul bʌ t'añ albil bʌ i cha'añ Dios, ma'añic la' pijtaya, ma'añic la' Dios wʌ' ti pañimil.

¹³ Pero wʌle añetla ti Cristo Jesús, jatetla ñajt bʌ añetla ti yam bʌ ora, tsa'ix pʌjyiyetla ti lʌc'ʌl cha'añ ti' ch'ich'el Cristo.

¹⁴ Cristo tsi' yʌc'ʌyonla ti ajñel ti ñʌch'ʌl che' bʌ tsi' mele ti junmojt jiñi cha'mojt tejclum, tsi' jeme ju'bel jiñi tsalʌl tsa' bʌ i t'oxoyonla,

¹⁵ che' bʌ tsi' yʌc'ʌ i bʌ ti chʌmel, tsi' jisa jiñi mandar yic'ot tic'oñel tsa' bʌ i t'oxoyonla, i bajñel jach tsi' mele jump'ejl tsiji' bʌ tejclum pʌybil bʌ loq'uel ti cha'mojt, cha'añ ñʌch'ʌl mi la cajñel la quic'ot,

¹⁶ ya' ti cruz, Cristo tsi' yuts-esʌbeyonla lac pusic'al yic'ot Dios, tsi' mele jiñi cha'mojt wiñicob ti junmojt jach, che'ʌch tsi' jisʌbeyonla lac ts'a'leya.

¹⁷ Tsa' tili i su'beñob jiñi ñajt bʌ añob yic'ot jiñi lʌc'ʌl bʌ añob cha'añ ñʌch'ʌl mi yajñelob,

¹⁸ come cha'añ ti ye'tel Jesucristo, jiñi judíojob yic'ot jiñi mach bʌ judíojobic mi mejlel lac lʌc'tesan lac bʌ ba'añ lac Tat ti juntiquil jach bʌ Espíritu.

¹⁹ Jiñi cha'añ mach chʌn yambʌyix mij q'ueletla, añix la' wajñib quic'ot lojon, ochemetixla yic'ot i cha'año' bʌ Dios, lac pi'ʌlix lac bʌ ti Dios.

²⁰ Pejtelel xñopt'añob wa'chocobilob che' bajche' jump'ejl jach bʌ otot, woli bʌ i jac'beñob i cʌntesa jiñi apóstolob yic'ot x'alt'añob, Jesucristo jiñʌch jiñi Ñuc bʌ Xajlel ti' xujc ili otot,

²¹ wen xojñibil jiñi otot ti Cristo Jesús, woli ti chañ-an majlel jinto mi' yujtel ti melol jiñi ch'ujul bʌ Templo i cha'añ lac Yum;

²² ti lac Yum wa'chocobiletla ja'el ti jump'ejl chumlibʌl ba' mi' chumtʌl Dios ti Espíritu.