Apocalipsis 8 - Jiñi Tsiji' bʌ Wen T'añ cha'añ Estudio

¹ Che' bʌ tsi' jamʌ i wucp'ejlel sello jiñi Tʌñʌme', ñʌch'ʌl tsa' cʌle panchan che' bajche' ojlil ora.

3. JIÑI WUCTS'IJT TROMPETA ( 8.2—11.19 )

² Che' jiñi tsa' j q'uele jiñi wuctiquil ángelob wa'alo' bʌ ti' tojel Dios, tsa' aq'uentiyob wucts'ijt trompeta.

³ Tsa' tili yam bʌ ángel, tsa' wa'le ti' tojel i pulʌntib i majtañ Dios, chucul i cha'añ i yajñib pom melbil bʌ ti oro. Tsa' aq'uenti ca'bʌl pom cha'añ mi' xʌb yic'ot i yoración pejtelel i cha'año' bʌ Dios, tsi' yʌc'ʌ ti pulel ti' pam pulʌntib melbil bʌ ti oro ya' ti' tojel i buchlib Dios.

⁴ I buts'il jiñi pom tsa' bʌ i yʌc'ʌ ti pulel jiñi ángel, tsa' letsi ti' tojlel Dios yic'ot i yoración wiñicob x'ixicob i cha'año' bʌ Dios.

⁵ Jiñi ángel tsi' ch'ʌmʌ i yajñib pom, tsi' but'u ti' ñich c'ajc loq'uem bʌ ti' pulʌntib, tsi' choco ju'bel ti pañimil, tsa' tili i t'añ chajc, yic'ot ca'bʌl t'añ tac, yic'ot i xu'il chajc yic'ot i yujquel lum.

Jiñi ñaxan bʌ wucts'ijt trompeta

⁶ Jiñi wuctiquil ángelob am bʌ i cha'añob wucts'ijt trompeta, tsi' chajpayob i bʌ cha'añ mi' wusob.

⁷ Jiñi ñaxan bʌ ángel tsi' wusu i trompeta, tsa' tili tuñija' yic'ot c'ajc xʌ'bʌl yic'ot ch'ich' tsa' chojqui ju'bel ti pañimil. Tsa' puli uxpejt lum yic'ot te'el, tsa' laj puli pejtelel yʌxto bʌ pimel.

⁸ I cha'ticlel ángel tsi' wusu i trompeta. Añ chuqui tsa' chojqui ochel ti mar, che' yilal bajche' colem wits woli bʌ ti pulel ti c'ajc. Tsa' t'oxle yilal jiñi mar ti uxpejt, jumpejt tsa' pʌntʌyi ti ch'ich'.

⁹ Ti u'uxcojt cuxul bʌ i chʌñil mar tsa' chʌmi jujuncojt. Ti u'uxp'ejl colem barco tsa' jili jujump'ejl.

¹⁰ I yuxticlel ángel tsi' wusu i trompeta, tsa' yajli colem ec' ti lum. Woli ti lejmel che' bajche' taj. Ti u'uxp'ejl colem ja' yic'ot i loq'uib ja' tsa' yajli jiñi colem ec' ti' pam jujump'ejl colem ja' yic'ot jujump'ejl i loq'uib ja'.

¹¹ I c'aba' jiñi ec' jiñʌch Ch'aj. Ti u'uxp'ejl ja' tsa' ch'aj-a jujump'ejl ya' ba' tsa' yajli jiñi ec', tsa' chʌmiyob ca'bʌl wiñicob cha'añ jiñi ja' come ch'aj-esʌbil.

¹² I chʌnticlel ángel tsi' wusu i trompeta, tsa' ic'a ojlil (1/3) jiñi q'uiñ, yic'ot ojlil (1/3) jiñi uw, yic'ot ojlil jiñi ec'. Che' jiñi, ma'añic tsi' yʌc'ʌ i sʌclel pañimil ba' i'ic', mi ti q'uiñil mi ti ac'ʌlel.

¹³ Che' bʌ tsa' j q'uele, tsa' cu'bi juntiquil ángel woli bʌ ti wejlel ti ojlil panchan. Tsa' cu'bibe i t'añ che' c'am tsi' yʌlʌ: ¡O'bol i bʌ, o'bol i bʌ, ñumen ca'bʌl wocol mi caj i tajob jiñi chumulo' bʌ ti pañimil che' mi' yu'biñob i t'añ yam bʌ uxp'ejl trompeta mu' bʌ caj i wusob jiñi yam bʌ uxtiquil ángelob! Che'en.