Apocalipsis 4 - Jiñi Tsiji' bʌ Wen T'añ cha'añ Estudio

2. JIÑI WUCP'EJL SELLO ( 4.1—8.1 ) I ch'ujutesʌntel Dios ya' ti panchan

¹ Ti wi'il tsa' j q'uele: Awilan, jambil jump'ejl i ti' panchan. Jiñi ñaxan bʌ t'añ tsa' bʌ cu'bi lajalʌch bajche' i t'añ trompeta, tsi' su'beyon: “La' ti letsel ilayi, mi caj c pʌsbeñet chuqui tac wersa mi' caj ti ujtel”, che'en.

² Ti ora tsa' bujt'i c pusic'al ti Espíritu, awilan, tsa' j q'uele jump'ejl buchlibʌl ac'bil bʌ ti panchan yic'ot jiñi ya' bʌ buchul ti' yumʌntel.

³ Lajal yilal jiñi buchul bʌ bajche' jaspe xajlel yic'ot sardio xajlel. Añ t'oxja' ti' joytʌlel i buchlib Dios lajal yilal bajche' esmeralda xajlel.

⁴ Ti' joytʌlel i buchlib añ chʌmp'ejl i cha'c'al buchlibʌl, ya' buchulob ti ye'tel tsa' j q'uele chʌntiquil i cha'c'al (24) ancianojob lʌpʌl i cha'añob sʌsʌc bʌ i pislel, añob i corona tac melbil bʌ ti oro c'ʌcʌl ti' jol.

⁵ Ti' buchlib Dios, tsa' loq'ui i xu'il chajc yic'ot ca'bʌl t'añ yic'ot i t'añ chajc, ya' ti' tojel i buchlib woli ti lejmel wucp'ejl lámpara, jiñʌch i yejtal jiñi wuctiquil espíritu i cha'añ Dios.

⁶ Che' ja'el ti' tojel i buchlib Dios añ mar yilal, am bʌ i sʌclel che' bajche' espejo. Ti' joytʌlel jiñi buchlibʌl ti' chʌnwejlel, añ chʌntiquil querubín, año' bʌ ca'bʌl i wut ti' joytʌlel i bʌc'tal ti c'ajpam yic'ot ti' pat.

⁷ Jiñi ñaxan bʌ querubín che' yilal bajche' colem bajlum; i cha'ticlel che' yilal bajche' alʌ tat wacax; jiñi i yuxticlel añ i wut bajche' i wut wiñic; jiñi i chʌnticlel che' yilal bajche' xiye' woli bʌ ti wejlel.

⁸ Ti jujuntiquil añ wʌcwʌcq'uejl i wich', añ ca'bʌl i wut tac ti' joytʌlel i cuctal yic'ot ti' mal, ti q'uiñil yic'ot ti ac'ʌlel ma'añic mi' cʌy i yʌlob: “Ch'ujul, ch'ujul, ch'ujul lac Yum Dios jiñi Mach bʌ Añic i P'isol i P'ʌtʌlel, jiñi am bʌ ti wajali, jiñi am bʌ wʌle, jiñi tal to bʌ”.

⁹ Ti jujunyajl jiñi chʌntiquil querubín che' mi' c'ʌyibeñob i ñuclel, che' mi' su'beñob wocolix i yʌlʌ jiñi buchul bʌ ti' yumʌntel jiñi cuxul bʌ ti pejtelel ora,

¹⁰ jiñi chʌntiquil i cha'c'al ancianojob mi' pʌcchocoñob i bʌ ti' tojel jiñi buchul bʌ ti' yumʌntel, mi' ch'ujutesañob jiñi cuxul bʌ Dios ti pejtelel ora, mi' yʌc'ob i corona ti' tojel i buchlib, mi' yʌlob:

¹¹ Uts'atet c Yum lojon. Yom mi' sujbel a ñuclel yic'ot a c'uxbintel yic'ot a p'ʌtʌlel, come jatet tsa' mele pejtelel chuqui tac añ. Ti pejtelel tsa' mejli cha'añ che'ʌch awom, tsa' laj aq'ue i cuxtʌlel.