Apocalipsis 22 - Jiñi Tsiji' bʌ Wen T'añ cha'añ Estudio

¹ Ti wi'il tsi' pʌsbeyon sʌc bʌ colem ja', i yejtal bʌ laj cuxtʌlel, wen sʌsʌc bajche' espejo, woli' loq'uel ja' ti' buchlib Dios yic'ot ti' buchlib Tʌñʌme'.

² Woli' ñumel ti' yojlil calle am bʌ ti jiñi tejclum, ti jujunwejl ja' añ te' i yejtal bʌ laj cuxtʌlel, mi' yʌc' i wut ti jujump'ejl uw lajchʌnyajl ti ja'b, añ i c'ʌjñibal i yopol jiñi te' cha'añ mi' c'oq'uesan ti c'am-ʌjel jiñi año' bʌ ti pañimil.

³ Ma'añix jontolil ya'i. Ya'añ i buchlib Dios yic'ot i buchlib jiñi Tʌñʌme', i wiñicob mi caj i ch'ujutesañob.

⁴ Mi caj i q'uelbeñob i wut yic'ot mi caj i ts'ijbubentelob i c'aba' Dios ti' pam.

⁵ Ma'añix ac'ʌlel ya'i; ma'añix i c'ʌjñibal i c'ʌc'al lámpara mi i sʌclel q'uiñ, come lac Yum Dios mi caj i yʌq'ueñob i sʌclel, mi caj i yumʌntelob ti pejtelel ora.

I YUJTIBAL ( 22.6-21 ) Lʌc'ʌlix mi' tilel Cristo

⁶ Jiñi ángel tsi' su'beyon: Xuc'ul jiñi t'añ, isujm ja'el. Lac Yum Dios, jiñi Dios tsa' bʌ i yʌq'ueyob x'alt'añob i ña'tʌbal, tsi' choco tilel i yángel cha'añ mi' pʌsbeñob i wiñicob chuqui mach jalix mi caj ti yujtel.

⁷ ¡Talon ti ora! Tijicña jiñi mu' bʌ i jac' i cʌntesʌntel am bʌ ti ili juñ.

⁸ Joñon, Juan, tsa' cu'bi ili t'añ yic'ot tsa' j q'uele ili tac. Che' bʌ tsa' cu'bi, che' bʌ tsa' j q'uele, tsa' c pʌcchoco c bʌ ti' tojel i yoc jiñi ángel cha'añ mic ch'ujutesan jiñi tsa' bʌ i pʌsbeyon.

⁹ Pero tsi' su'beyon: ¡Q'uele mach che'ic yom ma' mel, come i wiñicon Dios lajal bajche'et yic'ot a wermañujob jiñi x'alt'añob, yic'ot jiñi mu' bʌ i jac'beñob i t'añ jiñi juñ. Ch'ujutesan Dios! Che'en.

¹⁰ Jiñi ángel tsi' su'beyon: “Mach a ñup' jiñi juñ yic'ot i cʌntesa, come lʌc'ʌlix i yorajlel mi' ts'ʌctiyel.

¹¹ Jiñi xjontolil, la' i chʌn cha'len jontolil, jiñi bi'bi' bʌ, la' i chʌn bi'b-esan i bʌ; jiñi toj bʌ, la' i chʌn cha'len chuqui toj; jiñi ch'ujul bʌ, la' chʌn ajñic ti ch'ujul”, che'en.

¹² ¡Awilan, talon ti ora! woli c ch'ʌm tilel chobejtʌbalʌl cha'añ mi cʌq'uen i tojol jujuntiquil che' bajche' añ i melbal.

¹³ Joñon tsa' cʌq'ue i tejchibal pejtelel chuqui tac añ, mi cʌq'uen i jilibal, añon ti ñaxan, añon ti' yujtibal, añon ti' tejchibal, añon ti' jilibal, che'en.

¹⁴ “Tijicñayob mu' bʌ i wuts'ob i pislel cha'añ mi' mejlel i c'uxbeñob i wut jiñi te' i yejtal bʌ i cuxtʌlel yic'ot cha'añ mi yochelob ti ti' jiñi tejclum.

¹⁵ Pero jiñi ts'i'ob mi cʌytʌlob ti jumpat yic'ot xwujt yic'ot jiñi mu' bʌ i cha'leñob ts'i'lel yic'ot xtsʌnsajob yic'ot jiñi mu' bʌ i ñopob dios te' yic'ot jiñi mu' bʌ i mulañob lot yic'ot jiñi mu' bʌ i cha'leñob lot”.

¹⁶ Joñon Jesús, tsa'ix c choco tilel c ángel cha'añ mi' su'beñet ti toj chuqui tac yom ma' cha' su'beñob xñopt'añob baqui jach mi' tempañob i bʌ. Loq'uemon ti David, i p'olbalon David. Joñon jiñi ec'on wen tsiquil bʌ che' yomix sʌc'an pañimil, che'en.

¹⁷ Jiñi Espíritu yic'ot jiñi xch'oc mu' bʌ cajel ti ñujpuñijel mi' yʌlob: ¡La'! Jiñi mu' bʌ i yu'bin, la' i yʌl: ¡La'! Jiñi am bʌ i tiquinti', la' tilic. Majqui jach yom, la' i jap ja' ti' majtañ jach, i yejtal bʌ i cuxtʌlel.

¹⁸ Mic tic'ob pejtelel wiñicob mu' bʌ i yu'biñob i cʌntesʌntel ti ili juñ: Mi añ majqui mi' xʌ' otsan i t'añ ti ili juñ, Dios mi caj i p'ojlesʌben i wocol jiñi wiñic che' bajche' ts'ijbubil ti ili juñ.

¹⁹ Mi añ majqui mi' yʌp lamital i t'añ jiñi juñ, Dios mi caj i yʌpben i c'aba' ti' juñ ba' ts'ijbubil i c'aba'ob jiñi año' bʌ i cuxtʌlel, mi caj i chilben i yajñib ti jiñi ch'ujul bʌ tejclum che' bajche' ts'ijbubil ti ili juñ.

²⁰ Jiñi mu' bʌ i su'b ti toj ili t'añ mi' yʌl: “Isujm, talon ti ora”. ¡Amén! ¡La' c Yum Jesús!

²¹ La' ajñic la' wic'ot ti la' pejtelel i yutslel lac Yum Jesucristo. [Amén.]