Apocalipsis 7 - Jiñi Tsiji' bʌ Wen T'añ cha'añ Estudio

Jiñi 144 mil tsa' bʌ aq'uentiyob i sellojlel

¹ Ti wi'il tsa' j q'uele chʌntiquil ángelob wa'alo' bʌ ti chʌmp'ejl i xujc pañimil, woli' tic'ob chʌnchajp ic' am bʌ ti pañimil ame ñumic ti pañimil yic'ot ti mar yic'ot ti te'el.

² Tsa' j q'uele ja'el yam bʌ ángel woli' letsel tilel ti' pasibal q'uiñ, chucul i cha'añ i sellojlel jiñi cuxul bʌ Dios. Ti c'am bʌ t'añ tsi' pejca jiñi chʌntiquil ángelob tsa' bʌ aq'uentiyob i p'ʌtʌlel cha'añ mi' tic'lañob pañimil yic'ot mar,

³ tsi' yʌlʌ: Mach mi la' tic'lan jiñi lum, jiñi mar, mi jiñic te'el, jinto mi la cʌc' i sellojlel Dios ti' pam i wiñicob Dios, che'en.

⁴ Tsa' cu'bi jaytiquilob tsa' aq'uentiyob i sellojlel loq'uemo' bʌ ti jujunmojt i p'olbal Israel. Añ waxʌclujumpic (144,000).

⁵ Tsa' aq'uentiyob i sellojlel: Lajchʌmp'ejl mil (12,000) i p'olbal Judá, lajchʌmp'ejl mil i p'olbal Rubén, lajchʌmp'ejl mil i p'olbal Gad.

⁶ Lajchʌmp'ejl mil i p'olbal Aser, lajchʌmp'ejl mil i p'olbal Neftalí, lajchʌmp'ejl mil i p'olbal Manasés.

⁷ Lajchʌmp'ejl mil i p'olbal Simeón, lajchʌmp'ejl mil i p'olbal Leví, lajchʌmp'ejl mil i p'olbal Isacar.

⁸ Lajchʌmp'ejl mil i p'olbal Zabulón, lajchʌmp'ejl mil i p'olbal José, yic'ot lajchʌmp'ejl mil i p'olbal Benjamín.

Bajc'ʌl wiñicob x'ixicob tsa' bʌ i lʌpʌyob sʌsʌc bʌ i bujc

⁹ Awilan, ti wi'il tsa' j q'uele motocñayob wiñicob x'ixicob. Ma'añic majqui tsa' mejli i tsicob, ch'oyolob ti pejtelel tejclum tac, ti jujunmojt wiñicob, ti pejtelel lum yic'ot ti pejtelel t'añ tac. Wa'alob ti' tojel i buchlib Dios, ti' tojlel jiñi Tʌñʌme', lʌpʌl i cha'añob pʌl bʌ i bujc sʌsʌc bʌ, añ i yopol xañ ti' c'ʌb.

¹⁰ Tsi' cha'leyob c'am bʌ t'añ, tsi' yʌlʌyob: “Yujil coltaya lac Dios buchul bʌ ti' ye'tel yic'ot jiñi Tʌñʌme'”.

¹¹ Pejtelel ángelob tsa' wa'leyob ti' joytʌlel i buchlib, ti' joytʌlel ancianojob yic'ot jiñi chʌntiquil querubiñob, tsi' pʌc chocoyob i bʌ ti' tojel i buchlib Dios, tsi' ch'ujutesayob Dios.

¹² Tsi' yʌlʌyob: ¡Amén! La' lac su'b i c'uxbiya yic'ot i ñuclel yic'ot i ña'tʌbal lac Dios. La' lac su'ben wocolix i yʌlʌ cha'añ i ñuclel yic'ot i p'ʌtʌlel yic'ot i coltaya ti pejtelel ora. ¡Amén!

¹³ Jiñi cha'añ juntiquil anciano tsi' su'beyon: ¿Majqui jiñi wiñicob lʌpʌl bʌ i cha'añob sʌsʌc bʌ i bujc? ¿Baqui ch'oyolob? Che'en.

¹⁴ Tsa' c su'be: “C Yum, awujil jatet”. Tsi' su'beyon: “Jiñobʌch tsa' bʌ loq'uiyob ti ñuc bʌ wocol. Tsa'ix i wuts'uyob i pislel, tsi' sʌc-esayob ti' ch'ich'el jiñi Tʌñʌme'.

¹⁵ Jiñi cha'añ wʌ' añob ti' tojel i buchlib Dios. Mi' cha'libeñob i ye'tel ti q'uiñil ti ac'ʌlel ti' mal i Templo. Jiñi buchul bʌ ti' yumʌntel mi caj i yajñel yic'otob.

¹⁶ Ma'añix mi caj i chʌn u'biñob wi'ñal mi tiquinti'. Jiñi q'uiñ ma'añix mi caj i pulob. Ma'añix mi caj i yu'biñob ticwal,

¹⁷ come jiñi Tʌñʌme' am bʌ ti' tojel i buchlib Dios mi caj i cʌntañob. Mi caj i pʌsbeñob majlel cuxul tac bʌ ja'. Dios mi caj i sujcubeñob pejtelel i ya'lel i wut”, che'en.