Colosenses 1 - Jiñi Tsiji' bʌ Wen T'añ cha'añ Estudio

I TEJCHIBAL ( 1.1-8 ) I yutslel i t'añ Pablo

¹ Pablojon, apóstolon i cha'añ Jesucristo cha'añ che'ʌch yom Dios, quic'ot la quermañu Timoteo,

² woli c ts'ijbubeñetla ili juñ i cha'añet bʌ la Dios, xuc'ul bʌ hermañujob ti Cristo añet bʌ la ti Colosas: La' aq'uentiquetla i yutslel yic'ot i ñʌch'tʌlel la' pusic'al ch'oyol bʌ ti Dios lac Tat yic'ot ti lac Yum Jesucristo.

Pablo mi' c'ajtiben Dios i ña'tʌbal

³ Ti pejtelel ora mic su'ben lojon wocolix i yʌlʌ Dios i Tat lac Yum Jesucristo che' mic cha'len lojon oración,

⁴ come tsa' cu'bi lojon ñopol la' cha'añ Cristo Jesús, mi la' c'uxbin pejtelel i cha'año' bʌ Dios,

⁵ come woli la' pijtan chuqui tac lotbebiletla ya' ti panchan, che' bajche' tsa' la' wu'bi ti isujm jiñi wen t'añ,

⁶ tsa' bʌ c'oti ti la' tojlel yic'ot ti pejtelel pañimil, woli' chʌn pujquel ti la' tojlel, woli' chʌn ac' i wut che' bajche' ti jiñi q'uiñ che' bʌ tsa' caji la' wu'bin che' bʌ tsa' la' ch'ʌmbe isujmlel i yutslel i pusic'al Dios.

⁷ Tsi' cʌntesayetla Epafras, jiñi c'uxbibil bʌ c pi'ʌl lojon ti e'tel, jiñi xuc'ul bʌ i yaj e'tel Cristo ti la' tojlel,

⁸ Epafras tsi' su'beyon lojon añ ca'bʌl la' c'uxbiya ti jiñi Espíritu.

1. I YE'TEL DIOS TI XCOLTAYA ( 1.9-23 )

⁹ Jiñi cha'añ joñon lojon ja'el, che' bʌ tsa' cu'bi lojon c'ʌlʌl wʌle, ma'añic mij cʌy c melbeñet lojon oración, mij c'ajtiben lojon Dios cha'añ mi' bujt'esañetla ti wen bʌ la' ña'tʌbal ch'oyol bʌ ti Espíritu cha'añ mi la' ch'ʌmben isujm ti pejtelel la' pusic'al chuqui yom Dios,

¹⁰ cha'añ che' jiñi mi mejlel la' wajñel bajche' yom lac Yum, cha'añ tijicña mi' q'ueletla. Che' jiñi mi caj la' wʌc' la' wut ti wen bʌ la' melbal, mi caj i p'ojlel la' ña'tʌbal ti Dios cha'añ mi la' wen cʌñ.

¹¹ P'ʌt-esʌbiletla ti pejtelel i p'ʌtʌlel, che' bajche' añ i p'ʌtʌlel yic'ot i ñuclel, che'ʌch mi la' taj la p'ʌtʌlel ti' cuchol pejtelel wocol ti' xuc'tʌlel la' pusic'al,

¹² ti' tijicñʌyel la' pusic'al su'benla wocolix i yʌlʌ lac Tat, come tsi' cha' meleyonla ti uts'at cha'añ mi lac taj lac wenlel yic'ot i cha'año' bʌ Dios woli bʌ i yajñelob ti' sʌclel pañimil;

¹³ Dios tsi' loc'sayonla ti' yumʌntel ic'ch'ipan bʌ pañimil, tsi' yotsayonla ti' yumʌntel jiñi c'uxbibil bʌ i Yalobil,

¹⁴ tsa' bʌ i yʌc'ʌyonla ti colel che' bʌ tsi' ñusʌbeyonla lac mul [ti' ch'ich'el].

Tsa' uts-a la quic'ot Dios che' bʌ tsa' chʌmi Cristo

¹⁵ Cristo i yejtalʌch Dios mach bʌ mejlic laj q'uel, jiñʌch jiñi am bʌ ti ñaxan ti pejtelel i melbal Dios.

¹⁶ Ti Jesús melbil pejtelel chuqui tac añ ti panchan yic'ot ti pañimil, jiñi tsiquil tac bʌ yic'ot jiñi mach bʌ tsiquil taquic, mi reyob, mi yumʌlob, mi gobierno, mi i p'ʌtʌlel año' bʌ i ye'tel; laj melbilʌch ti Jesús, tsa' otsʌbenti ti' wenta, cha'añ mi' q'uejlel ti ñuc lac Yum.

¹⁷ Añʌch Jesús che' maxto añic chuqui añ, ti' p'ʌtʌlel Jesús xuc'ul mi' yajñel ti pejtelel;

¹⁸ Jesús i Yumʌch pejtelel xñopt'añob, jiñʌch lac jol, joñonla i bʌc'talonla. Jiñʌch ñaxan bʌ tsa' ch'ojyi ba'añ chʌmeño' bʌ cha'añ mi' bajñel q'uejlel ti ñuc ti' tojlel pejtelel chuqui tac añ;

¹⁹ Come Dios yom cha'añ mi' yajñel pejtelel ti' p'ʌtʌlel i Yalobil,

²⁰ cha'añ ti' caj i ye'tel Cristo, Dios tsi' yuts-esa pejtelel chuqui tac añ ti pañimil yic'ot ti panchan, Cristo tsi' ñʌch'choco pejtelel mu' bʌ i contrajin Dios che' bʌ tsa' bejq'ui i ch'ich'el ya' ti cruz.

²¹ Ti yam bʌ ora ñajt añetla ti Dios, tsa' la' contraji Dios ti la' pusic'al yic'ot ti jontol bʌ la' melbal,

²² pero Dios tsi' yʌc'ʌ ti chʌmel i Yalobil, che' jiñi tsi' cha' uts-esayetla, cha'añ ch'ujul mi' pʌyetla ochel ti' tojlel, sʌc-esʌbiletla ti pejtelel la' bi'bi'lel yic'ot la' mul;

²³ pero yom chʌn xuc'uletla ti isujm, mi p'ʌtʌletla ti jiñi mu' bʌ la' ñop, mach mi la' cʌy la' pijtaya tsa' bʌ la' wu'bi ti jiñi t'añ woli bʌ i sujbel ti pejtelel pañimil ti' ye'bal panchan; joñon, Pablo, aq'uebilon que'tel cha'añ jiñi wen t'añ.

2. I YE'TEL PABLO ( 1.24—2.5 )

²⁴ Tijicñayoñix wʌle cha'añ woli c ñusan wocol cha'añetla, woli c ts'ʌctesan i wocol Cristo añ to bʌ yom ti' tojlel jiñi xñopt'añob mu' bʌ i tempañob i bʌ, jiñobʌch i bʌc'tal Cristo.

²⁵ Ya'i tsa' ochiyon ti x'e'tel i cha'añ jiñi xñopt'añob che' bajche' tsi' ña'ta Dios, tsi' yʌq'ueyon que'tel ti la' tojlel cha'añ ts'ʌcʌl mij cʌntesañetla ti' t'añ Dios,

²⁶ jiñi e'tel mach bʌ tsictiyemic ti yam bʌ ora, pero wʌle tsa'ix tsictesʌbentiyob i cha'año' bʌ Dios,

²⁷ Dios tsi' ña'ta i yʌc' ti cʌjñel ti' tojlel pejtelel wiñicob x'ixicob jiñi c'ax ñuc bʌ isujmlel mach bʌ tsictiyemic ti yam bʌ ora; jiñi ñuc bʌ ti cʌñol jiñʌch Cristo woli bʌ i yajñel ti la' pusic'al, jiñʌch mu' bʌ i yʌq'ueñetla la' pijtan la' ñuclel.

²⁸ Joñon lojon mic su'b lojon majlel Cristo, mic xic'ben lojon pejtelel wiñicob, mic cha'len lojon cʌntesa ti pejtelel c ña'tʌbal lojon cha'añ pejtelel wiñicob mi' sojlel majlel ti Cristo Jesús.

²⁹ Jiñi cha'añ wersa mic cha'len e'tel, pejtelel c p'ʌtʌlel tilem ti Cristo, woli bʌ ti e'tel tic tojlel.