Colosenses 2 - Jiñi Tsiji' bʌ Wen T'añ cha'añ Estudio

¹ Com mi la' ña'tan bajche' woli c cha'len wersa e'tel cha'añetla yic'ot año' bʌ ti Laodicea, yic'ot pejtelel jiñi maxto bʌ añic tsi' q'ueleyob c wut;

² mic cha'len wersa cha'añ mi' cha' ñuq'uesʌntel la' pusic'al yic'ot cha'añ mi la' c'uxbin la' bʌ ti jump'ejl la' pusic'al, com mi la' laj ch'ʌmben isujm pejtelel jiñi c'ax ñuc tac bʌ isujmlel maxto bʌ tsictiyemic ti yam bʌ ora, cha'añ mi la' cʌn isujmlel Dios lac Tat yic'ot Cristo,

³ ba mucul tac pejtelel jiñi c'ax ñuc bʌ yic'ot uts'at bʌ ña'tʌbalʌl.

⁴ Woli c wʌn su'beñetla, ame añic majqui yom i lotiñetla ti mayajax bʌ i t'añ.

⁵ Isujm mach ya'ic añon quic'otetla pero tic pusic'al woli c ña'tañetla che' bajche' mi ya'añon la' wic'ot, tijicñayon che' mi cu'bin cha'añ woli la' wajñel ti jump'ejl la' pusic'al, che' xuc'ul woli la' ñop Cristo.

3. TSIJI' BɅ LAJ CUXTɅLEL TI CRISTO ( 2.6—4.6 )

⁶ Jiñi cha'añ, che' bajche' tsa' la' ñopo lac Yum Jesucristo, che'ʌch yom mi la' chʌn ajñel ti' tojlel,

⁷ yom añ la' wi' ti Cristo, yom wen wa'chocobiletla ti' tojlel yic'ot yom chʌn xuc'uletla ti jiñi tsa' bʌ la' ñopo, che' bajche' tsa' cʌntesʌntiyetla. Chʌn su'benla Dios wocolix i yʌlʌ.

I ñuclel Cristo ti laj cuxtʌlel

⁸ Chʌcʌ q'uele la' bʌ ame añic majqui mi' soquetla yic'ot i ña'tʌbal ch'oyol bʌ ti pañimil yic'ot i sajtemal loq'uem bʌ ti' bajñel pusic'al, che' bajche' i tilel i melbal lac ñojte'el woli bʌ i ñojpel ti pañimil, mach bʌ cʌntesʌbilobic ti Cristo.

⁹ Ti' bʌc'tal Cristo mi' yajñel pejtelel i bujt'emal Dios,

¹⁰ yic'ot jatetla bujt'emetla ti Cristo, jiñʌch i Yum pejtelel yumʌlob año' bʌ i ye'tel yic'ot i p'ʌtʌlel.

¹¹ Ti Cristo ja'el tsa' tsejpi la' pʌchʌlel yilal che' bʌ tsa' la' choco i tsuculel la' pusic'al am bʌ ti la' bʌc'tal, jiñʌch mero tsep pʌchʌlel, mach bʌ melbilic ti c'ʌbʌl, i ye'telʌch Cristo.

¹² Tsa' tem mujquiyetla la' wic'ot Jesús ti ch'ʌmja', che' ja'el tsa' tejchiyetla ch'ojyel la' wic'ot Jesús cha'añ tsa' la' ñopo i p'ʌtʌlel Dios tsa' bʌ i teche ch'ojyel Jesús ba'añ chʌmeño' bʌ.

¹³ Ti yam bʌ ora che' chʌmeñetla ti mulil, che' mach tsepbilic la' pʌchʌlel, Dios tsi' yʌq'ueyetla la' cuxtʌlel yic'ot Cristo, tsi' ñusʌbeyetla pejtelel la' mul,

¹⁴ Cristo tsi' jisʌbe i p'ʌtʌlel jiñi mandar am bʌ ti laj contra, tsi' yʌpʌ jiñi juñ ba' ts'ijbubil jiñi mandar mu' bʌ i tsictesan lac mul, tsi' ch'iji ti cruz,

¹⁵ tsi' jisʌbe i p'ʌtʌlel yic'ot i ñuclel xi'bajob, tsi' quisñitesayob ti' wut pejtelelob, che' bʌ tsa' mʌjli i cha'añ Cristo ya' ti cruz.

¹⁶ Jiñi cha'añ, mach yomix mi la' lon q'uejlel ti xmulil cha'añ jach chuqui tac mi la' c'ux, mi cha'añ chuqui tac mi la' jap, mi cha'añ q'uiñijel tac, mi che' woli ti pasel uw, mi che' ti' yorajlel c'aj-o.

¹⁷ Pejtelel jiñi, i yejtalʌch jiñi mu' to bʌ i tilel; pero jiñi mero isujm bʌ mi lac taj ti Cristo.

¹⁸ Jiñi mu' bʌ caj la' wʌq'uentel mach yomic mi la' wʌc' ti chijlel ti' tojlel jiñi mu' bʌ i lon pʌsob i bʌ ti pec', mu' bʌ i ch'ujutesañob ángelob, mi' lon alob añ chuqui tsi' q'ueleyob ti espíritu, mi' lon chañ-esañob i bʌ cha'añ i bajñel ña'tʌbal,

¹⁹ pero ma'añic mi' yumañob Cristo, mach chuculobic ti' bʌc'tal Cristo ba' mi' tajob i p'ʌtʌlel i cha'año' bʌ Cristo, pejtelel i bʌc'tal Cristo tsuyulʌch ti' p'aquel tac yic'ot ti' chijil tac, mi' taj i colel ti' p'ʌtʌlel Dios.

²⁰ Mi tsa'ix chʌmiyetla la' wic'ot Cristo yomix mi la' cʌy la' jac'ben i cʌntesa pañimil, ¿chucoch woli la' wotsan la' bʌ ti' wenta jiñi mandar tac che' bajche' i cha'año' bʌ pañimil?

²¹ Mu' bʌ i yʌlob: “Mach la' chuc jiñi”, “mach la' c'ux jiñi”, “mach la' tʌl yam bʌ”,

²² che' bajche' i tilel mi' cha'leñob cʌntesa yic'ot tic'oñel i cha'año' bʌ pañimil, pejtelel chuqui tac tic'bil mi' jilel i c'ʌjñibal.

²³ Isujm, lon añob i ña'tʌbal yilal jiñi mu' bʌ i jac'beñob i mandar che' mi' cha'leñob ch'ujutesaya bajche' jach yomob, che' mi' lon melob i bʌ ti pec', che' mi' yʌlol ac'ob i bʌc'tal ti wocol; pero ma'añic i c'ʌjñibal cha'añ mi' tic'ob i tsucul pusic'al.