Apocalipsis 5 - Jiñi Tsiji' bʌ Wen T'añ cha'añ Estudio

Jiñi bʌlbil bʌ juñ yic'ot jiñi tʌñʌme'

¹ Tsa' j q'uele bʌlʌl bʌ juñ ti ñoj bʌ i c'ʌb jiñi buchul bʌ ti' buchlib Dios, añ i ts'ijbal ti' pam yic'ot ti' pat. Ñup'ul jiñi juñ ti wucp'ejl sello.

² Tsa' j q'uele p'ʌtʌl bʌ ángel, wen c'am tsi' cha'le t'añ: ¿Majqui uts'at cha'añ mi' jam jiñi juñ yic'ot cha'añ mi' loc'sʌben i sellojlel tac? Che'en.

³ Pero ma'añic tsa' tajle juntiquil uts'at bʌ ti panchan mi ti pañimil, mi ti' ye'bal lum, ma'añic majqui tsa' mejli i jam jiñi juñ cha'añ mi' q'uel.

⁴ Tsa' c cha'le ca'bʌl uq'uel, come ma'añic tsa' tajle mi juntiquilic uts'at bʌ cha'añ mi' jam jiñi juñ, ma'añic majqui tsa' mejli i pejcan jiñi juñ, ma'añic majqui tsa' mejli i q'uel.

⁵ Jiñi cha'añ juntiquil anciano tsi' su'beyon: “Mach a cha'len uq'uel, q'uele jiñi colem Bajlum loq'uem bʌ ti' p'olbal Judá, jiñʌch ñuc bʌ i p'olbal David, tsa' mʌjli i cha'añ, jiñi cha'añ mi mejlel i loc'san jiñi wucp'ejl i sellojlel cha'añ mi' jam jiñi juñ”, che'en.

⁶ Tsa' j q'uele ya'añ jiñi Tʌñʌme' ti' tojel i buchlib Dios, joyol ti chʌntiquil querubiñob yic'ot ancianojob, tsiquil tsa' tsʌnsʌnti jiñi Tʌñʌme' pero cha' cuxul, añ wucts'ijt i xulub i yejtal i p'ʌtʌlel yic'ot wucp'ejl i wut, jiñʌch wuctiquil espíritu i cha'añ Dios chocbilo' bʌ tilel ti pejtelel pañimil.

⁷ Tsa' tili jiñi Tʌñʌme', tsi' ch'ʌmʌ jiñi juñ am bʌ ti ñoj bʌ i c'ʌb Dios ya' ba' buchul ti' yumʌntel.

⁸ Che' bʌ tsi' ch'ʌmʌ jiñi juñ, jiñi chʌntiquil querubiñob yic'ot chʌntiquil i cha'c'al ancianojob tsi' pʌc chocoyob i bʌ ti' tojel jiñi Tʌñʌme'. Ti jujuntiquil añ i cha'añ arpa yic'ot taza melbil bʌ ti oro but'ul bʌ ti pom, jiñʌch i yejtal i yoración i cha'año' bʌ Dios.

⁹ Tsi' c'ʌyiyob tsiji' bʌ c'ay: “Wen uts'at ma' ch'ʌm jiñi juñ cha'añ ma' tsilben i sellojlel tac, come tsa' tsʌnsʌntiyet, tsa' mʌñʌyon lojon ti a ch'ich'el cha'añ mic ñop lojon Dios, loq'uemon bʌ lojon ti jujunchajp wiñicob x'ixicob, yic'ot ti pejtelel t'añ tac, yic'ot ti pejtelel tejclum tac,

¹⁰ tsa' wotsayon lojon ti rey yic'ot ti motomaj ti' tojlel Dios. Mi caj c cha'len lojon yumʌntel ti pañimil”.

¹¹ Tsa' j q'uele ca'bʌl ángelob ti' joytʌlel i buchlib Dios, tsa' cu'bibeyob i t'añ yic'ot i t'añ jiñi querubiñob yic'ot i t'añ ancianojob ti pic ti pic,

¹² tsi' yʌlʌyob ti c'am bʌ t'añ: “Uts'at jiñi Tʌñʌme' tsa' bʌ tsʌnsʌnti. Uts'at mi' ch'ʌm i ye'tel yic'ot i chu'bʌañ, yic'ot i ña'tʌbal, yic'ot i p'ʌtʌlel yic'ot i ñuclel, uts'at mi lac su'b i ñuclel”.

¹³ Che' jiñi tsa' cu'bi woli ti t'añ pejtelel melbil tac bʌ am bʌ i cuxtʌlel ti panchan yic'ot ti' pam lum, yic'ot ti' ye'bal lum, yic'ot ti mar, yic'ot pejtelel chuqui tac añ ti pañimil, tsi' yʌlʌyob: “Jiñi buchul bʌ ti' yumʌntel yic'ot jiñi Tʌñʌme'. La' sujbic i ñuclel yic'ot i c'uxbintel yic'ot i sʌclel, yic'ot i p'ʌtʌlel, ti pejtelel ora”.

¹⁴ Jiñi chʌntiquil querubiñob tsi' yʌlʌyob: “Amén”. Jiñi chʌntiquil i cha'c'al ancianojob tsi' pʌc chocoyob i bʌ, tsi' ch'ujutesayob jiñi cuxul bʌ ti pejtelel ora.