Colosenses 3 - Jiñi Tsiji' bʌ Wen T'añ cha'añ Estudio

¹ Mi tsa'ix cha' tejchiyetla ch'ojyel la' wic'ot Cristo, sajcanla chuqui añ ti chañ ba' buchul Cristo ti' ñoj Dios.

² Chʌn ña'tanla chuqui añ ti chañ, mach jiñic am bʌ ti pañimil.

³ Come tsa' chʌmiyetla yic'ot Cristo. Cʌntʌbil la' cuxtʌlel yic'ot Cristo ti Dios.

⁴ Che' mi' tsictiyel Cristo jatetla ja'el mi caj la' tsictiyel la' wic'ot ti' ñuclel come la' cuxtʌlelʌch Cristo.

Ñaxan bʌ laj cuxtʌlel yic'ot jiñi tsiji' bʌ

⁵ Jiñi cha'añ junyajlel jisanla pejtelel i cha'añ bʌ pañimil am bʌ ti la' pusic'al: Jiñʌch la' ts'i'lel, la' bi'bi'lel, la' jontolil, i colosojlel la' pusic'al, yic'ot i ts'i'lel la' wut, come lajalʌch i ts'i'lel lac wut bajche' i ch'ujutesʌntel dios te';

⁶ jiñi cha'añ tal i mich'ajel Dios ti' tojlel jiñi mu' bʌ i ñusañob mandar,

⁷ ti yam bʌ ora jatetla ja'el tsa' la' ñusʌbe i t'añ Dios che' bʌ tsa' ajñiyetla ti mulil.

⁸ Pero wʌle cʌyʌla pejtelel iliyi: Mich'ajel, a'leya, u'yaj t'añ, jop' t'añ, yic'ot bi'bi' t'añ mu' bʌ i loq'uel ti la' wej.

⁹ Mach mi la' lotin la' pi'ʌlob, come tsa'ix la' loc'sa jiñi tsucul bʌ la' pusic'al yic'ot i melbal,

¹⁰ tsa'ix la' xojo jiñi tsiji' bʌ la' pusic'al tsa' bʌ i mele Dios cha'añ mi la' q'uextʌyel majlel ti' yejtal Dios yic'ot tsiji' bʌ la' ña'tʌbal,

¹¹ ti Cristo mach jelchojquic mi' q'uejlelob wiñicob x'ixicob mi griego, mi judío, mi tsepbil i pʌchʌlel, mi mach tsepbilic i pʌchʌlel, mi ñajt ch'oyolob, mi mach yujilic juñ, mi añ ti' yum, o mi ma'añic i yum, pero Cristo i Yumʌch pejtelel wiñicob yic'ot pejtelel chuqui tac añ.

¹² C'uxbibilet bʌ la i cha'añ Dios, xojola sʌc bʌ la' pislel come yajcʌbiletla, ch'ujuletla, jiñi cha'añ lʌpʌla tsiji' bʌ la' pusic'al yujil bʌ p'untaya yic'ot c'uxbiya, q'uele la' bʌ ti pec', yom uts la' pusic'al, cuchula wocol.

¹³ Cuchben la' bʌ la' sajtemal, ñusʌben la' bʌ la' mul mi añ la' contrajintel. Che' bajche' tsi' ñusʌbeyetla la' mul Cristo, che'ʌch yom mi la' mel jatetla.

¹⁴ Jiñi ñumen yom bʌ jiñʌch c'uxbiya, come mi' yʌq'uetla ti tem ajñel ti jump'ejl la' pusic'al.

¹⁵ La' tsictiyic i ñʌch'tʌlel la' pusic'al ch'oyol bʌ ti Dios, jiñi cha'añ, tsa' tem pʌjyiyetla ti jump'ejl la' bʌc'tal; su'benla Dios wocolix i yʌlʌ.

¹⁶ Wen ñopola i t'añ Cristo cha'añ mi' yʌc' i wut ti la' pusic'al, cʌntesan la' bʌ, toj-esan la' bʌ yic'ot wen bʌ la' ña'tʌbal. C'ʌyinla lac Yum ti salmo tac, yic'ot himno tac, yic'ot c'ay ti' yutslel la' pusic'al. Su'benla wocolix i yʌlʌ Dios.

¹⁷ Ti pejtelel chuqui mi la' mel, mi t'añ, mi e'tel, melela ti' c'aba' lac Yum Jesús, su'benla wocolix i yʌlʌ Dios lac Tat ti Jesús.

Che' bajche' yom mi yajñelob ti tsiji' bʌ i cuxtʌlel

¹⁸ X'ixicob, otsan la' bʌ ti uts'at ti' wenta la' ñoxi'al, come che'ʌch yom lac Yum.

¹⁹ Wiñicob, c'uxbin la' wijñam, mach tsʌtsic yom mi la' pejcan.

²⁰ Alobob, jac'benla la' tat la' ña' ti pejtelel chuqui mi' su'beñetla, come che'ʌch mi' mulan lac Yum.

²¹ Tatʌlob, mach mi la' lon techben i mich'ajel la' walobilob ame lijicña mi' melob i bʌ.

²² X'e'telob, jac'benla la' yum ti pañimil ti pejtelel chuqui mi' su'beñetla, mach cha'añic uts'at mi' q'ueletla wiñicob pero ti jump'ejl la' pusic'al cha'añ woli la' c'uxbin Dios.

²³ Pejtelel chuqui jach mi la' mel, cha'lenla ti jump'ejl la' pusic'al ti' tojlel lac Yum che' bajche' i ye'tel lac Yum, mach che'ic bajche' i ye'tel wiñicob;

²⁴ come ña'tʌbil la' cha'añ, lac Yum mi caj i yʌq'ueñetla la' chobejtʌbal ti panchan, come woli la' melben i ye'tel Cristo lac Yum.

²⁵ Jiñi mu' bʌ i cha'len jontolil, mux i ch'ʌm i tojol cha'añ i jontolil, ti jujuntiquil mi caj i yʌq'uentel che' bajche' añ i melbal.