Efesios 1 - Jiñi Tsiji' bʌ Wen T'añ cha'añ Estudio

I TEJCHIBAL: I YUTSLEL I T'AÑ PABLO ( 1.1-2 )

¹ Pablojon, apóstolon i cha'añ Jesucristo cha'añ che' yom i pusic'al Dios, mi cʌq'ueñetla cortesía i cha'añet bʌ la Dios ya' ti Éfeso mu' bʌ la' ñop Cristo Jesús:

² La' aq'uentiquetla i yutslel yic'ot i ñʌch'tʌlel la' pusic'al ch'oyol bʌ ti Dios lac Tat yic'ot ti lac Yum Jesucristo.

1. I YE'TEL DIOS CHA'AÑ LAJ COLTɅNTEL ( 1.3—3.21 ) Lac wenlel tilem bʌ ti Cristo

³ La' sujbic i ñuclel Dios, i Tat lac Yum Jesucristo, tsa' bʌ i yʌq'ueyonla lac majtañ yic'ot pejtelel chuqui uts'at ti Cristo,

⁴ Dios tsi' yajcayonla ti Cristo che' bʌ maxto melbilic pañimil cha'añ mi la cajñel ti ch'ujul yic'ot che' ma'añic lac pʌjq'uemal ti' tojlel.

⁵ Ti' c'uxbiya Dios tsi' wʌn ña'ta i yotsañonla ti yalobil ti' tojlel Jesucristo, cha'añ ti' caj che'ʌch yom i bajñel pusic'al,

⁶ cha'añ mi lac su'b i ñuclel Dios cha'añ i yutslel i pusic'al tsa' bʌ i yʌq'ueyonla ti lac majtañ ti' tojlel c'uxbibil bʌ i Yalobil.

⁷ Tsi' mʌñʌyonla ti' ch'ich'el Cristo, tsi' ñusʌbeyonla lac mul come oñ i yutslel i pusic'al,

⁸ mach p'isbilic tsi' yʌq'ueyonla i yutslel cha'añ ti ca'bʌl i ña'tʌbal.

⁹ Dios tsi' yʌq'ueyonla laj cʌñ chuqui wʌn ña'tʌbil i cha'añ mach bʌ tsictiyemic ti yam bʌ ora tsa' bʌ i bajñel ña'ta i yujtesan ti Cristo,

¹⁰ che' mi' c'otel i yorajlel, Dios mi caj i ts'ʌctesan che' bajche' wʌn ña'tʌbil i cha'añ, mi caj i tempan pejtelel chuqui tac añ ti panchan yic'ot ti pañimil, mi caj i yʌq'ueñ ti' wenta Cristo cha'añ mi' cha'len yumʌntel ti' tojlel.

¹¹ Tsi' yajcayonla ti Cristo che' bajche' tsi' wʌn ña'ta i mel, cha'añ mi yʌq'ueñonla pejtelel tsa' bʌ i wʌn alʌ come Dios mi' mel che' bajche' yom i pusic'al,

¹² cha'añ mi lac tsictesan i ñuclel, joñonla tsa'ix bʌ lac ñaxan taja lac pijtaya ti Cristo.

¹³ Jatetla ja'el tsa' la' wu'bi jiñi isujm bʌ t'añ, cha'añ la' coltʌntel che' bʌ tsa' la' ñopo Cristo, tsa' otsʌbentiyetla jiñi Ch'ujul bʌ Espíritu, jiñʌch la' sellojlel che' bajche' wʌn albil.

¹⁴ Aq'uebilonla jiñi Espíritu cha'añ mi lac ña'tan ts'ʌcʌl mi caj lac ch'ʌm pejtelel chuqui wʌn albil i cha'añ Dios, mi caj i yʌc' ti libre i cha'año' bʌ cha'añ mi lac tsictesan i ñuclel Dios.

Lac ña'tʌbal ti jiñi espíritu yic'ot i tsictiyemlel

¹⁵ Cha'añ ti' caj iliyi, joñon ja'el, che' bʌ tsa' cu'bi tsa'ix la' ñopo lac Yum Jesús, yic'ot bajche' c'ux mi la' wu'bin pejtelel i cha'año' bʌ Dios,

¹⁶ ma'añic mij cʌy c su'ben Dios wocolix i yʌlʌ cha'añetla, mic chʌn ña'tañetla che' mic mel oración,

¹⁷ mij c'ajtiben i Dios lac Yum Jesucristo cha'añ mi' yʌq'ueñetla ca'bʌl la' ña'tʌbal yic'ot i yEspíritu cha'añ mi la' wen ch'ʌmben isujm chuqui woli la' pʌsbentel, cha'añ mi la' wen cʌn lac Tat am bʌ ti panchan,

¹⁸ la' i yʌq'ueñet la' ch'ʌmben isujm chuqui woli la' pijtan, come jiñi cha'añ tsi' pʌyʌyetla cha'añ mi la' cʌn jiñi uts'at tac bʌ mu' bʌ caj i yʌq'ueñ i cha'año' bʌ,

¹⁹ come mach p'isbilic jiñi ñuc bʌ i p'ʌtʌlel Dios woli bʌ i mel i ye'tel ti lac pusic'al joñonla mu' bʌ lac ñop, tsi' c'ʌñʌ ti lac tojlel jiñi jach bʌ i p'ʌtʌlel,

²⁰ tsa' bʌ i c'ʌñʌ i tech ch'ojyel Cristo ba'añ chʌmeño' bʌ, che' bʌ tsi' buchchoco ti' ñoj ya' ti panchan.

²¹ Ñumen ñuc Cristo bajche' pejtelel i yumʌntel tac pañimil yic'ot jiñi ñuco' bʌ i ye'tel año' bʌ i p'ʌtʌlel yic'ot i yumʌntel, ñumen ñuc i ye'tel bajche' pejtelel wa'chocobilo' bʌ, mach cojic jach ti ili ora pero che'ʌch ja'el ti jiñi tal to bʌ ora.

²² Dios tsi' yʌq'ue ti' wenta Cristo pejtelel chuqui tac añ, che' ja'el tsi' yotsa Cristo ti' Jol pejtelel xñopt'añob cha'añ mi lac jac'ben ti pejtelel chuqui yom.

²³ I bʌc'talonla Cristo, mi' yajñel ti joñonla mu' bʌ lac ñop, ti pejtelel chuqui tac añ mi' taj i c'ʌjñibal ti lac Yum.