Apocalipsis 9 - Jiñi Tsiji' bʌ Wen T'añ cha'añ Estudio

¹ Jiñi i jo'ticlel ángel tsi' wusu i trompeta, tsa' j q'uele jump'ejl ec' tsa' bʌ yajli ti panchan c'ʌlʌl ti pañimil. Tsa' aq'uenti i llavejlel jiñi ch'eñ mach bʌ añix mi' tajbentel i ye'bal.

² Tsi' jambe i ti' jiñi tam bʌ ch'eñ, tsa' loq'ui buts' ti ch'eñ lajal bajche' i buts'il colem c'ajc, tsa' ic'a jiñi q'uiñ yic'ot pañimil cha'añ jiñi buts' woli bʌ i loq'uel ti ch'eñ.

³ Tsa' loq'ui ca'bʌl sajc' ya' ti buts', tsa' pam pujqui ti pañimil, tsa' aq'uenti i p'ʌtʌlel che' bajche' i p'ʌtʌlel siñan.

⁴ Tsa' su'benti sajc' cha'añ ma'añic mi' c'ux jam mi pimel mi te', cojach mi' c'uxob jiñi wiñicob mach bʌ añobic i sellojlel Dios ti' pam.

⁵ Ma'añic tsa' aq'uenti i p'ʌtʌlel cha'añ mi' tsʌnsan wiñicob come tic'bilob. Pero tsa' aq'uenti i p'ʌtʌlel cha'añ mi' tic'lañob jo'p'ejl uw cha'añ mi' yʌq'ueñob wocol che' bajche' i c'uxel i yej siñan che' mi' c'ux wiñic.

⁶ Ti jim bʌ ora wiñicob mi caj i lon sʌclañob bajche' mi mejlel i chʌmelob, ma'añic mi caj i tajob, anquese yomob chʌmel, mach mejlicob.

⁷ Che' yilal ili sajc' bajche' caballo chajpʌbil bʌ cha'añ guerra, añ i corona tac ti' jol melbil bʌ ti oro. Che'ʌch i wut bajche' i wut wiñicob.

⁸ Lajal i tsutsel i jol bajche' i tsutsel i jol x'ixic, lajal i bʌquel i yej bajche' i bʌquel i yej colem bajlum.

⁹ Añ i sujl wechel ti' tajñ lajal bajche' tsucu taq'uiñ, lajal tsi' cha'le t'añ i wich' bajche' ca'bʌl carreta mu' bʌ i tujc'an majlel caballo che' mi' cha'len ajñel ti guerra.

¹⁰ C'ux i ñej che' bajche' i ñej siñan, añ i p'ʌtʌlel ti' ñej cha'añ mi' tic'lan wiñicob jo'p'ejl uw.

¹¹ Añ i rey jiñi sajc', jiñʌch i yángel jiñi ch'eñ mach bʌ añix mi' tajbentel i ye'bal, i c'aba'ʌch Abadón ti' t'añ hebreo, jiñʌch Apolión ti' t'añ griego.

¹² Tsa'ix ñumi jiñi ñaxan bʌ wocol, awilan, tal to yam bʌ cha'yajl wocol.

¹³ I wʌcticlel ángel tsi' wusu i trompeta. Tsa' cu'bibe i t'añ loq'uem bʌ ti chʌnts'ijt xulub am bʌ ti jiñi pulʌntib melbil bʌ ti oro ya' ti' tojel Dios.

¹⁴ I wʌcticlel ángel, jiñi chucul bʌ i cha'añ trompeta tsa' su'benti: ¡Jiti jiñi chʌntiquil ángelob cʌchʌlo' bʌ ti ti' colem ja' i c'aba' Éufrates!

¹⁵ Tsa' jijtiyob jiñi chʌntiquil ángelob chajpʌbilo' bʌ cha'añ ili ora, yic'ot ili q'uiñ, yic'ot ili uw, yic'ot ili ja'bil cha'añ mi' tsʌnsan wiñicob, jujuntiquil loq'uemo' bʌ ti u'uxtiquil.

¹⁶ I tsicol jiñi ca'bʌl soldadojob c'ʌchʌlo' bʌ ti caballo jiñʌch lujunc'al millón, tsa' cu'bi che' bajche' c'amelob ti tsicol.

¹⁷ Tsa' j q'uele ca'bʌl caballo yic'ot jiñi c'ʌchʌlo' bʌ, añ i mʌjquil i tajñ jiñi c'ʌchʌlo' bʌ, chʌchʌc bajche' c'ajc, yʌjyʌx bajche' jacinto, c'ʌnc'ʌn bajche' azufre. Che' yilal i jol jiñi caballo tac che' bajche' i jol colem bajlum, tsa' loq'ui c'ajc ti' yej yic'ot buts' yic'ot azufre.

¹⁸ Tsa' tsʌnsʌntiyob wiñicob jujuntiquil loq'uemo' bʌ ti u'uxtiquil, cha'añ ti' caj jiñi uxchajp wocol, c'ajc yic'ot buts' yic'ot azufre, tsa' bʌ loq'ui ti' yej caballo.

¹⁹ Come añ i p'ʌtʌlel ti' yej yic'ot ti' ñej jiñi caballo. Che' yilal i ñej bajche' lucum, añ tac i jol ti' ñej, tsi' c'ʌñʌ i low wiñicob.

²⁰ Yam bʌ wiñicob mach bʌ añic tsa' chʌmiyob ti jiñi wocol, ma'añic tsi' cʌyʌyob i mel jontol bʌ i melbal, ma'añic tsi' cʌyʌyob i ch'ujutesan xi'bajob, yic'ot dios oro, yic'ot dios plata, yic'ot dios c'ʌnc'ʌn taq'uiñ, yic'ot dios xajlel, yic'ot dios te', mach bʌ añic mi' c'otel i wut, mach bʌ añic mi' yu'bin t'añ, mach bʌ yujilic xʌmbal.

²¹ Ma'añic tsi' cʌyʌyob tsʌnsa, mi wujt, mi ts'i'lel, mi xujch'.