Apocalipsis 6 - Jiñi Tsiji' bʌ Wen T'añ cha'añ Estudio

Jiñi sello tac

¹ Che' jiñi tsa' j q'uele tsi' jamʌ jump'ejl sello jiñi Tʌñʌme', tsa' cu'bibe i t'añ juntiquil querubín i pi'ʌl jiñi uxtiquil, wen c'am tsi' cha'le t'añ che' bajche' i t'añ chajc, tsi' yʌlʌ: ¡La' q'uele! Che'en.

² Tsa' j q'uele, awilan añ juncojt sʌsʌc caballo. Jiñi c'ʌchʌl bʌ ti' pat añ i cha'añ jalʌjb, tsa' aq'uenti corona, tsa' loq'ui majlel, tsa' mʌjli i cha'añ, tsi' mʌlʌ majlel.

³ Che' bʌ tsi' jamʌ i cha'p'ejlel sello, tsa' cu'bibe i t'añ i cha'ticlel querubín, tsi' yʌlʌ: ¡La' q'uele! Che'en.

⁴ Tsa' loq'ui tilel yam bʌ caballo, wen chʌchʌc. Jiñi c'ʌchʌl bʌ ti' pat caballo tsa' aq'uenti i p'ʌtʌlel cha'añ mi' tech guerra ti' tojlel wiñicob cha'añ mi' tsʌnsañob i bʌ, tsa' aq'uenti junts'ijt colem bʌ espada.

⁵ Che' bʌ tsi' jamʌ i yuxp'ejlel sello, tsa' cu'bibe i t'añ i yuxticlel querubín, tsi' yʌlʌ: ¡La' q'uele! Tsa' j q'uele, awilan, añ juncojt i'ic' caballo. Jiñi c'ʌchʌl bʌ ti' pat añ p'isoñib ti' c'ʌb.

⁶ Tsa' cu'bi t'añ loq'uem bʌ ti' yojlil jiñi chʌntiquil querubiñob. Tsi' yʌlʌ: Jump'ejl kilo trigo jiñʌch i tojol jump'ejl q'uiñ e'tel. Uxp'ejl kilo cebada, jiñʌch i tojol jump'ejl q'uiñ e'tel, pero mach ma' letsʌben i tojol jiñi ts'usubil mi olivojil, che'en.

⁷ Che' bʌ tsi' jamʌ i chʌmp'ejlel sello, tsa' cu'bibe i t'añ i chʌnticlel querubín. Tsi' yʌlʌ: ¡La' q'uele! Che'en.

⁸ Tsa' j q'uele, awilan, añ juncojt c'ʌnc'ʌn caballo. Jiñi c'ʌchʌl bʌ ti' pat, i c'aba' xtsʌnsa yic'ot i yajñib chʌmeño' bʌ tsi' tsajca majlel. Tsa' aq'uenti i p'ʌtʌlel cha'añ mi' tsʌnsan bajc'ʌl wiñicob ti espada, yic'ot ti wi'ñal, yic'ot ti chʌmel, yic'ot ti jontol bʌ bʌte'el, ti chʌnchʌntiquil tsa' chʌmi jujuntiquil.

⁹ Che' bʌ tsi' jamʌ i jo'p'ejlel sello, tsa' j q'uele ti' ye'bal i pulʌntib i majtañ Dios i ch'ujlel pejtelel wiñicob x'ixicob tsa' bʌ tsʌnsʌntiyob cha'añ xuc'ulob ti' t'añ Dios, tsi' yʌc'ʌyob ti cʌjñel Cristo.

¹⁰ Tsi' cha'leyob c'am bʌ t'añ, tsi' yʌlʌyob: C Yum lojon am bʌ ca'bʌl a p'ʌtʌlel, ch'ujulet, isujmet, ¿jala to mi caj a cha'len meloñel? ¿Jala to mi caj a q'uextʌbeñob i jontolil jiñi chumulo' bʌ ti pañimil tsa' bʌ i bec'beyon lojon c ch'ich'el?

¹¹ Che' jiñi, ti jujuntiquil tsa' aq'uentiyob sʌsʌc bʌ i bujc wen pʌl bʌ. Tsa' su'bentiyob yom to mi' c'ajob i yoj jinto mi' laj julelob i pi'ʌlob ti e'tel yic'ot i yermañujob mu' bʌ caj i tsʌnsʌntelob ja'el.

¹² Tsa' j q'uele che' bʌ tsi' jamʌ i wʌcp'ejlel sello, tsa' tili colem yujquel. Tsa' ic'a q'uiñ, tsa' sujti che' bajche' pisil melbil bʌ ti' tsutsel chivo, tsa' sujti jiñi uw che' bajche' ch'ich'.

¹³ Jiñi ec' ti panchan tsa' yajli ti lum che' bajche' mi' p'ajtel i wut higuera te' che' mi' ñijcan p'ʌtʌl bʌ ic'.

¹⁴ Tsa' sʌc jili panchan che' bajche' mi' bʌjlel juñ, pejtelel wits tac yic'ot pejtelel lum tac joyol bʌ ti ja' tsa' loc'sʌnti ti' yajñib.

¹⁵ Jiñi reyob ti pañimil, yic'ot año' bʌ i ye'tel, yic'ot wen chumulo' bʌ, yic'ot i yaj capitañob soldadojob, yic'ot jiñi p'ʌtʌlo' bʌ, yic'ot pejtelel año' bʌ ti' yum, yic'ot pejtelel mach bʌ añobic ti' yum tsi' mujcuyob i bʌ ti ch'eñ tac yic'ot ti xajlel tac am bʌ ti colem wits.

¹⁶ Tsi' pejcayob wits tac yic'ot xajlel tac: Yajlem ti joñon lojon, mʌctʌbeñon lojon i wut jiñi buchul bʌ ti' yumʌntel, mʌctʌbeñon lojon i mich'ajel jiñi Tʌñʌme'.

¹⁷ Come tsa'ix tili ñuc bʌ i q'uiñilel i mich'ajel. ¿Majqui mi mejlel i cuch?